Azad Aslanov - 75
Dünyaya gələn hər bir insan bəndəsi özünü, kimliyini dərk etdiyi gündən özünə sənət seçir və seçimində yanılmayan bəndə uğur dalınca qaçmır, uğur, şöhrət özü onu tapır. Özünü sənətində tapan, sənətilə yaşayan şəxslərdən biri də Azad Qulu oğlu Aslanovdur.
Azad Aslanov 1949-cu ildə Azərbaycanın dilbər guşələrindən olan Şəmkirin Keçili kəndində ziyalı ailəsində anadan olub. 1956-1966-cı illərdə Şəmkir rayonunun Səməd Vurğun adına orta məktəbdə oxumuşdur. 1966-cı ildən Bakı şəhərindəki Hacı Zeynalabdin Tağıyev adına Toxuculuq Kombinatında əmək fəaliyyətinə başlamış, müxtəlif vəzifələrdə işləmişdir. Ali təhsilli Azad Aslanov 1985-ci ildə Xətai rayonunda məntəqə seçki komissiyasının sədri, 1995-ci ildən isə ərazi üzrə Yeni Azərbaycan Partiyasının sədridir. O, 1984-cü ildən Mədəniyyət evinin direktoru vəzifəsində çalışır.
Mən Azad müəllimi on ildən çoxdur ki, tanıyıram. Toxuculuq Kombinatının mədəniyyət evində mötəbər tədbirlərdə iştirak etmişəm. Bir çox tədbirlərin də aparıcısı məhz Azad müəllim olmuşdur. Azad müəllim çox səmimi, mehriban, qayğıkeş insandır. O bəzən söhbətlərində qeyd edir ki, “heç inanmazdım ki, bir neçə kitab yazaram”. Altı il əvvəl ilk kitabı işıq üzü görmüşdü. Sonradan “Zirvəyə ucalan yol”, “Bir nəslin izilə” kitabları dərc olunmuşdu.
Əməkdar mədəniyyət işçisi, “Qızıl qələm” mükafatı laureatı Azad Aslanov hazırda növbəti kitabı üzərində çalışır. Onun birinci kitabı 65 illik yubileyinə, ikinci kitabı 70 illik yubileyinə həsr olunub. Müəllif bu kitabında dostlarının, həmkarlarının, mehriban kollektivinin, əlbəttə dövlətimizin apardığı uğurlu fəaliyyətini də qələmə almışdır. Özü demişkən bu ötən illər bir göz qırpımında gəlib keçdi. Azad müəllim 50 ildən artıqdır ki, fəhləlikdən işə başlayıb, müxtəlif vəzifələrdə işləmişdir. Onu da qeyd edim ki, Azad həmişə kollektivdə sevilib, rəhbərliyin etimadını qazanıb. Nə qazanıbsa işinə, sənətinə borcluyam deyir. Dövlət qarşısında xidmətlərinə görə 27 dekabr 2009-cu ildə AHİK-in “Həmkarlar İttifaqında xidmətlərinə görə” medalı və saysız-hesabsız fəxri fərman və diplomlarla təltif olunub. Azərbaycan Kütləvi İnformasiya İşçiləri Həmkarlar İttifaqı Rəyasət Heyətinin qərarı ilə “Qızıl qələm” media mükafatına layiq görülmüşdür. 2010-cu ildə Azərbaycanda xeyriyyəçilik hərəkatına fəal iştirakına görə “İlin intellektual ziyalısı” fəxri diplomu ilə təltif olunub. 2018-ci il 2 fevral tarixində isə Azərbaycan Respublikasının Prezidenti cənab İlham Əliyevin Sərəncamı ilə “Əməkdar Mədəniyyət İşçisi” adına layiq görülmüşdür.
Fürsətdən istifadə edib, səmimi insan, sevimli ata, mehriban baba Azad müəllimin 75 illiyi münasibətilə səmimi qəlbdən təbrik edir, uzun ömür, cansağlığı, nəvə-nəticə toyu görməyi arzulayıram.
Məlahət Səfərova,
Azərbaycan Jurnalistlər Birliyinin üzvü.
