Cozef Baydenin Almaniyaya səfəri başlayıb
ABŞ Prezidenti Cozef Baydenin Almaniyaya səfəri başlayıb. Almaniya mediasının yazdığına görə, ABŞ prezidentinin təyyarəsi – “Air Force One” oktyabrın 17-də gecə saatlarında Berlin aeroportuna enib. Cozef Bayden bu gün “Bellevue” sarayında Almaniya Prezidenti Frank-Valter Ştaynmayer ilə görüşəcək. Görüş zamanı ABŞ Prezidentinə Almaniyanın Böyük Xaç Ordeni təqdim ediləcək.
Federal Prezident Ofisinin açıqlamasında Baydenin “Almaniya-Amerika dostluğuna və Transatlantik ittifaqına” xidmətlərinə görə təltif olunduğu bildirilib. Birləşmiş Ştatların dövlət başçısı daha sonra Almaniyanın Federal Kansleri Olaf Şolts ilə görüşəcək.
Səfər çərçivəsində Olaf Şolts, Cozef Bayden, Fransa Prezidenti Emmanuel Makron və Böyük Britaniyanın Baş naziri Keir Starmer arasında dördtərəfli formatda görüşün keçirilməsi də planlaşdırılır. Cozef Baydenin Berlindəki görüşlərində Ukraynaya dəstək verilməsi, Yaxın Şərqdə vəziyyət və digər məsələlərin müzakirə olunması gözlənilir. ABŞ Prezidentinin səfəri oktyabrın 18-də günortadan sonra başa çatacaq.
Mətləb
