Borrel “təcavüzkar Ermənistanın baş naziri” kimi danışdı...
Bəhruz Quliyev: “Biz bilirdik ki, qazandığımız qələbəni çoxlarının gözü götürməyəcək”
Avropa İttifaqının şərəfsiz xarici işlər və təhlükəsizlik siyasəti üzrə ali nümayəndəsi Jozep Borrel gethagetdə yenə Azərbaycana pisliyindən əl çəkmir.
“Prezident Əliyevin son ərazi iddiaları böyük narahatlıq doğurur. Ermənistanın ərazi bütövlüyünün hər hansı pozulması yolverilməzdir və Azərbaycanla münasibətlərimiz üçün ciddi nəticələrə səbəb olacaq”.
Bunu Borrel Aİ Xarici İşlər Nazirləri Şurasının iclasının yekunlarına dair mətbuat konfransında çıxış edərkən deyib.
Onun fikrincə, Aİ üzvü olan ölkələr hesab edir ki, Azərbaycan Ermənistanla substantiv danışıqlara və münasibətlərin normallaşmasına qayıtmalıdır. O, həmçinin qeyd edib ki, Aİ ölkələri diplomatları qovulmuş (Azərbaycandan) Fransa ilə həmrəylik ifadə edir.
Borrel lap Paşinyan kimi danışır. Bu dərəcədə həyasızlıq nə deməkdir?
“Borrelin dili ilə söylənilənlərin bizim üçün heç bir əhəmiyyəti yoxdur”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev hesab edir ki, Borrelin son bəyanatı bu gün Avropa İttifaqının 30 il ərzində ATƏT-in oynadığı oyunu təkrarladığını göstərir: “Biz bilirdik ki, qazandığımız qələbəni çoxlarının gözü götürməyəcək. Borrelin dedikləri bunun açıq təzahürüdür. Fikrimcə, onların problemi reallığı anlaya bilməmələrindədir. Başa düşməlidirlər ki, hətta ən zəif vaxtlarımızda torpaqlarımızın işğalını bizə qəbul etdirə bilməyiblər, iradəmizi sındırmağı bacarmayıblar. İndi də Borrelin dili ilə söylənilənlərin bizim üçün heç bir əhəmiyyəti yoxdur”.
Politoloqun fikrincə, Avropa İttifaqında işğalçıya açıq şəkildə dəstək verən və Azərbaycana qarşı qərəzli mövqe ortaya qoyan Fransa, həmçinin onun əlaltısı olan dövlətlər var: “Rəsmi Paris Ermənistanı silahlandırmaq yolunu seçib. Bu, eyni zamanda revanşizmə dəstək, Üçüncü Qarabağ müharibəsinə Ermənistanı təhrik etmək deməkdir. Onu da nəzərə almaq lazımdır ki, Fransa Avropa İttifaqının siyasi qanadında əsas dövlətdir və o, Cənubi Qafqazda sülh və təhlükəsizlik üçün deyil, müharibənin başlanması üçün çalışır. Avroittifaq Azərbaycanla Ermənistan arasında vasitəçi olsa da, Fransanın qərəzli yanaşması səbəbindən Aİ-nin vasitəçiliyi faydasız hala gəldi. Tərəflər arasında sülhyaratma prosesinə ciddi zərbə vuruldu. Bundan əlavə, Laçına getməklə bağlı Avropa Şurası Parlament Assambleyasının əsassız iddialarını da xatırlayırıq ki, son yanaşmalar da Azərbaycana qarşı uzunmüddətli qərəzin davamıdır. Əgər AŞPA neytral münasibət sərgiləyirsə və obyektivdirsə, Azərbaycan ərazilərini minaladığı üçün nəyə görə indiyədək Ermənistana heç bir təzyiq göstərməyib?! Bu məsələ, əslində, daha böyük problemdir. Çünki müharibə başa çatandan sonra belə azərbaycanlı dinc sakinlər minaların qurbanı olublar. 2020-ci ildən bəri mina qurbanların sayı 340 nəfəri ölüb”.
Baş redaktor sonda onu da əlavə edib ki, Azərbaycan dövlətinin kiminsə ərazisinə iddiası yoxdur. Hələ Vətən müharibəsi dövründə Prezident İlham Əliyev bəyan etmişdi ki, bizim kimsənin torpağında gözümüz yoxdur.
Vidadi ORDAHALLI
