Ermənistan üzərində gizli Rusiya-Fransa sövdələşməsinə şübhələr artır...
Əli Mustafa: “Fransa Ukrayna müharibəsində Rusiyanın zəifləməsini, məğlub olmasını istəmir”
Fransanın Ermənistanda artan fəallığı fonunda Rusiyanın təmkinli davranması Paris və Moskva arasında gizli sövdələşmə ilə bağlı ehtimalları artırır. Baxmayaraq ki, Makronun təşkilatçılığı ilə Ukraynaya hərbi yardımın artırılması mövzusunda konfrans keçirilib, Fransa ora ordu birləşmələrini göndərmək istəyir və s.
Birincisi, Fransa Ukrayna ilə bağlı haray salsa da reallıqda vəziyyət fərqlidir. Fransa kimi dövlət Ukraynaya hərbi baxımdan kömək edən ölkələr arasında 15-ci yerdə qərarlaşıb. İkincisi, Fransa Avropa İttifaqında iqtisadi gücünə görə ikinci olsa da, indiyə qədər Ukraynaya cəmi 640 milyon avroluq hərbi yardım edib. Almaniya isə 17,7 milyard avro. Üçüncüsü, Fransa Ukraynaya 20 ədəd məşhur “Sezar” uzaqvuran toplarını verəcəyini bəyan etsə də, deyib ki, 1 il yarım gözləməlisiniz. Bu da Ukraynada narazılığa səbəb olub. O mənada ki, Fransada hazır toplar ola-ola vermir. Dördüncüsü, Fransanın güclü qırıcı təyyarələri olsa da, hər dəfə onları Ukraynaya verməkdən imtina edir.
“Məhz bu səbəbdən Parisin Ermənistanı silahlandırması Moskvada o qədər də qıcıq yaratmır”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, bütün bunların arasında əlaqənin olması istisna deyil: “Prinsipcə, Fransanın belə mövqe sərgiləyəcəyi gözlənilən idi. Eyni zamanda, bu gözlənilən idi. Çünki müharibənin ilk dövrlərində Fransa ciddi tərəddüd edirdi. Hətta belə malumatlar var idi ki, Makron Zelenskini Putinə güzəştə getməyə təhrik edir. Hətta ilk dövrlərdə Fransa Ukraynaya hərbi yardımla bağlı Ramştayn formatına qatılmaq belə istəmədi. Sonra ABŞ-ın təzyiqləri ilə və yaranan situasiya ilə əlaqədar prosesə qoşuldular. Ancaq buna baxmayaraq, Fransa Ukraynaya hərbi yardım edilməsində fəal iştirak etmədi. Parislə Moskva arasında diplomatik kanallar vasitəsilə gizli danışıqlar var idi. Ona görə də, Fransanın imkanları böyük olsa da, Ukraynaya az yardım etməsi təsadüfi deyildi. Nəzərə alsaq ki, həm Rusiya, həm də Fransa Vatikan Klubunun üzvləridir, deməli, bunların siyasi mənşəyi də eynidir. O baxımdan Fransa Ukrayna müharibəsində Rusiyanın zəifləməsini, məğlub olmasını istəmir. Makronun Ukraynaya Fransa hərbi birliklərinin göndərilə biləcəyi ilə bağlı dedikləri ucuz və alladıcı şoudur. Fransa sifətini qorumaqdan ötrü Rusiyaya üzdə qarşı olduğunu göstərir. Reallıq isə bundan fərqlidir. Fransa çox danışır, az iş görür. Almaniya isə əksinə, az danışır, çox dəstək verir. ABŞ-dan sonra Ukraynaya ən çox yardım edən Almaniyadır. Almaniynın iqtisadiyyatı böyük olsa da Fransa kimi riyakarlıq etmir. Bacardığı məsələlərdə dəstək ola bilir. Mən də hesab edirəm ki, Fransanın Ermənistanda artan fəallığı və Rusiyanın buna təmkinli yanaşması təsadüfi deyil. Çox güman ki, Rusiya Cənubi Qafqazı itirə biləcəyini anlayır. Belə olan halda Rusiya regiona başqa bir gücün gəlməsində yox, məhz Fransanın daxil olmasında maraqlıdır. Məhz bu səbəbdən Fransanın Ermənistanı silahlandırması Rusiyada o qədər də qıcıq yaratmır. Kreml buna sərt reaksiya vermir. Ehtimal ki, bu ölkələr arasında gizli anlaşma var. Rusiya ilə Fransa Türkiyənin regionda güclənməsində maraqlı deyil. İranın da bu gizli anlaşmada hansısa formada iştirakı istisna deyil”.
Vidadi ORDAHALLI
