Astaranın Heydər Əliyev Mərkəzində antinarkotik tədbiri keçirildi
“Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın icrası ilə əlaqədar Astara rayon Heydər Əliyev Mərkəzində rayondakı N.Kərimov adına Ərçivan qəsəbə 3 saylı tam orta məktəbin müəllim və şagirdlərinin iştirakı ilə “Sağlam gələcək naminə narkomaniyaya yox deyək!” mövzusunda tədbir keçirilib.
Tədbirin əvvəlində “Narkomaniyaya yox deyək” mövzusunda maarifləndirici video-çarx göstərilib.
Ardınca mərkəzin baş fond mühafizi Elza Kazımova geniş məruzə edib: - Narkotiklərin qanunsuz dövriyyəsi və narkomanlıq bu gün dünyanı narahat edən əsas problemlərdən biridir. Onun yaratdığı fəsadlar cəmiyyətin maddi-texniki və intellektual potensialının aşağı düşməsinə, genefondun məhvinə və bir çox mənfi hallara gətirib çıxarır.
Dövlət orqanlarının və ictimai birliklərin fəaliyyətini əlaqələndirmək üçün Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası yaradılmış, narkotiklərin qanunsuz dövriyyəsinə və narkomanlığa qarşı mübarizə sahəsində dövlətin strateji kursunun əsasları müəyyən olunub. Respublikada narkotiklərin qanunsuz dövriyyəsi, narkomanlıqla mübarizə sahəsində bir sıra təşkilati-hüquqi, əməli-praktiki tədbirlər həyata keçirilmiş və narkotiklərlə mübarizə üzrə beynəlxalq təşəbbüslərdə iştirak daha intensiv xarakter almışdır. Azərbaycan Respublikasının Prezidenti İlham Əliyevin 22 iyul 2019-cu il tarixli Sərəncamı ilə "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı"nın təsdiq edilməsi görülən işlərin davamıdır.
Mövzu ətrafında çıxışlarda isə bildirilib ki, narkomaniya ilə mübarizə nəinki dövlətin, həmçinin bu dövlətdə yaşayan hər bir fərdin vətəndaşlıq borcudur. Çıxışlardan sonra şagirdləri daha çox düşündürən suallara ətraflı cavab verilib.
Yekunda iştirakçılar Astara rayon Heydər Əliyev Mərkəzinin elektron kitabxanasında saxlanılan kitablardan təşkil olunmuş sərgiyə baxıblar.
Zəfər ORUCOĞLU
Azərbaycan Jurnalistlər Birliyinin üzvü
