Bakı forumunda "körpüdən" danışıldı - Avropa isə körpüləri "yandıraraq gedir"...
Tural İsmayılov: “Bu gün parçalanmış dünyanın əsasını qoyan elə məhz Avropa Birliyi və özəlliklə Avropa Birliyinin Qərbi Avropadan olan ölkələridir”
Albaniya Prezidenti Bayram Beqay (Bajram Begaj) Bakıda “Parçalanmış dünyanın bərpası” mövzusunda keçirilən XI Qlobal Bakı Forumunda çıxışı zamanı bəyan edib ki, parçalanmış dünyanın bərpası üçün körpülər salınmalıdır:
"Avropadakı problemlər qapımızın kandarındadır. Biz təhlükəsizliklə bağlı gücümüzü birləşdirməliyik. Albaniya NATO-nun qabaqcıl tədbirlərinə töhfə verən ölkə olub. Albaniya dialoq və diplomatiyanı təşviq etməkdə ön sıralarda yer alıb".
B.Beqay hesab edir ki, gələcəyin yolu çiçəklənən, sülh içində olan Avropadan keçir: “Biz qonşuluq siyasətinin davam etdirilməsinə həm ölkəmizdə, həm də ölkəmizdən kənarda hazırıq. Artıq vaxt yetişib, dostluq, əməkdaşlıq yolunda irəliləməliyik. Parçalanmış dünyanın bərpası üçün körpülər salmalıyıq. Bu da sülhü təşviq edə bilər”.
Albaniyanın prezidenti belə bir fikir irəli sürüb ki, müasir problemlərin həllinə doğru körpü salmalıyıq. Bu fikir marağımızı çəkdi. Avropa buna uyğun siyasət aparır, yoxsa aparmır? Müasir Avropanın siyasəti dünyanın problemlərinə, parçalanmış dünyanın birləşdirilməsinə körpü sala bilirmi? Məsələn, Avropa Birliyinin Ermənistana dəstəyi, Azərbaycana düşmənçiliyi, ayrıseçkilik siyasəti və sair mövcuddur. Bu halda Albaniya prezidentinin bəyan etdiyi körpünün salınması mümkün olarmı?
“Mən inanmıram ki, Avropanın siyasəti parçalanmış dünyanın birləşməsinə xidmət etsin”
Politoloq Tural İsmayılov “Bakı-Xəbər”ə şərhində “Əvvəla qeyd edim ki, Albaniya Mərkəzi Şərqi Avropa ölkələri içərisində adekvat mövqeyi olan ölkələrdən biridir. Albaniya NATO-nun üzvü kimi çox fəal ölkə olsa da, eyni zamanda heç vaxt Qərbin ikili standartlarının oyuncağına çevrilmir. Məhz bütün bu mövqelərinə görə bu gün görürük ki, Avropa İttifaqının tərkibində Fransa və Fransaya bağlı dairələrin Mərkəzi və Şərqi Avropa ölkələrinə qarşı da bir ayrı-seçkiliyi var. Bu ayrıseçkiliyin də ən bariz nümunəsini Avropa İttifaqının Albaniyaya yanaşmasında görürük. Bu baxımdan, Albaniyanın prezidenti Bayram Beqayın Bakıda “Parçalanmış dünyanın bərpası” mövzusunda keçirilən XI Qlobal Bakı Forumu çərçivəsində səsləndirdiyi fikirlər bu baxımdan müstəsna əhəmiyyətə malikdir. Doğrudan da bu gün parçalanmış dünyanın əsasını qoyan elə məhz Avropa Birliyi və özəlliklə Avropa Birliyinin Qərbi Avropadan olan ölkələridir. Başında Fransa olmaqla, bir çox dövlətlər nəinki dünyanın fərqli coğrafiyalarına, elə Avropa İttifaqının öz daxilinə qarşı da yanaşmada çox yanlış mövqelər ortaya qoyur”-deyə bildirdi.
T.İsmayılovun sözlərinə görə, əlbəttə, Avropada parçalanmış dünyanın əleyhinə siyasət aparılır: “Avropa elə dünyanı parçalayan siyasətin mərkəzində yer alır. Mən inanmıram ki, Avropanın siyasəti parçalanmış dünyanın birləşməsinə xidmət etsin. Əslində elə XI Qlobal Bakı Forumu çərçivəsində də görürük ki, parçalanmış dünyanı bu gün birləşdirən qüvvələr məhz Mərkəzi Asiya, türk dövlətləri, Azərbaycan, Türkiyə və Şərqi Avropa ölkələridir. Burada da Bolqarıstan, Albaniya, Serbiya, Bosniya və Herseqovina, Macarıstan və digər ölkələr xüsusi əhəmiyyətə malik olar deyə düşünürəm. Bu baxımdan, günümüzdə Avropa Birliyinin çox dərin bir çöküşü yaşanır və bunu hamı görür”.
İradə SARIYEVA
