Taksilərin sayı sürətlə azalır...
Elməddin Muradlı: “Qaydaların tətbiqindən sonra 67 min taksi sayı 23 minə enib”
Azərbaycanda taksilərin sayı 3 dəfəyə yaxın azalıb. Bu barədə "Nəqliyyat sahəsində 2024-cü ildə həyata keçirilən tədbirlər və 2025-ci il üçün planlar" barədə mətbuat konfransında məlumat verilib.
Bildirilib ki, 2023-cü ildə taksi sifarişi operatorları tərəfindən istifadə olunan taksilərin sayı 67 mindən artıq idisə, hazırda bu göstərici 23 min ədəd təşkil edir. Yəni belə taksilərin sayı 44 min ədəd azalıb.
Qeyd edək ki, ötən il iyulun 1-dən Nazirlər Kabineti "Müntəzəm və taksi minik avtomobili ilə sərnişin daşımalarında istifadə olunan avtonəqliyyat vasitələrinin texniki göstəriciləri, daxili və xarici tərtibatına dair Tələblər"i müəyyən etdi. Sənədə görə, buraxılış tarixindən 15 ildən artıq müddət keçən minik avtomobilləri taksi kimi sərnişin daşımalarında istifadə oluna bilməz. Həmin tarixdən taksi fəaliyyətinə icazə almaq üçün avtomobillərin yaşı 7 ildən az olmalıdır. Tələblərdə avtomobilin texniki göstəriciləri ilə bağlı başqa məsələlər də yer alırdı. Bütün bu dəyişikliklərdən sonra taksilərin sayında azalma, qiymətlərdə isə artım baş verdiyi bildirilir
Görəsən, taksilərin azalmasına təsir edən əsas faktorlar nələrdir?
“Taksilərlə bağlı aparılan islahatlar nəqliyyat idarəedilməsi baxımından dəyişib”
Nəqliyyat sahəsi üzrə ekspert Elməddin Muradlı “Bakı-Xəbər”ə şərhində bildirdi ki, taksilərlə bağlı aparılan islahatlar nəqliyyat idarəedilməsi baxımından dəyişib: "Vətəndaş istəyir ki, düyməni basan kimi taksi qapıda dayansın. Sürücü istəyir ki, təzə, yaxud da köhnə avtomobil olsun, təki ona bu fəaliyyətlə məşğul olmağa icazə verilsin. Bu məsələlərdə yanaşma fərqlidir. Qaydalar müəyyənləşib, normal xidmət və keyfiyyətin artırılması və s. kimi məsələlərə diqqət artırılıb. Qaydaların tətbiqindən sonra 67 min taksi sayı 23 minə enib. 44 min taksi isə kənarda qalıb. Taksi parkı yenilənir. Avtomobillərin istehsal ili 15 ildən 7 ilə düşüb. 23 min taksinin istehsal ili 7 ildən yuxarı deyil. Bu, yaxşı göstəricidir. Rəng məsələsi də oturuşur, vahid rəng sistemi tətbiq edilir. Əsasən ağ rəngə üstünlük verirlər. Ancaq vətəndaşlar taksi fəaliyyətindən məmmundurmu? Yox. Çünki qiymətlərin bahalaşmasından şikayət edirlər, keyfiyyət pisdir və s. Sürücünün mövqeyindən baxanda isə qiymət bu gün üçün normaldır. Niyə? Çünki 25-30 minlik avtomobillə xidmət göstərir. Avtomobil istismar olunduqca bunun qiyməti aşağı düşür, təmir xərcləri yaranır. Bu adam nə qədər pul qazanmalıdır ki, həm evinə çörəkpulu aparsın, həm də avtomobilin itən dəyərini kompensasiya etsin?"
Günel CƏLİLOVA
