“DQ” üzrə beynəlxalq sülh konfransı çağırılır - bu da “bitərəf İsveçrənin” nadürüstlüyü...
Faiq Ələkbərli: “İsveçrə parlamentinin ölkə hökumətini belə bir konfrans təşkil etməyə çağırması yolverilməzdir və bu həmin ölkənin antiazərbaycan mövqeyinin göstəricisidir”
Bir sıra Avropa dövlətləri açıq-aşkar şəkildə Azərbaycana qarşı düşmənçilik siyasəti yürüdürlər. Azərbaycanın öz ərazilərini Ermənistanın işğalından azad edib öz torpaqlarında suverenliyini bərpa etməsi Qərb dövlətlərini narahat edir, onlar Azərbaycanın ərazi bütövlüyünü təmin etməsini heç cür həzm edə bilmirlər.
İşğalçı Ermənistana, erməni separatçılarına daim dəstək olan bu dövlətlərdən bundan artığını gözləmək yersiz olardı. Amma bir halda ki, onlar özlərini “demokratik” dövlətlər kimi qələmə verirlər, dövlətlərin ərazi bütövlüyü məsələsinə qahmar çıxdıqlarını bəyan edirlərsə, onda Azərbaycanın öz ərazilərini işğaldan azad etməsi faktını qəbul etməli və süni şəkildə “Dağlıq Qarabağ problemini” gündəmə gətirməyə çalışmamalı idilər. “Dağlıq Qarabağ” adlı problemin tarixə gömüldüyünü qəbul etmək istəməyən məlum Avropa dövlətləri o problemi yenidən diriltməyə çalışırlar. Belə olmasaydı, dünyaya “demokratiya” dərsi keçməkdə iddialı olan İsveçrə antiazərbaycan mövqeyi sərgiləməzdi.
Erməni mediası yazır ki, İsveçrə parlamenti ölkə hökumətini “Dağlıq Qarabağla” bağlı beynəlxalq sülh konfransı təşkil etməyə çağırıb.
Bildirilənə görə, İsveçrə Federal Assambleyasının (parlamentin aşağı palatası) Xarici Əlaqələr Komitəsi müvafiq “qətnamə” qəbul edib və bu “qətnamə” parlamentin yuxarı palatasında müzakirəyə çıxarılacaq.
Bunların keçirmək istədiyi konfransın məqsədi də çox absurddur. Deyirlər ki, məqsədləri beynəlxalq aktorların nəzarəti və ya iştirakı ilə erməni əhalisinin təhlükəsiz və kollektiv şəkildə qayıtması ilə bağlı Azərbaycan nümayəndələri ilə “Dağlıq Qarabağ erməniləri” arasında dialoqu təşviq etməkdir.
Əsl işğalçının - Ermənistanın adını çəkməyən İsveçrə qərəzli mövqe tutaraq Azərbaycanı Qarabağı “işğal etməkdə” ittiham edib, 1915-ci ildə guya baş verən “erməni soyqırımı” Qarabağda da “təkrarlanıb”, ermənilər “etnik təmizləməyə məruz qalıb”.
İsveçrə parlamentinin gözünü Azərbaycan düşmənçiliyi elə tutub ki, gerçəyi görmək istəmir. İsveçrə parlamentinin deputatları etiraf etmək istəmirlər ki, Azərbaycan ermənilərə qarşı heç bir etnik təmizləmə siyasəti aparmayıb, heç bir erməni deportasiya edilməyib, əksinə, Ermənistan azərbaycanlıları Qərbi Azərbaycandan, öz tarixi yurdlarından deportasiya edib, etnik təmizləməyə məruz qoyub, işğal dövründə 1 milyona yaxın vətəndaşımızı məcburi köçkün, qaçqın vəziyyətinə salıb. Bu Avropa dövləti bu qədər faktı görməzdən gəlir, ermənilərin davasını döyür.
İsveçrə parlamentinin qəbul etdiyi kağız parçasında iddia olunur ki, guya 2023-cü il noyabrın 17-də Beynəlxalq Ədalət Məhkəməsi Azərbaycanın “Dağlıq Qarabağın erməni əhalisinin” “təhlükəsiz, maneəsiz və tez qayıtmasını” təmin etməyə borclu olduğu barədə “qərar” çıxarıb. Onlar 2024-cü il martın 12-də Avropa Parlamentinin Azərbaycana qarşı qəbul etdiyi qərəzli qətnaməni də vurğulayıblar. Təbii ki, bunlar hamısı absurddur və onların irəli sürdükləri məsələlər beynəlxalq hüquq prinsiplərinə ziddir. Bir ovuc erməninin Qarabağa qayıtmasını canfəşanlıqla müdafiə edən İsveçrə də, onun kimi dövlətlər də unutmamalıdır ki, Qarabağdan erməniləri Azərbaycan dövləti çıxarmayıb, onlar könüllü şəkildə bizim torpaqları tərk ediblər. İsveçrə parlamenti belə ədalətlidirsə, iddia etdiyi kimi tərəfsizdirsə, onda nə üçün Qərbi azərbaycanlıların indiki Ermənistan ərazisinə təhlükəsiz və ləyaqətli şəkildə qaytarılması barədə qərar qəbul etmir? Niyə Ermənistanın qarşısına belə bir tələb qoymur? Qoymaz da, çünki onun dərdi başqadır, bölgənin yenidən qarşıdurma meydanına çevrilməsinə və Ermənistanın Azərbaycana yenidən hücum etməsinə nail olmaqdır...
“Azərbaycana düşmən mövqeyi sərgiləyir”
AMEA-nın Fəlsəfə və Sosiologiya İnstitutunun şöbə müdiri, siyasi şərhçi Faiq Ələkbərli hesab edir ki, İsveçrə parlamentinin ölkə hökumətini “Dağlıq Qarabağla” bağlı beynəlxalq sülh konfransı təşkil etməyə çağırması absurddur. “Əlbəttə, artıq öz həllini tapmış “Dağlıq Qarabağ” məsələsinə yenidən qayıtmaq və bunu aktullaşdırmaq qəbuledilməzdir. “Dağlıq Qarabağ” deyilən bir termin yoxdur, bu, gündəlikdən çoxdan çıxıb.
İsveçrə parlamenti belə lazımsız çağırış edirsə, bu onların qərəzliliyindən irəli gəlir. Ümumiyyətlə, istənilən dövlətin parlamenti bu cür əsassız təkliflər irəli sürürsə, o birmənalı olaraq Azərbaycana düşmən mövqeyi sərgiləyir. Bu kimi qərəzli fikirləri ortaya qoyan İsveçrənin, Fransanın və başqa dövlətlərin niyyəti bəllidir. Belə dövlətlər heç zaman bitərəf ola bilməzlər. Onların bitərəfliyinə və insan hüquq və azadlıqları məsələsində mövqelərinə şübhə ilə yanaşmaq lazımdır. İsveçrə parlamentinin bu qərəzli davranışı da sübut edir ki, bu ölkə heç zaman bitərəf mövqe tutmayıb, indi də bu cür siyasət yürüdür”.
F.Ələkbərli bildirdi ki, bir əsrdən çoxdur İsveçrə özünü tərəfsiz dövlət kimi qələmə verməyə çalışsa da, onun yürütdüyü siyasət bunun tamamilə əksinədir. “İsveçrə parlamentinin ölkə hökumətini belə bir konfrans təşkil etməyə çağırması yolverilməzdir və bu həmin ölkənin antiazərbaycan mövqeyinin göstəricisidir. Bu ölkə yalnız Azərbaycana deyil, digər türk və müsəlman dövlətlərə qarşı da qərəzli münasibətilə tanınır.
Qarabağ Azərbaycan dövlətinin beynəlxalq hüquq çərçivəsində tanınan ərazisidir və biz öz torpağımızı, ərazimizi işğaldan azad etmişik, orada suverenliyimizi bərpa etmişik. Bu bizim beynəlxalq hüquqla tanınan hüquqmuzdur. Ermənilərin Qarabağa, Azərbaycan torpaqlarına qayıtmasına gəlincə, bu, dövlətimizin daxili işidir. İsveçrə bitərəf dövlət kimi özünü sübut etmək istəyirsə niyə tərəf tutur, ermənilərin məsələsini qaldırırsa, onda Qərbi azərbaycanlıların geri qayıdış hüququnu niyə unudur?”
F.Ələkbərli bildirdi ki, İsveçrə parlamentinin bu çağırışına rəsmi Bakı mövqe bildirəcək, İsveçrə hölumətinə və parlamentinə lazımı tutarlı cavabı verəcək, bu cavab mütləq verilməlidir də. “İsveçrə parlamentinin də, bəzi Qərb dövlətlərinin parlamentlərinin də belə davranışları o ölkələrin əsl simasını və niyyətlərini ifşa edir. Görürük ki, təkcə Fransa deyil, bu cür qərəzli yol tutan ölkələr arasında İsveçrə də, başqa dövlətlər də var. Hesab edirəm ki, rəsmi Bakı İsveçrə parlamentinə layiqli cavabı verəcək və məsələyə aydınlıq gətirəcək”-deyə F.Ələkbərli vurğuladı.
İradə SARIYEVA
