Babaserliləri bezdirən kənd yolları...
Yol iqtisadiyyatdır, mədəniyyətdir. Rahat yol insanın firavan, gözəl güzəranı üçün geniş imkanlar yaradır. Qaldı ki, Masallı rayonu, Babaser kənd sakinləri çoxdandır rahat yolun üzünə həsrət qalıblar.
1700 nəfər insanın yaşadığı kəndin yolları olduqca bərbad haldadır. Dağılıb sıradan çıxmış yollarda gediş-gəliş böyük əziyyətə səbəb olur. Bu barədə rayonun səlahiyyət sahiblərinə bildirilsə də, hər dəfə bir bəhanə ilə kənd sakinlərini aldada bilirlər. Halal zəhmətlə həyat sürən, dövlətinə ürəkdən inanan babaserlilər də daha çox haray-həşir salmırlar. Dinamik inkişaf yoluna qədəm qoyan dövlətimizin adına xələl gəlməsin deyə hər bir əzab-əziyyətə dözürlər.
Deyilənə görə, kənd yollarin təmirindən ötrü dövlət bir neçə dəfə vəsaitdə ayırıb. Amma iş görülməyib. Görünür yerli məmurlar insanların rahatlığını istəmirlər. Odur ki, indi yola çıxıb mənzil başına vaxtında qayıtmaq burada müşkül məsələdir. Babaserlilər bildirirlər ki, biz yerlərdə insanların taleyinə məsul olan məmurlardan gördüyümüzü görmüşük. Daha onların bundan sonra bir tədbir görməyinə heç inanmırıq. Amma onu da bilirik ki, həmişə öz xalqının xoş güzəranını, rahatlığını düşünən ölkə rəhbəri vəziyyətdən xəbərdar olsa heç vaxt bizi köməksiz qoymaz.
Bəli, hazırda Masallıda ömrünü başa vuran Babaser kənd yollarının təmirinə ciddi ehtiyac var. İsti aylarda toz-torpaqdan, bir balaca yağış yağanda isə palçığın əlindən camaat əziyyətə düşür. Vəziyyət o qədər acınacaqlıdır ki, bəzən babaserlilər bir yerə getməkdən günlərlə boyun qaçırırlar. Eləcə asfaltı dağılmış yollarda yaranan saysız çala-çuxurlar avtomobilləri vaxtsız sıradan çıxarır, sahiblərini ziyana salır...
Zəfər ORUCOĞLU
Azərbaycan Jurnalistlər Birliyinin üzvü
