Yumurta yenə bahalaşmağa başladı - qıtlıq, ya bayramqabağı hadisə?..
Xalid Kərimli: “Yumurta qiymətlərinin dəyişməsi tələbatdan və istehsalın planlaşdırılmasından asılıdır”
Son günlər ölkədə yumurtanın qiymətində artım müşahidə olunur. Məlumdur ki, bayramqabağı Y eni il süfrəsindəki təamların hazırlanmasında yumurtadan istifadə olunur. Ehtimal olunur ki, yumurtanın satış qiymətinin artması bayramla bağlıdır.
Məlumat üçün bildirək ki, bir neçə gün öncə marketlərdə yumurtanın satış qiyməti 12-14 qəpik idi. Ancaq hazırda broyler yumurtası 18-22 qəpiyə təklif olunur.
Maraqlıdır, qiymətin bahalaşma səbəbi qıtlıqla bağlıdır, yoxsa bayramqabağıdır deyə?
“Tələbat və yumurta istehsalçılarının ehtiyatlarına görə bazarda yumurta qiymətləri zaman-zaman dəyişir”
Mövzu ilə bağlı iqtisadçı ekspert Xalid Kərimli “Bakı-Xəbər”ə şərhində bildirdi ki, Azərbaycan yumurta tələbatını tam olaraq özü ödəyə bilir: “Məlumdur ki, ölkəmizə xaricdən yumurta idxal olunmur. Bizim yumurta istehsalçılarının kifayət qədər potensialı var. Onların gündəlik istehsal gücü 4 milyon ədəddir. Azərbaycanın yumurta tələbatı isə 3 milyon ədəddir. Onlar hər gün ölkənin tələbatından 1 milyon daha çox istehsal gücünə malikdirlər. İstehsalçılar yumurta satışları aşağı düşəndə qiymətləri endirməyə məcbur olurlar. Çünki yumurtanın xarab olma ehtimalını da nəzərə almaq lazımdır. Tamamilə itkiyə getməmək üçün qiymətləri endirirlər. Bir neçə ay əvvəl 8-9 qəpiyə satılan yumurtaların qiyməti artıq 2-3 dəfə bahalaşıb”.
Ekspert hesab edir ki, yumurta qiymətlərinin dəyişməsi tələbatdan və istehsalın planlaşdırılmasından asılıdır: "Çox yumurta istehsal edib sata bilməyəndə qiymətləri endirməyə məcbur qalırlar. Satışlar və tələbat yaxşı dolduqda isə qiymətləri qaldırmaq imkanı yaranır. Ümumiyyətlə, təlabat və yumurta istehsalçılarının ehtiyatlarına görə bazarda yumurta qiymətləri zaman-zaman dəyişir. Onu da deyim ki, yay aylarında gün uzun olduğundan toyuqlar daha çox qidalanır. Amma indi demək olar toyuqlar yemin ümidinə qalıb və bundan əlavə gün də qısalıb, toyuqlar doyunca qidalana bilmir. Bu da yumurtanın qiymətinə təsir edir. Bu səbəbdən də kəndlilər çalışır ki, yumurtanı baha qiymətə satıb, yem üçün xərclədiyi vəsaitin bir hissəsini kompensasiya etsinlər".
Günel CƏLİLOVA
