Ermənistanın ali hərbi kadrları köklü dəyişdirilir - Paşinyan müharibəyə hazırlaşır...
Ramil Məmmədli: “Nikol narahatdır ki, cəmiyyətdəki narazılıq orduya sirayət edəcək və sonra ona qarşı çevriləcək”
Ermənistanın müvafiq ordu birləşmələrinə yeni komandanlar təyin edilib. Bu barədə qərarı Baş nazir Nikol Paşinyanın təqdimatı əsasında prezident Vaaqn Xaçaturyan imzalayıb.
Qərara əsasən, Simon Nazaryan Üçüncü Ordu Korpusunun komandiri, Qaqik Poqosyan isə - Beşinci Ordu Korpusunun komandiri, eyni zamanda, sonuncu Əlahiddə Ordu Korpusunun komandirinin müavini vəzifəsindən azad edilib.
Qərara əsasən, polkovnik Levon Davidyan Xüsusi Təyinatlı Qüvvələrin komandanı vəzifəsinə gətirilib. Digər sərəncamlarla general-mayor Aleksandr Tsakanyan Baş Qərargahın Əməliyyat Baş İdarəsi rəisinin birinci müavini, polkovnik Simon Nazaryan 3-cü, digər polkovnik Qaqik Poqosyan isə 5-ci Ordu Korpusunun komandiri təyin edilib. Digər sərəncamla Müdafiə Nazirliyi nəzdində Milli Tədqiqat Universitetinə rəhbərlik general-mayor Albert Baqdadyana həvalə olunub.
Maraqlıdır, orduda belə köklü kadr dəyişikliklərində Paşinyanın məqsədi nədir?
“Nəzərə almaq lazımdır ki, Ermənistan ordusunda Rusiyanın təsir imkanları hələ də qalmaqdadır”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, Paşinyanın bunları etməkdə bir neçə məqsədi ola bilər: “Başlıca məqsəd hakimiyyətini qorumaqdır. Məsələ ondadır ki, Paşinyanın Ermənistan cəmiyyətində reytinqi əhəmiyyətli dərəcədə azalıb. Bunun da bir sıra obyektiv və subyektiv səbəbləri var. Çünki Paşinyanın rəhbərlik etdiyi komanda ötən müddət ərzində verdiyi vədlərin əksəriyyətini yerinə yetirə bilməyib. Bu müddətdə vətəndaşların rifah halının yaxşılaşması istiqamətində ciddi nailiyyətlər əldə olunmayıb. Nə daxili, nə də xarici siyasətdə nəzərəçarpacaq uğurlara imza atılıb. Çünki Paşinyan və onun silahdaşları populist vədlər üzərində hakimiyyətə gəliblər. Bu günlərdə Paşinyanın bir sıra vəzifəli şəxsi hakimiyyətdən uzaqlaşdırması da cəmiyyətin rəğbətini qazanmağa hesablanıb. Bununla 2026-cı ildə keçiriləcək parlament seçkilərində yenidən qalib gəlmək istəyir. Ordudakı kadr dəyişiklikləri də bunun tərkib hissəsidir. Çünki Paşinyan narahatdır ki, cəmiyyətdəki narazılıq orduya sirayət edəcək və sonra ona qarşı çevriləcək. Bununla bağlı bəzi örnəklər də var. Məsələn, 10 noyabr 2020-ci il kapitulyasiyasından sonra Paşinyana qarşı ictimai qəzəb artdı. Bunun nəticəsində 2021-ci ilin fevralında Ermənistan Silahlı Qüvvələrinin Baş Qərargahı bəyanat yayaraq Paşinyanın istefasını tələb edib. O zaman Paşinyan xalqa müraciət edib və həmin bəyanatı dövlət çevrilişinə cəhd kimi qiymətləndirib. Həmin vaxt Paşinyanın sosial dayaqları indiki ilə müqayisədə güclü idi. Hazırda isə vəziyyət fərqlidir. Ona görə də orduda kadr dəyişiklikləri aparır ki, baş verə biləcək hərbi çevrilişi önləsin. Nəzərə almaq lazımdır ki, Ermənistan ordusunda Rusiyanın təsir imkanları hələ də qalmaqdadır. Bu səbəbdən Paşinyan hərbçilərə etibar etmir. Ən nəhayət, düşünmürəm ki, sözügedən yeniliklər müharibəyə hazırlıq məqsədi güdür. Çünki Ermənistan buna əl atsa, bu, onlara baha başa gələ bilər”.
Vidadi ORDAHALLI
