Qərb Gürcüstanda İvanişvilinin "məhvinə" qərar verdi...
Bir neçə aydır ki, dünyanın gündəmində olan qonşu Gürcüstanda hələ də dövlət çevrilişi və vətəndaş müharibəsi təhlükəsi aradan qalxmayıb. Bunu şərtləndirən əsas səbəblərdən biri Qərbin Gürcüstanın daxili işlərinə müdaxilə cəhdlərini davam etdirməsidir. Belə bir vaxtda ABŞ Gürcüstanın hakim partiyası olan “Gürcü Arzusu”nun qurucusu, keçmiş baş nazir Bidzina İvanişviliyə maliyyə sanksiyaları tətbiq edib.
“Gürcü Arzusu” partiyasının liderləri deyirlər ki, İvanişvili “qlobal müharibə partiyası”nın təsiri altında olan amerikalı siyasətçilər və bürokratlarla görüşdən maliyyə şantajı səbəbiylə yayınır. Partiya “Credit Suisse” bankında İvanişviliyə aid 2 milyard dolların bloklanmasını qeyri-rəsmi sanksiya adlandırıb. “Gürcü Arzusu” Qərbə qarşı “qlobal müharibə partiyası” ifadəsini işlədir. Bu ilin oktyabrında “Imedi” telekanalına müsahibəsində İvanişvili Sinqapurda məhkəmə prosesinin müsbət nəticələndiyini deyib. Onun sözlərinə görə, bu nəticədən sonra Qərb siyasətçiləri ilə görüşlərə heç bir maneə qalmayıb. Daha sonra o, Fransa prezidenti Emmanuel Makronla telefonla da danışıb. Milyarderin sərvətinin hansı hissəsinin hələ də Qərb ölkələrində olduğu bilinmir. Daha əvvəl onun özünə aid incəsənət əsərlərini Londondan və Nyu-Yorkdan çıxardığı barədə məlumatlar yayılmışdı. “Bloomberg”in məlumatına görə, İvanişvilinin sərvəti son bir il ərzində 955 milyon dollar artaraq 7.6 milyard dollara çatıb. Bu fonda Gürcüstanın baş naziri İrakli Kobaxidze “Gürcü Arzusu” partiyasının təsisçisi və fəxri sədri Bidzina İvanişviliyə qarşı sanksiyaları pisləyib. Kobaxidze qeyd edib ki, partiyanın təsisçisi ölkənin maraqlarına xidmət etdiyinə görə artıq faktiki sanksiyalar altında idi, indi isə rəsmi məhdudiyyətlərə məruz qalıb: “Xüsusi heç nə yoxdur. Bu, sadəcə olaraq, ölkəmizin milli maraqlarının qorunmasına görə verilən "mükafatdır”. Onun sözlərinə görə, İvanişvili uzun müddətdir, sanksiyalarla şantaj edilib, indi isə belə imkan olmayacaq. Gürcüstanın baş nazirinin birinci müavini, iqtisadiyyat və davamlı inkişaf naziri Levan Davitaşvili baş verənlərlə bağlı bildirir: “Gürcüstana qarşı tətbiq edilən sanksiyalar ölkə iqtisadiyyatına investisiyaların cəlb edilməsinə mənfi təsir göstərsə də, ABŞ ilə münasibətlərin yenidən qurulması səbəbindən vəziyyət dəyişə bilər”. Onun sözlərinə görə, Qərblə münasibətlərin pisləşməsi fonunda ABŞ və Avropa ölkələrində hökumət üzvlərinə və ayrı-ayrı məmurlara qarşı şəxsi sanksiyalar tətbiq edilir: “Bundan əlavə, Avropa Komissiyası diplomatik pasportlardan istifadə edən Gürcüstan vətəndaşlarının Aİ-yə girişinin qadağan edilməsini tövsiyə edib. Təbii ki, sanksiyalar mənfi təsir göstərəcək, amma eyni zamanda düşünürəm ki, sonradan münasibətlərimiz keyfiyyətcə daha yüksək səviyyəyə qalxacaq”. O qeyd edib ki, Qərb Gürcüstanın hazırkı hakimiyyətini demokratiyadan geri çəkilməkdə, anti-Qərb ritorikasında və konspirasiya nəzəriyyələrinin yayılmasında ittiham edir: “Bu ittihamların heç bir əsası yoxdur. Gürcüstan demokratik yolla inkişaf edir və Avrointeqrasiyanı lazımi səviyyədə davam etdirir”.
Hazırda əsas vasitələrdən biri kimi Qərb prezident Salome Zurabişvili faktorundan istifadə edərək də vəziyyəti qarışdırmağa can atır. Sözügedən məsələnin necə sonuclanacağına isə dekabrın 29-da birdəfəlik dəqiqlik gətiriləcək. Xatırladaq ki, dekabrın 29-da Salome Zurabişvilinin prezident kimi səlahiyyət müddəti başa çatır və o, öz postunu tərk etməlidir. Zurabişvili isə bununla razılaşmır və vəzifəsindən getməyəcəyini iddia edir. Dekabrın 29-da yeni seçilmiş prezident Mixail Kavelaşvilinin andiçmə mərasimində nə edəcəyi ilə bağlı suala isə Zurabişvili maraqlı cavab verib: “Prezidentin andiçmə mərasiminin hüquqi qüvvəsi yoxdur, ona görə də mən prezident olaraq qalıram və fəaliyyətimi davam etdirirəm". O qeyd edib ki, bu barədə bazar günü elan edəcək, çünki hakim partiya onun planlarından əvvəlcədən xəbərdar olmamalıdır. Gürcüstanın baş naziri İrakli Kobaxidze məsələ ilə bağlı bildirib ki, Zurabişvilinin müstəqil şəkildə prezident iqamətgahını tərk edəcəyinə ümid edir, çünki əks təqdirdə, onu zorla çıxarmaq lazım gələcək. Belə bir vaxtda "Caliber" portal da maraqlı məlumat yayıb. Qeyd olunur ki, xarici qüvvələr Gürcüstanda iki prezidentin - səlahiyyət müddəti başa çatan Salome Zurabişvili və yeni seçilmiş Mixail Kavelaşvilinin mövcudluğundan maksimum yararlanmağa çalışır. Zurabişvili ultimatum verərək hakimiyyətdən səlahiyyət müddətinin başa çatdığı dekabrın 29-na qədər yeni seçkilərin tarixini təyin etməyi tələb edib. Vurğulanır ki, Qərbdə keçən həftəsonu prezident kimi son günlərini keçirən Salome Zurabişviliyə dəstəyin təşkilinə böyük vəsait ayrılıb. Bütün qərbyönlü QHT-lər küçələrdə Zurabişviliyə guya "milli dəstək" illüziyası yaratmaq üçün öz əməkdaşlarını və tərəfdarlarını səfərbər ediblər. Zurabişvili ölkədə yeni parlament seçkisinin təyin edilməyəcəyi təqdirdə hakimiyyəti "rejimin süqutu" ilə hədələyib. Gürcü ekspert David Çikelidze bildirib ki, Salome Zurabişvili reallıq hissini çoxdan itirib, o, gürcü xalqına deyil, kollektiv Qərbə xidmət edir: “Oktyabrın 26-da gürcü xalqı öz seçimini edib, bunu heç kimin yoxlamağa, sorğu-sual etməyə haqqı yoxdur. Salome Zurabişvilinin tələbi və rejimin dağılması təhlükəsi ilə bağlı fikirləri ciddi deyil. Çünki bu gün Gürcüstanda rejim yox, demokratik yolla seçilmiş hökumət var. Dekabrın 29-da Salome Zurabişvili prezident iqamətgahı ilə vidalaşmaq məcburiyyətində qalacaq ki, bu da qütbləşmənin zəifləməsinin başlanğıcı olacaq. Həmin vaxtdan sonra da Gürcüstanda daxili gərginlik xeyli düşəcək və bu gün mövcud olan dalğalanmalar azalmağa doğru gedəcək”.
Tahir TAĞIYEV
