Deputat qadınların pensiya yaşı ilə bağlı təklifini necə müdafiə edir...
MDB ölkələri arasında ən yüksək pensiya yaşı Azərbaycandadır. Pensiya sahəsində daim müzakirə olunan və bu sahədə ictimaiyyəti maraqlandıran məsələlərdən biri də pensiya yaşının azaldılmasıdır.
Pensiya yaşının azaldılması məsələsinin gündəmdən düşməməsinin əsas səbəbi insanların əksəriyyətinin pensiya yaşına çatmadan vəfat etməsidir. Milli Məclisdə gələcəkdə qadınların pensiya yaşlarına yenidən baxılması təklif edilib. Milli Məclisin ötən iclasında millət vəkilləri qadınların pensiya yaşının azaldılması təklifi çıxış ediblər.
Məlumat üçün bildirək ki, Azərbaycanda 1 iyul 2024 - 30 iyun 2025-ci il tarixində pensiya yaşı kişilər üzrə 65 il, qadınlar üzrə 64 il təyin edilib. 2025-ci il iyuldan sonra isə qadınlar da 65 yaşda pensiyaya çıxacaqlar.
Ceyhun Məmmədov: “Xanımların zərif cins olması nəzarə alınaraq onların pensiya yaşının azaldılması daha uyğun olar”
Qadınların pensiya yaşının azaldılmasının vacibliyi barədə fikir bildirən millət vəkili Ceyhun Məmmədov “Bakı-Xəbər”ə şərhində bildirdi ki, qadınların pensiya yaşlarına yenidən baxılmalıdır. Belə olarsa daha yaxşı olar: “Danılmaz faktdır ki, bu gün müəyyən bir yaşa gəldikdən sonra insanlar iş tapmaqda əziyyət çəkir. Məlum problemlə bağlı bizə çoxlu müraciətlər var. Bu məsələ öz həlini tapmalıdır. Xanımların zərif cins olması nəzarə alınaraq onların pensiya yaşının azaldılması daha uyğun olar”.
Millət vəkili onu da əlavə etdi ki, bu ilin büdcəsində də ölkə əhalisinin rifahının yüksəldilməsi, pensiya və müavinətlərin, şəhid ailələrinə və müharibə iştirakçılarına diqqət və qayğının artırılması prioritet istiqamətlərdan biri kimi götürülüb: “Bu, həm də dövlətimizin bu sahəyə diqqət və qayğısının daha bir göstəricisidir. Məlumat üçün deyim ki, bu gün Azərbaycan dünyada şəhid ailələrinə və müharibə iştirakçılarına ən yüksək diqqət və qayğı göstərən azsaylı ölkələrdən biridir”.
Xalid Kərimli: “Qadın və kişilərin pensiya yaşının bərabər olması tamamilə ədalətlidir”
İqtisadçı Xalid Kərimli hesab edir ki, kişilərin yaşam müddəti daha az olduğuna görə, qadınlar kişilərdən daha çox işləməlidir: "Qadınlarla kişilər eyni hüquqlara malikdir. Kişi 65 yaşına qədər işləyə bilər, qadın 65 yaşına qədər işləyə bilməz? Araşdırmalar göstərir ki, qadınlar kişilərdən hər zaman daha uzun yaşayıb. Ən azı, qadınlar kişilərdən il yarım daha çox yaşayırlar. Fiziki cəhətdən məhdud insanlar daha erkən vəfat edirlər. Kişilərin yaşamaq müddəti daha az olduğuna görə, qadınlar kişilərdən daha çox işləməlidirlər. Nəinki kişilər qadınlardan daha çox. Bu kifayət qədər sadə məntiqdir. Qadınlar və kişilərin pensiya yaşının bərabər olması tamamilə ədalətlidir. Pensiya yaşının Avropa ilə bir olması tamamilə ədalətlidir. Amma Avropada pensiyaya çıxan insanların orta gözlənilən ömür müddəti 16-17 ildir. Avropa ölkələrində yaşayan şəxs 81-82 yaşında ölür. Azərbaycanda isə insanlar 73- 74 yaşında vəfat edirlər. Avropada insanlar 16-17 il pensiya ala bilirsə, Azərbaycan vətəndaşı 8-9 il pensiya ala bilir".
Günel CƏLİLOVA
