Bakı və Ankara Ermənistana qarşı ortaq şərt üzərində razılaşdılar...
Turab Rzayev: “Ermənistan səmimi olsa və sülhə doğru daha məqbul addımlar atsa, Azərbaycanla Türkiyə birliyindən qorxmağına, çəkinməyinə ehtiyac qalmaz”
Erməni mediası Türkiyədə keçirilən XİN rəhbərlərinin son görüşündən çox narahatdır. Onlar yazır ki, Azərbaycan bir daha ilkin şərt irəli sürərək bildirib ki, sülh prosesinə maneə Ermənistanın Konstitusiyasıdır, ona görə də onu dəyişdirmək lazımdır:
“Bu dəfə Azərbaycan tərəfi bəyan edib ki, Ermənistan Respublikasının Konstitusiyasında təkcə Azərbaycana deyil, Türkiyəyə də ərazi iddiaları var”. Ceyhun Bayramov Ankarada Türkiyənin xarici işlər naziri Hakan Fidanla görüşdən sonra təşkil olunan mətbuat konfransında deyib ki, prosesdə müsbət dinamikanın olmasına baxmayaraq və sazişin əhəmiyyətli hissəsi razılaşdırılsa da, lakin Ermənistan konstitusiyasında və bir sıra hüquqi aktlarda Azərbaycana qarşı ərazi iddiaları qüvvədə qalır: “Heç kimə sirr deyil ki, Ermənistanın da Türkiyə Respublikasına qarşı ərazi iddiaları var. Hazırda sülh sazişi üzərində işi başa çatdırmaq üçün əsas maneə Ermənistan Konstitusiyasında yer alan ölkələrimizə qarşı ərazi iddialarıdır”.
Belə çıxır ki, Ermənistan konstitusiyasının dəyişməsi ilə bağlı tələbi Azərbaycan və Türkiyə ortaq olaraq irəli sürür?
Siyasi şərhçi Turab Rzayev “Bakı-Xəbər”ə açıqlamasında bildirdi ki, bu gözlənilən idi: “Azərbaycan rəsmi olaraq konstitusiyanın dəyişdirilməsi məsələsini və kommunikasiyanın açılmasını sülh prosesindən ayırsa da, bu o demək deyil ki, Azərbaycan bu iddialarından əl çəkib. Gözlənilən odur ki, Azərbaycan tərəfi Naxçıvana manəesiz keçid məsələsini həll etməyə çalışacaq. Eyni zamanda, digər tərəfdən də Ermənistan konstitusiyasında dəyişikliyə nail olmağa can atacaq. Ermənistan konstitusiyasında bu müddəaların olması gələcəkdə sülh məsələsinə mənfi təsir edə bilər. Ona görə də burada müəyyən qədər həqiqət də var. Bu, sırf Türkiyənin Azərbaycana dəstəyi ilə də bağlı deyil. Türkiyə indiki məqamda çalışır ki, Azərbaycanla Ermənistan arasında sülh müqaviləsi imzalansln. İndiki məqamda da Türkiyə Azərbaycanın maraqlarını üstün tutacaq və çalışaq ki, Azərbaycanla birlikdə koordinasiyalı şəkildə hərəkət etsin. Bu da Azərbaycana Ermənistan üzərindən əlavə təzyiq imkanları verir. Ermənistan səmimi olsa və sülhə doğru daha məqbul addımlar atsa, Azərbaycanla Türkiyə birliyindən qorxmağına, çəkinməyinə ehtiyac qalmaz. Tam əksinə, bu birlik Ermənistanın həm iqtisadi inkişafı, həm də sərhədlərin açılması üçün dəstək ola bilər”.
Məhəmmədəli QƏRİBLİ
