Şəhidin doğum gününə həsr olunmuş tədbir keçirildi – Lənkəranda
Lənkəran şəhər Heydər Əliyev Mərkəzində Vətən müharibəsi şəhidi Baloğlan Şakir oğlu Əhədlinin doğum gününə həsr olunan tədbir keçirilib. Mərkəzin foyesində tədbir iştirakçıları öncə şəhid Baloğlan Əhədliyə həsr olunan kitab, şəkil və fəxri fərmanlardan ibarət sərgi baxıblar.
Rəsmi hissəsi şəhidlərimizin xatirəsinin bir dəqiqəlik sükutla anılmaqla və Dövlət himninin səslənməsi ilə başlanan tədbirdə Baloğlan Əhədlinin döyüş yolundan bəhs edən video-çarx nümayiş olunub.
Lənkəran Şəhər İcra Hakimiyyətinin (ŞİH) başçısı Taleh Qaraşovun, şəhid ailələrinin üzvlərinin, müharibə əlillərinin, şəhidin təhsil aldığı Gəgiran kənd tam orta məktəbinin müəllim və şagirdlərinin, rayon ictimaiyyətinin nümayəndələrinin qatıldığı tədbirdə Taleh Qaraşov çıxış edib: - Şəhidlərimizin xatirəsinin əziz tutulması, onların anılması hər birimizin mənəvi borcudur. Dövlət başçısı cənab İlham Əliyevin və Birinci vitse-prezident Mehriban xanım Əliyevanın bu istiqamətdə xüsusi tapşırıqlarına əsasən şəhid ailələrinə dövlət tərəfindən tam şəkildə qayğı göstərilir, onların bütün problemləri vaxtında həll olunur. Zəfərimizin qazanılmasında əvəzolunmaz payları olan şəhidlərimiz bizim qürur mənbəyimiz, iftixarımızdır ki, onların xatirələrinin gələcək nəsillərə çatdırılması hər bir vətəndaşın işidir. Azərbaycan xalqı və dövləti durduqca şəhidlərimizin xatirəsinə ehtiram, şəhid ailələrinə olan qayğı və diqqət davamlı olacaq.
Vətən müharibəsində qazanılan qələbədə şəhidlərimizin göstərdiyi qəhrəmanlıqlardan danışan şəhidin atası Şakir Əhədov, əmisi Şəmşir Əhədov, Gəgiran kənd tam orta məktəbinin tərbiyə işləri üzrə direktor müavini Mehman Əliyev, Azərbaycan Yazıçılar Birliyinin (AYB) Lənkəran bölməsinin sədri Qafar Cəfərli onu da bildirdilər ki, xalqımız bu gün alnıaçıq, üzüağ, məğrur və başıuca yaşayırsa, buna görə şəhidlərimizə borcluyuq. Şəhid adlarının əbədiləşdirilməsi istiqamətində görülən işlər, ailələrinə göstərilən diqqət və qayğı cəmiyyət tərəfindən məmnunluqla qarşılanır.
Həmçinin şəhid atası çıxışında hər zaman dövlətin qayğısını gördüyünü deyib, edilən müraciətlərə həssas münasibət olduğunu vurğulayıb, bütün bunlara görə dövlət başçısı cənab İlham Əliyevə və Birinci vitse-prezident Mehriban xanım Əliyevaya minnətdarlığını bildirib.
Zəfər ORUCOĞLU
Azərbaycan Jurnalistlər Birliyinin üzvü.
