Ermənistan Hindistandan yeni silahlar alır...
Hindistan Müdafiə Tədqiqatları və Təhlil İnstitutunun baş direktoru Sudjan Çinoy Ermənistanın Hindistandan yenidən 155 mm-lik ATAGS artilleriya qurğularının alınmasında maraqlı olduğunu deyib.
Baş direktor bildirib ki, ATAGS çox çevik qurğulardır. Onlar Hindistanda istehsal olunur və böyük müvəffəqiyyət qazanıb, Ermənistan tərəfi 6 belə qurğu əldə edib və alışdan məmnundur.
S.Çinoyun sözlərinə görə, Hindistan artıq İrəvana "Swathi" radiolokasiya sistemlərini idxal edib və müqavilənin dəyəri 40 milyon dollar təşkil edib. Onun qiymətləndirməsinə görə, Hindistanın yaylım atəşli raket sistemləri dünyada ən yaxşılarından biridir və onlara böyük tələbat var.
O, qeyd edib ki, Ermənistan həmçinin təxminən 250 milyon dollar dəyərində olan "Pinaka" yaylım atəşli raket buraxılış sistemlərinə maraq göstərib.
Bundan əvvəl açılanan məlumatlara görə, İrəvan hələ 2022-ci ildə Delhidən 155 milyon dollar dəyərində artilleriya sistemləri (ATAGS) sifariş edib. 155 mm-lik haubitsaların ilk partiyası 2023-cü ilin avqustunda çatdırılıb.
Hindistan Müdafiə Nazirliyinin məlumatına görə, 2024-2025-ci maliyyə ilində Ermənistan tərəfindən alınan Hindistan istehsalı olan silahların ümumi həcmi 600 milyon dollara çatıb. 2021-ci ildən Ermənistan Hindistandan raketlər, artilleriya qurğuları, zenit müdafiə sistemləri və digər silahlar alır.
TAHİR
