Xaricdən ideoloji basqılar artacaq - nə edəcəyimizi Prezident dedi...
Məhərrəm Zülfüqarlı: “Azərbaycana qarşı xarici ideoloji təsirlərin artması ölkəmizin güclü olması ilə bağlıdır”
Prezident İlham Əliyev fevralın 14-də keçirilən andiçmə mərasimindəki çıxışında xaricdən gələn ideoloji basqılarla mübarizənin daha da gücləndirilməsini zəruri hesab etdi:
“Bütün mümkün olan potensial risqlər ölkəmizin hüdudlarından kənarda yerləşir və formalaşır. Təhlükəsizlik tədbirlərinin bundan sonra da görülməsi vacib vəzifə kimi qarşıya qoyulur. Biz özümüzü təhlükəsizlik tədbirlərinin gücləndirilməsi və sərhədlərimizin möhkəmləndirilməsi nəticəsində həm fiziki risklərdən qorumalıyıq, həm də özümüzü ideoloji risklərdən qorumalıyıq. İdeoloji risklər sərhəd tanımır, xüsusilə indiki şəraitdə. Ona görə burada əsas vəzifə gənc nəslin vətənpərvərlik ruhunda, milli ənənələr ruhunda tərbiyə olunmasıdır. Bu məsələyə çox ciddi yanaşmalıyıq və mən bunu əsas vəzifələrdən biri kimi qarşıya qoyuram. Gənc nəslin tərbiyə edilməsi bizim gələcəyimizin təmin edilməsi deməkdir”.
Maraqlıdır, xaricdən ideoloji basqıların artması nə ilə bağlıdır?
“Bütün ideoloji sahədə çalışan qurumlar Prezidentin bu çıxışından nəticə çıxarmalıdır”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-prezidenti, professor Məhərrəm Zülfüqarlı hesab edir ki, xaricdən ideoloji basqı risqi hər zaman olub: “İkinci Dünya müharibəsindən sonra “soyuq müharibə” başladı. O vaxt belə bir məsələ ortaya qoyulmuşdu ki, indi artıq şüurlar uğrunda mübarizə gedir. Yəni insanların şüuru uğrunda mübarizə “isti” müharibədən daha üstündür. İndiki dövrdə bu, daha da güclənib. Sosial şəbəkələrin artması ilə ideoloji təsir altına düşmə risqləri artıb. Qapalı ölkələrdə artıq əvvəlki kimi məlumatları gizlətmək məsələsi olmadığına görə, insanların məlumat əldə etməsi çox asan olub. Qapalı rejim olan SSRİ-də məlumatlar, problemlər gizlədilirdisə, indi heç bir ölkədə artıq bunu gizlətmək mümkün deyil. Bundan da istifadə edən xarici mərkəzlər hər bir ölkəyə ideoloji təsir etməyə çalışırlar. Əvvəlki illərlə müqayisədə bu proses getdikcə güclənir. Azərbaycana qarşı xarici ideoloji təsirlərin artması ölkəmizin güclü olması ilə bağlıdır. Məsələ ondadır ki, ölkəmiz indiki dövrdə əvvəlkindən qat-qat güclü bir dövlətə çevrilib. Özünün ərazi bütövlüyünü öz gücünə bərpa edib. Bax bu səbəblərdən ölkəmizə ideoloji basqıların artacağı gözlənilir. Çünki Azərbaycanı istəməyən xarici dairələr bunu həzm edə bilmir. Ona görə də ideoloji müstəvidə Azərbaycanı sarsıtmaq istəyirlər. Biz nəzərə almalıyıq ki, ideoloji silah hərbi silahlardan daha təhlükəlidir. O üzdən, Azərbaycanı onların diqtəsi ilə hərəkət edən bir dövlətə çevirmək istəyirlər. Bununla əlaqədar müxtəlif insanlara qrant verirlər, demokratiya pərdəsi altında bəzi təşkilatlara dəstək verirlər. Ona görə də Prezident çıxışında xarici ideoloji təsir məsələsini xüsusi vurğuladı. Çünki hər bir ölkənin problemi olduğu kimi, Azərbaycanın da problemləri var. Bu problemlərdən sui-istifadə edərək Azərbaycana yönəlik ideoloji basqıları artırmağa çalışırlar. Hesab edirəm ki, bütün ideoloji sahədə çalışan qurumlar Prezidentin bu çıxışından nəticə çıxarmalıdır. Öz işlərini daha yüksək səviyyədə qurmalıdılar ki, Azərbaycan vətəndaşına xarici təsirlərin miqyası azalsın. Yaxud da onlara layiqli cavab verilsin”.
Vidadi ORDAHALLI
