Məşhur Məmmədovun namizəd olduğu dairədə belə fakt var - reaksiya...
74 saylı Masallı seçki dairəsindən deputatlığa 7 namizəd var. Onlardan biri də Məşhur Məmmədovdur. Mediada Məşhur Məmmədovun adı ”biznesmen-deputat” kimi hallanır.
Hətta onun “Embawood”un sahibi olduğu ilə bağlı iddialar da var. O, 28 oktyabr 2016-cı ildə keçirilən "Qeyri-neft sahələrinin inkişafı: mebel sənayesi" mövzusunda tədbirdə "Embawood" MMC”nin sədri kimi çıxış edib. 2017-ci ilin sonuna olan məlumata görə isə, Məşhur Məmmədov "Embawood" MMC”də 32 faizlik paya sahibdir.
Maraqlısı odur ki, Məşhur Məmmədovun namizəd olduğu dairədə rəqiblərindən biri məhz “Embawood”un satış meneceri Cavid Xalıqzadədir.
Bu hal süni rəqabət yaratmaq cəhdi kimi dəyərləndirilə bilərmi və seçki barədə nə fikir formalaşdırır?
Təhmasib Novruzov: “Əminəm ki, belə adamlar deputatlığı sadəcə özlərinə mühafizə səngəri kimi görür”
Azad Hərəkatçılar Birliyinin sədri Təhmasib Novruzov “Bakı-Xəbər”ə açıqlamasında bildirdi ki, inkişaf etmiş demokratik ölkələrdə nəinki eyni sahədə çalışan insanların, atanın oğul ilə, ananın övladla, bacının qardaşla, qardaşın qardaşla seçkilərdə rəqabətə girməsi təbii qarşılanır: “Hər bir şəxs özü bir fərddir, cəmiyyətin bir üzvüdür. Bizdə demokratik dəyərlər o qədər də dərinə işləmədiyinə görə, belə hallar süni qəbul olunur. Xüsusilə cəmiyyətdə Məşhur kimi adamlar deputatlığı özlərinə müdafiə səngəri gördüklərinə görə deputat seçilmək istəyirlər. Onların cəmiyyət, xalq üçün nəsə edəcəyini gözləmək sadəlövlük olar. Bu baxımdan Məşhur Məmmədovun özünə yaxın bildiyi şəxslə rəqabət təşkil etməsi səsləri dağıtmaq, parçalamaq, özünün topladığı səslə deputat seçilmək istəyindən xəbər verir. Mən şəxsən nə Məşhuru, nə də Cavidi tanıyıram. Onların nə dərəcədə normal seçkilərə qatılacağını, necə deputat olacaqlarını deyə bilmərəm. Çünki deputat, millət vəkili kimi indiyə kimi cəmiyyətə heç bir xeyir verməyiblər. Əminəm ki, belə adamlar deputatlığı sadəcə özlərinə mühafizə səngəri kimi görür. Onlar üçün xalqı təmsil etmək, hüquqlarını müdafiə etmək yad məsələlərdir. İndiki halda bu da bir seçki üsuludur. Çünki onlar deputatlığı da, seçkini də biznes kimi görürlər”.
Köməkçi: “Hazırda Məşhur Məmmədovun “Embawood”la heç bir əlaqəsi yoxdur”
Biz bu məsələni aydınlaşdırmaq üçün Məşhur Məmmədovun özünün münasibətini öyrənmək istədik. Təəssüflər olsun ki, səylərimiz səmərə vermədi. Məşhur Məmmədovun köməkçisi Xəlil Xəlilov “Bakı-Xəbər”ə açıqlamasında bildirdi ki, belə yalnış məlumatların yayılmasına təəssüf edir: “Ola bilər ki, Məşhur Məmmədovun nə vaxtsa “Embawood”la əlaqəsi olub. Ancaq bu o demək deyil ki, əbədi olaraq onun adı həmin şirkətlə hallanmalıdır. Hazırda Məşhur Məmmədovun “Embawood”la heç bir əlaqəsi yoxdur. İndi sözügedən şirkətin bir nümayəndəsi seçkiyə qatılırsa, bunun Məşhur Məmmədova nə aidiyyəti ola bilər?”
Qeyd edək ki, “Embawood” 1996-cı ildə qurulub. Şirkətin kağız üzərində rəhbəri Elşad Abbasovdur. Bu gün “Embawood” şirkəti Gürcüstan, Qazaxıstan, Ukrayna kimi ölkələr də daxil olmaqla 6 fabrik, tərkibində 200-dən çox mağazası olan qlobal pərakəndə satış şəbəkəsi yaradıb. Qazaxıstanda 26, Gürcüstanda 21 mağaza və Ukraynada 20-dən çox mağaza, dünyanın digər ölkələrində isə “Embawood” şirkətinə məxsus satış nöqtələri vardır. Azərbaycanda toplam sahəsi 85 000 kv.metrdən çox olan 141 mağazası fəaliyyət göstərir.
Onu da bildirək ki, Məşhur Məmmədov VI çağırış Milli Məclisin deputatı olub. O, həm də Azərbaycan Mebel İstehsalçıları Assosiasiyasının sədridir.
Bildirilir ki, Məşhur Məmmədov bir müddət əvvəl "Embawood" MMC”dəki hissələrini təhvil verib. O hazırda “Perla” mağazalar şəbəkəsi, “Foriella” istehsal şirkəti və “Ofissa” ofis mebeli şirkətinin sahibidir.
Məhəmmədəli QƏRİBLİ
