Rostovdan gəlmiş bir məlumat Qroznıdakı təyyarə qəzası məsələsini dolaşdırdı...
Ramil Məmmədli: “Diqqəti əsas məsələdən yayındırmaq üçün bunu ortaya atıblar”
AZAL-ın təyyarəsində oksigen balonunun partlaması barədə məlumat Rusiyadan verilib. Bu barədə Qazaxıstanın Nəqliyyat Nazirliyi məlumat yayıb.
“AZAL-ın təyyarəsində oksigen balonunun partlaması barədə məlumat 10.53-də Rostovdan uçuş rəhbərindən daxil olub. Belə ki, Rostovun uçuş rəhbəri Aktau qülləsinin uçuş rəhbərinə əlavə məlumat verib ki, təyyarənin sərnişin salonunda oksigen balonu partlayıb, sərnişinlər huşlarını itiriblər və gələn kimi reanimasiya tələb edilir. Bu məlumat əsasında bütün xilasetmə xidmətlərinə operativ məlumat verilib. Brifinqdə uçuş rəhbəri Rostovun məlumatları əsasında hadisələrin xronologiyası açıqlanıb”, - Nazirlikdən bildirilib.
Maraqlıdır, bu oksigen balonu məsələsi nə məqsədlə quraşdırıla bilərdi?
“Oksigen balonunu yalnız atəşə atsanız partlaya bilər”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, diqqəti əsas məsələdən yayındırmaq üçün bunu ortaya atıblar: “Fakt odur ki, təyyarə zərbəyə məruz qalıb. Yəni vurulub. Bütün versiyalar, şahid ifadələri buna işarə edir. Bu yanlışı etiraf etmək əvəzinə, diqqəti başqa istiqamətə yönəltməyə çalışırlar. Yaxınlıqda bir neçə hava limanı ola-ola nəyə görə təyyarə Aktauya yönəldildi? Çünki bununla bağlı izi itirmək istəyirdilər, amma alınmadı. Məsələnin texniki tərəfinə gəldikdə isə, təyyarənin göyərtəsində başqa hansısa silindrlərin olması ehtimalı yoxdur. Çünki sistem elə qurulub. Başqa bir tərəfdən, təyyarədə olan yanğınsöndürənlərsə partlamır. Ona görə ki, bir oksigen balonunu yalnız atəşə atsanız partlaya bilər. Ona hökmən kənar müdaxilə lazımdır. Çünki təyyarələrdəki oksigen balonları daha böyük yüklər altında sınaqdan keçirilir. Üstəlik, qaz balonunun partlaması faktiki olaraq baş vermiş olsaydı, bu, fövqəladə vəziyyətə gətirib çıxara bilərdi, qəzaya yox. Çəkilən videolarda bu özünü göstərərdi. Deməyim odur ki, bunun təyyarənin səthinə elə bir təsiri olmur. Üstəlik, oksigen balonunun partlaması yanğın törədir. Amma qəza anında çəkilən videolardan aydın olur ki, göyərtədə hər hansı bir yanğın yoxdur. Ona görə də təyyarədə oksigen balonunun partlaması ilə bağlı ortaya atılan fikirlər tamamilə əsassızdır. Yəni əsas məsələdən, qəzanın əsl səbəblərindən diqqəti başqa istiqamətə yönəltmək üçün belə feyk məlumatları ortaya atırlar. O baxımdan hesab edirəm ki, deyilənlərin əsası yoxdur”.
Vidadi ORDAHALLI
