Prezidentin bu fikri həm də namizədlərə aiddir, təəssüf, dərs götürmədilər .....
"Bakı-Xəbər" qəzetinin Baş redaktoru, politoloq Aydın Quliyev öz Facebook səhifəsində deputatlığa namizəd olan bəzi şəxslərin son davranışları, qazi və şəhid ailələrinin üzərindən təbliğat qurmaq kimi qüsurlu hərəkətləri barədə maraqlı paylaşım edib. A.Quliyev yazır: "Prezident İlham Əliyev həmin fikri bu yaxınlarda Şuşada demişdi - Zəfər mövzusunu çox da istismar etmək olmaz və irəlidəki məsələlərə daha çox diqqət göstərməliyik.
Sadə deyilmiş fikrin çox sadə də açmaları var. Prezident demək istədi ki, Zəfərin qədrini- qiymətini tam bilək, Zəfər Ali baş komandanın, ordunun və xalqımızın Zəfəridir, qazilərə və şəhid ailələrinə həssas olun, etdiklərinizi üzlərə vurmayın, Vətən üçün canını və övladını vermiş insanlara nə versək də azdır, lakin onları verdiklərimizin müqabilində aşağılamayaq, elə etməyək ki, verdiklərimizin, etdiklərimizin əvəzində onlardan hansısa təmənna güddüyümüzü düşünsünlər....
Bəs bir sıra namizədlər nə edir, bu sözlərdən hansısa dərsi götürürlərmi?
Seçki dairəsində qazinin, şəhid ailəsinin qapısını əlində bir şirniyyatla açır, bir fincan çayını içir, foto çəkdirir və sonra da bu məzmunsuz jesti "böyük xəbərə " çevirərək ictimailəşdirir. Ən pisi də odur ki, "qazi və ya şəhid ailəsi sentyabrın 1- də filankəsə səs verəcəyinə söz verdi " deyə öyünürlər. Ayıbdı, vallah...
Əvvala, Prezidentin "Zəfər mövzusunu çox istismar etmək olmaz" fikrini unutmaq bu məqamda böyük qəbahətdir.
İkinci, təşviqata qədər bu həssas ailələrə gedib baş çəkmək daha doğrusu olmazdımı?
Üçüncü, seçki təşviqatı günlərində bu həssas insanların qapısını imza və ya səs üçün döymək onlara hörmətsizlik , duyğularını istismar etmək deyilmi?
Dördüncü, qapılarını döydünüz , başa düşdük, bəs onlardan səs istəməyi və alınan ( bəlkə də alınmayan) cavabı ictimailəşdirmək nəyə lazımdır?
Beşinci, öz səsini hər cür "alver predmetinə" çevirməkdən ötrü ürəyi gedən başqa kateqoriyadan o qədər seçicilər var ki.... Bunları qazilər və şəhid ailələri ilə bir tutmayın.
Təşviqat prosesində həssas qrup insanlarla da işləmək lazımdır, ancaq bunun öz üsulları, necə deyərlər öz "elmi" var. Öyrənin...Prezidentin sözlərini başa düşməyə çalışın...
Xüsusilə seçki təşviqat prosesində bu qrup həssas insanlardan ustifadə etmək, təmənna güdmək,onların duyğuları ilə oynamaq mənəvi cinayətdir..."
Mətləb
