Qarabağı görməyənlər hansı həvəslə qayıtdısa, Qərbi Azərbaycanı görməyənlər də həmin həvəslə qayıdacaq...
Əli Orucov: “Mütləq biz dədə-baba yurdlarımıza dönəcəyik”
“Bu gün biz Azərbaycan xalqının əyilməz ruhunu Qarabağa və Şərqi Zəngəzura qayıdan soydaşlarımızın timsalında görürük”. Bu barədə Prezident İlham Əliyev Azərbaycan aşıq sənətinin görkəmli nümayəndəsi Aşıq Ələsgərin abidəsinin açılış mərasimindəki çıxışında bildirib.
“O torpaqları heç vaxt görməyən Qarabağdan, Şərqi Zəngəzurdan olan soydaşlarımız həvəslə, səbirsizliklə o qayıdış gününü gözləyirlər, Böyük Qayıdış proqramının icrasını səbirsizliklə gözləyirlər”, - deyən dövlət başçısı vurğulayıb ki, əslində, bu proqram artıq icra edilir.
“Heç vaxt o torpaqlarda yaşamamış, amma o torpaqlara qayıtmaq eşqi ilə yaşamış qarabağlılar bu gün Qarabağa qayıdırlar. Mən əminəm ki, biz eyni mənzərəni Qərbi Azərbaycana qayıdış dövründə də görəcəyik”, - deyə Prtezident qeyd edib.
Bir sözlə, Əliyev bununla Qərbi Azərbaycana qayıdışla bağlı önəmli mesaj vermiş oldu.
“Biz ora qayıtmalı və bu tarixi ədalətsizliyə son qoymalıyıq”
Əslən Qərbi Azərbaycandan olan AMİP funksioneri Əli Orucov “Bakı-Xəbər”ə açıqlamasında bunun baş verəcəyinə inandığını bildirdi: “Mütləq biz dədə-baba yurdlarımıza dönəcəyik. Çünki xəyal kimi görünən bir sıra məsələlər bir gün reallığa çevrilir. O baxımdan əminəm ki, bir gün bu, reallaşacaq. Bizim qan yaddaşımız, tarixi reallıqlar bunu deməyə əsas verir. Tarixi faktlar ortadadır və biz bundan çıxış etməliyik. Məsələ ondadır ki, Qərbi Azərbaycanda soydaşlarımıza yönəlik etnik təmizləmə siyasəti məqsədyönlü şəkildə reallaşdırılıb. Məqsəd o olub ki, Türk dünyası parçalanmış vəziyyətdə olsun. Özü də o zaman bunu təkcə Rusiya imperiyası həyata keçirməyib. Qərb dövlətləri də siyasi baxımdan buna dəstək veriblər. XX əsrin əvvələrindən başlayaraq - 1905-1906, 1918-1921, 1948-1953, 1988-1991-ci illəri əhatə edən deportasiya prosesi xüsusi amansızlıqla icra edilib. Sonuncu deportasiya nəticəsində Qərbi Azərbaycanda bir nəfər də olsun azərbaycanlı qalmayıb. Qərbi Azərbaycanın etnik tərkibinin dəyişdirilməsi naminə bu cür vandalizm siyasəti həyata keçirilib. Məqsədyönlü şəkildə həyata keçirilmiş siyasət nəticəsində həmin torpaqlarda hazırda etnik mənsubiyyət olaraq ermənilərdən başqa digər bir xalq yaşamır. Müxtəlif ölkələrdən ora ermənilər köçürülərək əhalinin demoqrafik tərkibi dəyişdirilib. Bununla paralel, erməni vandalları artıq illərdir ki, Qərbi Azərbaycan torpaqlarından soydaşlarımızın izlərini silməyə çalışırlar. Bu məqsədlə onlar planlı sürətdə bizlərə məxsus tarixi abidələri məhv edir, bəzilərində isə tarixi saxtakarlığa əl atırlar. Ona görə də biz ora qayıtmalı və bu tarixi ədalətsizliyə son qoymalıyıq”.
Vidadi ORDAHALLI
