Şəhid ailələrinə və müharibə veteranlarına mənzil müjdəsi verildi...
Şəhid ailələrinin və Qarabağ qazilərinin sosial müdafiəsinin gücləndirilməsi, rifah halının daim yaxşılaşdırılması Prezident İlham Əliyevin rəhbərliyi ilə həyata keçirilən dövlət siyasətinin prioritet istiqamətlərindən biridir.
Bu kateqoriyadan olan insanlar həmişə dövlətin qayğısı altındadır. Heç şübhəsiz, Vətənin müdafiəsində, torpaqlarımızın işğaldan azad edilməsində canından və sağlamlığından keçən insanların ailəsinə xüsusi diqqət və qayğı göstərilməsi həm dövlətin, həm də cəmiyyətin vəzifəsi, borcu və şərəf işidir. Dövlətin gördüyü sosial müdafiə tədbirləri çoxşaxəlidir, şəhid ailələri 20 adda, müharibədə əlil olan şəxslər 14 adda təminat və sosial qayğı ilə əhatə olunublar.
Prezident İlham Əliyev fevralın 14-də keçirilən andiçmə mərasimindəki nitqində bildirib ki, bu kateqoriyadan olan insanların 100 faiz evlərlə təmin edilməsi prosesi sürətlə gedir, o cümlədən bu il və gələn il bu işlər görüləcək.
Prezident İ.Əliyev qeyd edib ki, şəhid ailələrinin mənzillə təminatı bu ildən həyata keçiriləcək.
Şəhid Vüsal Vəliyevin qardaşı Elyar İslamoğlu: "Şəhid ailələrinin mənzil problemi dövlətin xüsusi nəzarətindədir"
Şəhid mayor Vüsal Vəliyevin qardaşı Elyar İslamoğlu "Bakı-Xəbər"ə açıqlamasında bunları qeyd etdi: "Dövlətimiz tərəfindən şəhid ailələrinə xüsusi diqqət və qayğı var. Şəhid ailələrinin mənzil problemi həll edilir. Bu ailələrin daha yaxşı şəraitdə yaşaması üçün lazımi işlər görülür. Şəhidlərimizin yeni doğulmuş və doğulacaq körpələrinin analarına zəruri xərclərin qarşılanması məqsədilə müəyyən məbləğdə yardım köçürülür. Həmçinin, şəhid övladlarının adına bankda hesab açılır. 5 000 manatlıq vəsait yatırılır. Hesab 16 yaşdan sonra həmin uşaq tərəfindən istifadə oluna bilər. Bununla yanaşı, şəhid valideynlərinin müalicəsi də Yaşat Fondu tərəfindən qarşılanır".
E.İslamoğlu onu da əlavə etdi ki, şəhid ailələrinin mənzil problemi dövlətin xüsusi nəzarətindədir: "Uzun müddət kirayədə yaşayan, yaşayış şəraiti yaxşı olmayan şəhid ailələri mənzillə təmin olunur. Bu kimi addımların gələcəkdə də davam etməsi cənab Prezident İlham Əliyev tərəfindən səsləndirilir".
Şəhid Nəzər Əzizovun anası Cəmafət Əzizova: "Prezident İlham Əliyev şəhid və qazi ailələrinə diqqət ayırır"
Şəhid Nəzər Əzizovun anası Cəmafət Əzizova "Bakı - Xəbər"ə şərhində bildirdi ki, Prezident İlham Əliyev şəhid və qazi ailələrinə diqqət ayırır: "Var olsun dövlətimiz ki, bizləri unutmur. Allah bütün şəhidlərimizə rəhmət eləsin, qazilərimizə can sağlığı versin”.
Rasim İsgəndərov: “Şəhid ailələri və müharibə əlillərinin mənzillərlə, evlərlə təmin edilməsi təqdirəlayiq haldır və onlara verilən dəstək bununla məhdudlaşmır"
Hərbçi ekspert Rasim İsgəndərov “Bakı-Xəbər”ə açıqlamasında bildirdi ki, şəhid ailələri və müharibə əllilərinin mənzillərlə, evlərlə təmin edilməsi təqdirəlayiq haldır və onlara verilən dəstək bununla məhdudlaşmır: "Şəhid ailələrinin və müharibə əlillərinin övladları universitetlərə qəbul olduqda belə onların təhsil haqqı dövlət tərəfindən ödənilir. Həmin kateqoriyadan olanların övladlarının asudə vaxtlarının təşkili üçün dövlət müxtəlif proqramlar həyata keçirir. Sevindirici haldır ki, təkcə paytaxtda deyil, regionlarda yaşayan şəhid ailələri və müharibə əlilləri də bu qayğı ilə əhatə olunub".
Günel CƏLİLOVA
