Borrel Azərbaycanın haqlı işinə "işğal" dedi, ermənilərin sayını isə 150 minə qaldırdı...
![Image](/uploads/posts/2023-12/borrel1.webp)
Mehman İsmayılov: “Biz Jozef Borrelin uydurduğu bu rəqəmləri, uydurduğu bu situasiyanı rədd edirik...”
Avropa İttifaqının (Aİ) Xarici İşlər və Təhlükəsizlik Siyasəti üzrə Ali Nümayəndəsi Cozef Borrel Azərbaycana qarşı qərəzli münasibətindən əl çəkmək istəmir. Mütəmadi olaraq dövlətimizi hədəfə alan Borrel 25-ci Aİ-QHT İnsan Hüquqları Forumunda çıxışında iddia edib ki, guya Qarabağı 150 min insan tərk edib.
Borrel Azərbaycanın öz ərazilərində suverenliyini bərpa etməsini, öz halal haqqına qovuşmasını “hərbi işğal” kimi qələmə verməyə çalışır. Antiterror tədbirlərindn sonra Qarabağdan könüllü köçüb gedən ermənilərin sayını da qəsdən şişirdən Borrel iddia edir ki, guya “150.000 insan köçkün vəziyyətinə” salınıb.
Ermənistan 120 min ermənin Qarabağdan köçdüyünü iddia edirdisə, Borrel niyə “barıtı çox edərək” onların sayını 150 minə qaldırıb?
“Qarabağdan çıxan ermənilərin sayını şişirdərək 150 min kimi qələmə verməsi onun necə saxtakar olduğunu göstərir”
Borrelin absurd iddiası ilə bağlı politoloq Mehman İsmayılov “Bakı-Xəbər”ə şərhində “Avropa İttifaqının baş diplomatı sayılan Jozef Barrelin Azərbaycana qarşı səsləndirdiyi fikirlər saxtakarlığın, ikili standartların və ikiüzlü siyasətin bariz nümunəsidir. Borrel deyir ki, guya Azərbaycan etnik ermənilərə qarşı güc tətbiq edib və 150 erməni öz “doğma torpaqlarını” tərk edib. Bu, təbii, siyasət deyil. Bu, Avropa İttifaqı tərəfindən Azərbaycana qarşı düzənlənən siyasi fahişəlikdir. Azərbaycan 28 il danışıqlar apardı ki, ermənilər tərəfindən işğal edilmiş torpaqlar azad edilsin. Nə ATƏT, nə Avropa İttifaqı, nə BMT Ermənistana təcavüzkar dedi, Azərbaycanın pozulmuş haqlarının bərpa eidlməsində heç bir həlledici addım atmadılar. 28 ildən sonra Azərbaycan məcbur olub öz torpaqlarını güc yolu ilə azad etdi, ondan sonra 36 ay müddətində Ermənistanın öz qoşunlarını bizim ərazilərimizdən çıxarılmasını tələb etdi. Yenə də nə Avropa İttifaqı, nə ATƏT, nə BMT, nə dünyanın aparıcı gücləri bu prosesin həyata keçirilməsinə, Ermənistanın öz üzərinə götürdüyü öhtəlikləri yerinə yetirməsinə yardım etmədilər. Əksinə, erməni separatizminə dəstək verdilər. Bu gün də onlar ermənilərin, Ermənistanın revanşist çağırışlarına dəstək verirlər. Avropa İttifaqı Ermənistanı silahlandırmağa dair qərar verib, Fransa Ermənistanı silahlandırır, Hindistan da həmçinin. ABŞ Azərbaycana təzyiqlər edir və bütün bu təzyiqlərin bir məqsədi var, Azərbaycanı antirusiya və antiiran müstəvisində Qərbin yanına çəkmək. Azərbaycanın və Türkiyənin Rusiya il yaxınlaşan münasibətləri, getdikcə inkişaf edən strateji əlaqələri Qərbi və Avropa İttifaqını qane etmir, onlar Güney Qafqazı savaş meydanına çevirmək istəyirlər. Erməni parazitlərindən istifadə edib, guya onların haqlarını müdafiə edirmişlər kimi özlərini göstərib Azərbaycana təzyiq edirlər. Azərbaycan Avropa İttifaqının enerji təminatında çox vacib bir aparıcı oyunçu kimi iştirak etdiyi halda Borrelin verdiyi bu bəyanatlar məntiqdən, siyasətdən, diplomatiyadan kənardır. Borrel ümumiyyətlə çox qaba bir siyasi dildən istifadə edən məmurdur”-deyə bildirdi. M.İsmayılovun sözlərinə görə, Borrel gəncliyində çörəkçi, ofisant, mühasib olub, kosmik mühəndis olmaq istəyib, sonra iqtisadiyyata meyl edib, hakimiyyətə gələn kimi Rusiyanı Avropanın köhnə düşməni, Amerikanı Avropanın düşməni, indusları dünyanın düşməni adlandırıb. Onun çox qaba bir dildən istifadə etdiyinin bütün dünyaya məlum olduğunu deyən M.İsmayılovun sözlərinə görə, haqqı görməmək, Azərbaycanı ermənilərə qarşı güc tətbiq etməkdə suçlamaq Avropa İttifaqının tutduğu ikiüzlü mövqedir. O vurğuladı ki, Azərbaycan özünün karbohidrogen ehtiyatlarının Avropa bazarlarına çıxarılması üçün infrastrukturu inşa edərkən bütün dünya Azərbaycanın üstünə gəlirdi. O bildirdi ki, Rusiya, İran və Ermənistan bütün gücləri ilə Azərbaycana təzyiq edirdilər, amma indi Azərbaycan öz gücü hesabına qurduğu infrastrukturlar vasitəsilə Avropanın qaza, neft və neft məhsullarına olan ehtiyacını ödəməkdə ikən Azərbaycana qarşı sərglənən bu mövqe ədalətsizlikdir. “Jozef Borrel, Şarl Mişel, bütövlükdə Avropa Azərbaycandan qaz istəyir, Azərbaycan Aİ-nin enerjiyə ehtiyacının 5 faizini ödəyir. Azərbaycan sivil bir tərəfdaş kimi davranış sərgiləyir, belə bir vəziyyətdə Azərbaycana qarşı səsləndirilən bəyanatlar heç bir arqument olmadan sadəcə uydurulan iddialardır və təzyiq kampaniyasıdır. Borrelin Qarabağdan çıxan ermənilərin sayını şişirdərək 150 min kimi qələmə verməsi onun necə saxtakar olduğunu göstərir. Azərbaycan öz haqqını qoruyur və heç kəsin ərazisinə müdaxilə etməyib. Azərbaycan həm 44 günlük əks-hücum əməliyyatını, həm də 23 saat 50 dəqiqəlik antiterror tədbirlərini öz ərazisində həyata keçirib. Borellin bunun əksini iddia etməsi onun nə tarixi, nə coğrafiyanı bilmədiyini göstərir. Amma Jozef Borrel katoloniyalıdır. O bilir ki, 7 milyon 500 min katolonyalının haqqını İspaniya hakimiyyəti total şəkildə tapdalayır və öz dillərində danışmağa onlara qadağalar qoyur. İspaniyanın içindəki separatizmin əleyhinə fəaliyyət göstərən Borrelin Azərbaycanın ərazisində separatizmə dəstək verməsi bizi təəccübləndirmir. Çünki biz Avropa və kollektiv Qərb siyasətçilərinin siyasi monipulyasiya və spekulyasiyadan istifadə etdiyini bilirik. Azərbaycan öz siyasətini yürüdür, öz ərazisində, öz hüdudları içində fəaliyyət göstərir. Jozef Borrelin ermənilərin “mədəni tarixi” və “dini irs”inin qorunmasına çağırış etməsi yenə də onun gerçəkdən ikiüzlü bəyanatlar səsləndirdiyini açıq-aşkar göstərir. Bəs Qərbi Azərbaycanın ərazisində Azərbaycan türkünə məxsus olan dağıdılmış 4 min abidənin taleyi necə olsun? Ermənilər Qərbi Azərbaycanda 400 məscid dağıdıblar, 744 məzarlığın altını üstünə çeviriblər, Qarabağda Azərbaycann tarixi və mədəni irsini yerlə yeksan ediblər. Amma bunun barəsində danışan bir avropalı diplomat və ya məmur yoxdur. Bu, avropalıların siyasi ikiüzlülüklərini, heç bir demokratik və qanuni mövqe tutmadıqlarını açıq-aşkar göstərən bir bəyanat və çağırışdr. Biz Jozef Borrelin uydurduğu bu rəqəmləri, uydurduğu bu situasiyanı rədd edirik ki, Azərbaycan öz hüdudları çərçivəsində ərazi bütövlüyünü və suverenliyini bərpa edib”-deyə M.İsmayılov əlavə etdi.
İradə SARIYEVA