2 böyük diaspor Gürcüstan parlament seçkilərini eyni maraqla izləyir...
İlyas Hüseynov: “Azərbaycan və Gürcüstan strateji müttəfiqlər kimi öz gələcəklərini formalaşdırıblar”
Tarixən Azərbaycanla Gürcüstan arasında mövcud olan mehruban qonşuluq və dostluq münasibətləri bu gün də uğurla davam edir. İki ölkə arasındakı səmimi dostluq və əməkdaşlıq əlaqələri Gürcüstanda yaşayan azərbaycanlıların, Azərbaycanda yaşayan gürcülərin həyatında müsbət rol oynayır. Tarixi ənənədən qaynaqlanan iki xalqın dostluğu indi də öz axarındadır.
Oktyabrın 26-da Gürcüstanda keçiriləcək parlament seçkiləri bölgəmizin həyatında mühüm əhəmiyyətə malikdir. İnanırıq ki, Gürcüstandakı seçkilər bu ölkənin bütün vətəndaşlarının iradəsinə uyğun şəkildə nəticələnəcək. Eyni zamanda iki ölkə arasında əlaqələrin bu şəkildə davam etməsini qoruyub saxlayacaq.
Gürcüstanda yaşayan azərbaycanlılara və Azərbaycanda yaşayan gürcülərə yüksək dövlət qayğısı, diqqəti var. Gürcüstan dövləti öz vətəndaşları olan azərbaycanlılara, Azərbaycan dövləti də ölkəmizin gürcü vətəndaşlarına qayğı və həssaslıqla, diqqətlə yanaşır. Bu həm də iki ölkə arasında səmimi münasibətlərin, sıx əlaqələrin, dostluğun, iqtisadi-siyasi, mədəni əlaqələrin sarsılmazlığının bir göstəricisidir. Azərbaycandakı gürcülərə və Gürcüstandakı azərbaycanlılara hər zaman dövlətlər səviyyəsində dəstək göstərilib.
“Mənə elə gəlir ki, qarşıdakı yeni dövrdə də bu siyasətin daha da möhkəmlənməsinin şahidi olacağıq”
Politoloq İlyas Hüseynov “Bakı-Xəbər”ə şərhində “Gürcüstanda keçiriləcək seçkilər kifayət qədər böyük maraq kəsb edir. Burada önəmli məsələ ondan ibarətdir ki, nə qədər geosiyasi kontektdə diqqətlər seçkilərə yönəlibsə, o cümlədən ölkə daxilindəki diasporların səsinin eşidilməsi baxımından da çox mühüm seçkilər olacaqdır. Eyni zamanda Borçalı bölgəsində həm də kompakt şəkildə azərbaycanlılar yaşayır, daim onların da öz namizədi parlamentdə bölgədəki əhalinin sözünü çatdırır, yerli vətəndaşların qayğıları haqqında fikir bölüşür. Bu, ənənəvi olaraq həyata keçirilən fəaliyyətdir və düşünürəm ki, burada da azərbaycanlılar seçkidə fəal iştirak etməlidir”-deyə bildirdi.
İ.Hüseynovun fikrincə, çünki Gürcüstandakı seçkilər dolayısı ilə Cənubi Qafqazın gələcək geosiyasi arxitekturasına və güc mərkəzlərinin regionda maraqlarının təmin olunmasına, yaxud yeni xaosun, anarxiyanın yaranmasına dair müxtəlif ssenarilərin üzərindən də xətt çəkə bilər. “Bu baxımdan düşünürəm ki, ölkənin ictimai-siyasi həyatında fəal vətəndaş mövqeyindən çıxış edən Gürcüstandakı azərbaycanlılar da bu prosesdə iradələrini ifadə edəcəklər. Eyni zamanda, Gürcüstandakı etnik azərbaycanlılara Azərbaycan dövləti tərəfindən də dəstək vardır. Burada qarşılıqlı anlaşma, dövlətlər arasında yüksək siyasi əlaqələrin mövcudluğu, nəqliyyat və enerji sahəsində həyata keçirilən layihələr də bu diaspor fəaliyyətinin genişləndirilməsinə töhfə verir. Həmçinin hazırkı Gürcüstan hökuməti də məhz bu kontekstə əlaqələrin daha da möhkəmlənməsində maraqlı tərəf kimi çıxış edir”.
İ.Hüseynov əlavə etdi ki, Gürcüstanda keçiriləcək parlament seçkiləri prosesini Azərbaycanın gürcü vətəndaşları və Gürcüstan vətəndaşı olan azərbaycanlılar çox maraqla izləyir.
İ.Hüseynov qeyd etdi ki, dövlətlərin maraqlarına uyğun olaraq Gürcüstanda azərbaycanlılara, eyni zamanda da Azərbaycan vətəndaşları olan gürcülərə qarşılıqlı anlaşma, hörmət, müsbət münasibət göstərildiyi məlumdur. Ekspertin sözlərinə görə, Gürcüstanda azərbaycanlılara, Azərbaycanda isə gürcülərə yüksək dövlət qayğısı var və onlar üçün lazımı şərait yaradılıb. “Azərbaycan vətəndaşlarına verilən hüquq, azadlıq məsələlərinin ölkəmizdə yaşayan gürcülərə şamil olunması siyasəti həm də dövlərarası münasibətləri möhkəmləndirir və düşünürəm ki, bu kontekstdə dövlətlərimiz arasında heç bir fikir ayrılıqları bugünə kimi olmayıb, bundan sonra da olmayacaq. Digər tərəfdən, bütövlükdə “Qafqaz Evinin” formalaşması Cənubi Qafqazda Azərbaycan, Gürcüstan və Ermənistan arasında həm sərhəd ərazi məsələlərinin həllini, həm də birgə yaşayışı, təhlükəsizlik sisteminin gücləndirilməsini, rifah halının artırılmasını nəzərdə tutur. Çünki dövlətlərin silahlanmaya üstünlük verməsi, gərginliyin yaranması və digər məsələlər regionu inkişafdan saxlayır. Yaxşı olardı ki, silahlanmaya xərclənən vəsaitlər elm, təhsil, mədəniyyət sahəsinə xərclənsin və bölgənin inkişafı və çiçəklənməsi baş versin. Çox yaxşı haldır ki, Azərbaycan və Gürcüstan strateji müttəfiqlər kimi öz gələcəklərini formalaşdırıblar. Burada həm etnik milli məsələlər, həm diaspor fəaliyyəti, həm ictimai fəaliyyət, vətəndaş cəmiyyəti institutlarının bir-biri ilə əlaqəsi çox mühüm xarakter daşıyır. Mənə elə gəlir ki, qarşıdakı yeni dövrdə də bu siyasətin daha da möhkəmlənməsinin şahidi olacağıq”-deyə İ.Hüseynov bildirdi.
İradə SARIYEVA
