9-cu maddə Zəngəzur dəhlizində Azərbaycana güc tətbiqi hüququ verirmi...
Rövşən Məhərrəmov: “Güman etmirəm ki, Azərbaycan bu bəndin həyata keçirilməsilə bağlı güc yoluna əl atsın”
Azərbaycanın “Zəngəzur dəhlizi”ni açmaq bəhanəsi ilə Ermənistana hücumu mümkündürmü? Ermənistan Silahlı Qüvvələrinin Baş Qərargahının keçmiş rəisi, keçmiş baş hərbi inspektor, general-polkovnik Movses Akopyan 168.am saytına müsahibəsində bu sualı cavablandırarkən deyib:
“Azərbaycanın hücumu qaçılmazdır. 9 noyabr 2020-ci il tarixli üçtərəfli bəyanatın 9-cu bəndini oxuyun, Azərbaycan bunu həyata keçirəcək”.
Təbii ki, Azərbaycanın belə fikiri yoxdur.
9 noyabr 2020-ci il tarixli üçtərəfli bəyanatın 9-cu bəndinə əsasən, regionda bütün iqtisadi və nəqliyyat əlaqələri blokdan çıxarılmalı və Ermənistan Respublikası Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqələrinin təhlükəsizliyinə təminat verməlidir. Məlumata görə, nəqliyyat rabitəsinə nəzarəti Rusiya FTX-nin Sərhəd Xidməti həyata keçirməli olacaq. Bəyanatda qeyd edildiyi kimi, Azərbaycan və Ermənistan arasında razılaşmaya əsasən, Naxçıvan Muxtar Respublikasını Azərbaycanın qərb rayonları ilə birləşdirən yeni nəqliyyat kommunikasiyalarının tikintisi təmin edilməlidir.
Movses Akopyanın fikrincə, Azərbaycanı heç nə dayandıra bilməz, hətta sülh müqaviləsi belə.
Azərbaycanın Zəngəzur dəhlizini açmaq bəhanəsi ilə Ermənistana hücumu mümkündürmü?
Hərbi-siyasi şərhçi, ehtiyatda olan polkovnik Rövşən Məhərrəmov “Bakı-Xəbər”ə açıqlamasında bildirdi ki, Ermənistanın keçmiş baş qərargah rəisinin müsahibəsini tam oxuyub: “Əsasən söhbət üçtərəfli sənədin 9-cü bəndindən gedir. Bu da Azərbaycanın Qərb rayonları ilə Naxçıvanı birləşdirəcək yolun açılmasıdır. Ermənistan bu yolun açılmasına zəmanət verib. Həmin bənddə yazılıb ki, dəhlizə nəzarəti də Rusiyanın FTX-si həyata keçirəcək. Bu çiddi maddədir. Qarant ölkə olaraq Rusiya bu sazişə imza atıb. Buna görə də , Rusiya Ermənistanı razılaşmaya əməl etməyə çağırmalıdır. Amma görürük ki, həmin maddə yerinə yetirilmir. 44 günlük müharibədən sonra Ermənistan razılaşmanın 4-cü bəndini yerinə yetirmədi. Silahlı qüvvələrini Qarabağdan çıxarmadı. Rusiya sülhməramlı kontingenti isə buna göz yumdu. Nəticədə, bir günlük antiterror əməliyyatı ilə 4-cü bəndin tələblərini təmin etdik. İndi də 9-cü maddədən yayınırlar. Bizdən əvvəl bunu Rusiya təmin etməlidir. Bu gün biz alternativ kimi İranla da Naxçıvanı birləşdirəcək yolun üzərində işləyirik. Yaddan çıxarmamalıyıq ki, bu yolun açılması Ermənistanın özünə də xeyirdi. Güman etmirəm ki, Azərbaycan bu bəndin həyata keçirilməsilə bağlı güc yoluna əl atsın. Generalın dedikləri cəfəngiyatdır. Sülh müqaviləsi imzalanandan sonra bizim onlara hücum edəcəyimiz öz ictimaiyyətini və dünyanı aldatmaqdır ki, guya Azərbaycan müharibıyə hazırlaşır. Rusiya Ermənistana təzyiqi artırsa bu pronlem tez bir zamanda həllini tapacaq. Bir sözlə, Azərbaycan güc tətbiqinə çalışmır. Biz sülh müqaviləsi ilə bağlı şərtlərimizi demişik. Ermənistan bunu uzadır. Prezident dedi ki, biz həmin yerlərə tanklarlarla yox, avtomobillərlə qayıdacağıq. Bu bir daha sübut edir ki, bizim hərbi gücdən istifadə etmək planımız yoxdur”.
Məhəmmədəli QƏRİBLİ
