Azərbaycanın faşist dövlətlə qonşuluğu uzun çəkə bilməz - xəbərdarlıq...
Bəhruz Quliyev: “Bu bəyanat beynəlxalq ictimaiyyətə, Ermənistanı revanşa hazırlayan qüvvələrə bir mesajdır”
Yerli telekanallara müsahibəsində Ermənistanın faktiki olaraq bölgə üçün bir təhdid mənbəyi olduğuna diqqət çəkən Prezident İlham Əliyev qeyd edib ki, müstəqil Ermənistan dövləti, əslində, faşist dövlətdir:
“Çünki əgər bu ölkəyə 30 ilə yaxın faşist ideologiyasının daşıyıcıları rəhbərlik ediblərsə, bu ölkəni onlar elə özləri kimi də formalaşdırıblar. İndi baxın, Ermənistanın birinci prezidentinin irqçi və faşist açıqlamaları nə dərəcədə eybəcərdirsə, bir o qədər də təhlükəlidir. O, etnik təmizləməni bir qürur mənbəyi kimi qələmə verir, azərbaycanlıların öz tarixi dədə-baba torpaqlarından qovulması ilə öyünür”.
Ölkəmizin faşist dövlətlə qonşu olduğunu və faşizm təhlükəsinin sovuşmadığını xatırladan Prezident bildirib: “Ona görə faşizm məhv edilməlidir. Bunu ya Ermənistan rəhbərliyi məhv edəcək, ya da biz məhv edəcəyik. Bizim başqa çarəmiz yoxdur”.
“Əks halda, sonda “Dəmir yumruğa” zərurət yaranacağı qaçılmazdır”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Prezident İlham Əliyevin bu bəyanatı Ermənistanın uzun illər boyu bölgədə yaratdığı təhlükələr, azərbaycanlılara qarşı etnik təmizləmə siyasəti, işğalçılıq, vandalizm və onun idarəetmə strukturundakı ideoloji yanaşmalarla bağlı kəskin tənqidi mövqeyini əks etdirir: “O, Ermənistan rəhbərliyinin siyasətini “faşist ideologiyası” ilə əlaqələndirərək, bu ölkənin uzun müddət ərzində qonşu dövlətlərə qarşı düşmənçilik siyasəti apardığını vurğulayıb. Bu, xüsusən də Qarabağ münaqişəsi kontekstində Ermənistanın ərazi iddiaları və hərbi təxribatları ilə izah edilə bilər. Prezidentin “faşizm məhv edilməlidir” ifadəsi, əslində, regionda təhlükəsizliyin və sülhün təmin edilməsi üçün zərurət olan siyasi dəyişikliklərə çağırış kimi dəyərləndirilir. Bu bəyanat, həmçinin, Azərbaycanın öz milli təhlükəsizliyini qorumaq üçün konkret tədbirlər görmək əzmini ifadə edir. Ermənistan rəhbərliyinə yönəlmiş bu tənqid Azərbaycan dövlətinin regional sabitlik üçün ciddi dəyişikliklər tələb etdiyini göstərir. Prezidentin sözlərinə görə, Ermənistanın hazırkı ideologiyası dəyişmədiyi təqdirdə, Azərbaycan öz müdafiə və təhlükəsizlik tədbirlərini gücləndirməyə davam edəcək. Bu bəyanat eyni zamanda beynəlxalq ictimaiyyətə, Ermənistanı revanşa hazırlayan qüvvələrə bir mesajdır. Yəni onlar da dərk etməlidir ki, Ermənistanın faşizm siyasətində fundamental islahatların zəruriliyinə ehtiyac var. Eyni zamanda, "ya bunu Ermənistan özü, ya da biz məhv edəcəyik" deməklə, İlham Əliyev bölgədə uzunmüddətli sülhün yalnız sağlam, sülhpərvər və müasir idarəetmə yanaşmaları ilə mümkün olduğunu göstərir. Əks halda, sonda “Dəmir yumruğa” zərurət yaranacağı qaçılmazdır”.
Vidadi ORDAHALLI
