Ərazinin adı Qarabağdır, orada "parlament binası" heç vaxt olmayacaq... - FOTO
Ceyhun Məmmədov: “Təəssüf ki, ermənilər yenə də öz xülyalarından əl çəkmirlər”
İşğaldan azad edilmiş Xankəndidə əvvəllər erməni separatçıları tərəfindən “parlament” kimi istifadə edilən qanunsuz bina sökülür. Binanın sökülməsinin görüntüləri sosial şəbəkələrdə yayılıb.
Xankəndidə separatçı yuvalarından birinin də tari-mar edilməsi erməniləri özündən çıxarıb və nəticədə yeni hədyanlar danışmağa başlayıblar. Erməni mediasında bununla bağlı qəribə iddialar yer alıb.
Ermənilərin dediyinə görə, Azərbaycan qondarma "Arsax"ın "parlament" binasını sökməklə göstərir ki, ermənilərin Qarabağa qayıdışında maraqlı deyil.
Biz isə erməni başbilənlərinin diqqətinə çatdıraq ki, əvvəla, Azərbaycan ermənilərin Qarabağa qayıtmasında maraqlıdır, onlar burada bizim vətəndaşlarımız kimi yaşayacaqlar.
İkincisi, ermənilərin ora qayıdışının bu "parlament" binasına nə dəxli var? Ermənilər ora qayıdıb yenidən "parlament" binasında iclas edəsi, özlərinə seçki keçirəsi, deputat seçəsi deyillər ki. Kimdi onlara imkan verən ki, gəlib orada oturub bir daha qanunsuz parlament seçkiləri keçirsinlər? Bizim torpaqlara gələcəklər və Azərbaycan vətəndaşları kimi orada yaşayacaqlar, özlərinə Azərbaycan qanunvericiliyi əsasında bələdiyyələr, Azərbaycan parlamentinə deputatlar seçəcəklər və sair. Onlara yenidən “parlament” binası deyilən nəsnə, “prezident administrasiyası” binası və sair daha lazım deyil. Əgər onlar bunun üçün qayıtmaq istəyirlərsə bu boş xülyadır, elə getdikləri yerdə də qalsınlar. Çünki o ərazinin adı Qarabağdır, orada "Parlament binası" heç vaxt olmayacaq və separatizmə bir daha imkan verilməyəcək.
“Qarabağ Azərbaycanın bir hissəsidir, bir parçasıdır, burada hansısa bir “parlament” binasının olması mümkün deyil”
Millət vəkili Ceyhun Məmmədov “Bakı-Xəbər”ə “Qeyd etmək lazımdır ki, bu iddiaların heç bir əsası yoxdur. Təəssüf ki, ermənilər yenə də öz xülyalarından əl çəkmirlər. Əlbəttə, Azərbaycan Prezidenti dəfələrlə açıqlama verib, aydın bildirib ki, biz ermənilərin ora qayıtmasında maraqlıyıq. Bunun üçün Azərbaycan bütün addımları atır. Amma ermənilərin ora qayıtması o anlama gəlmir ki, orada onların “parlamenti”, “müstəqil dövləti” olacaq. Yəni parlament müstəqil dövlətlərdə, eyni zamanda muxtar respublikalarda olur. Qarabağ Azərbaycanın bir hissəsidir, bir parçasıdır, burada hansısa bir “parlament” binasının olması mümkün deyil. Çünki parlament binası ölkənin paytaxtındadır. Hər bir ölkənin də bir parlamenti olur, bir neçə parlamenti olmur”- deyə bildirdi.
C.Məmmədovun sözlərinə görə, bu o formada ola bilər ki, gələcəkdə Azərbaycanda yaşayan xalqlardan birinin nümayəndəsi kimi Azərbaycan parlamentində ermənilər deputat kimi təmsil olunsun. “Ancaq burada ayrıca bir parlamentdən söhbət gedə bilməz. Bu onların xəstə olduğunu bir daha açıq-aydın göstərir. Əlbəttə ki, Azərbaycanın onlara reaksiyası tam əsaslıdır və güclüdür. Yəni bu gün bu kimi iddialar, bu kimi yanaşmalar iki xalq arasında yaranmaqda olan etimadı da zədələyir. Ona görə də yaxşı olar ki, ermənilər bu cür xülyalardan əl çəksinlər və bu cür təxribatlara son qoysunlar.
Yəni qeyd etdiyimiz kimi, onlar bizim bərabərhüquqlu vətəndaşlarımız kimi gəlib bizim ölkəmizdə yaşaya bilərlər, fəaliyyət göstərə bilərlər. Dəfələrlə, Azərbaycan bu barədə öz mövqeyini açıqlayıb. Amma yenə də deyirik, bu o mənaya, o anlama gəlmir ki, onlar bu cür xülyada olsunlar. Bu bina işğaldan sonra tikilmiş binadır. Təəssüflə qeyd etmək lazımdır ki, bu bina çirkin qərarların, çirkin niyyətlərin qəbul edildiyi bir məkandır. Ona görə də, bu məsələ ilə bağlı Ermənistanın bəzi saytlarının yaratdığı ajiotajın heç bir əsası yoxdur. Yəni bu kimi yanaşmalar qəbuledilməzdir. Yaxşı olar ki, ermənilər bu cür təxribatlardan, bu cür yanaşmalardan əl çəksinlər” –deyə C.Məmmədov qeyd etdi.
İradə SARIYEVA
