Konstitusiyamızın 30, suverenliyimizin 5 yaşı olacaq...
Məhərrəm Zülfüqarlı: “Biz azərbaycançılıq idelogiyasından doğan birlik, həmrəylik nəticəsində torpaqlarımızı işğaldan azad edib bütün ərazilərimizdə suverenliyimizi bərqərar etdik”
2025-ci ildə müstəqil Azərbaycanın ilk Konstitusiyasının qəbul olunmasının 30, dövlət suverenliyimizin bərpa edilməsinin isə 5 ili tamam olacaq.
Qeyd edək ki, Prezident İlham Əliyevin sərəncamı ilə 2025-ci il Azərbaycan Respublikasında “Konstitusiya və Suverenlik İli” elan edilib.
Sərəncam Konstitusiyamızın bəyan etdiyi niyyətlərdən biri kimi ərazi bütövlüyümüzün və suverenliyimizin tam bərpa olunduğu, 2025-ci ildə Konstitusiyamızın qəbul edilməsinin 30-cu və Vətən müharibəsində qələbəmizin 5-ci ildönümü nəzərə alınaraq imzalanıb.
“Konstitusiyamız ölkə əhalisinin birlik simvoluna çevrildi”
Tarix elmləri doktoru, professor Məhərrəm Zülfüqarlı “Bakı-Xəbər”ə şərhində bildirdi ki, ölkəmizdə 2025-ci ilin “Konstitusiya və Suverenlik İli” elan edilməsi hadisələrin məntiqə uyğun davamı kimi elan edilib: “2025-ci ildə 1995-ci ildə qəbul olunan yeni Konstitusiyamızın 30 illiyidir. Eyni zamanda torpaqlarımızın ərazi bütövlüyünün bərpasının 5 ili tamam olur. Fikrimcə, bu məsələlər il boyu geniş təbliğ edilməli, bu, 2025-ci ildə hər birimizin əsas mövzusu olmalıdır. Nəyə görə? Azərbaycanın dövlət müstəqilliyini 1991-ci ildə qazanmasına baxmayaraq, 1995-ci ilə qədər 1978-ci ildə qəbul olunmuş Sovet Konstitusiyası fəaliyyətdə olub. 1991-ci ilin 18 oktyabrında “Dövlət Müstəqilliyi haqqında” Konstitusiya Aktı qəbul edildi və o akt müəyyən mənada Konstitusiyanı əvəz edirdi. Lakin bilirsiz ki, Konstitusiya referendumla qəbul edildiyinə görə yeni Konstitusiyanın qəbul edilməsinə ehtiyac vardı”.
M.Zülfüqarlı təəssüflə bildirdi ki, nə 1991-ci ilin 18 oktyabrından 1992-ci ilin 5 martına qədər prezident olmuş Ayaz Mütəllibovun, nə də ondan sonra hakimiyyətə gələn Əbülfəz Elçibəyin dövründə yeni Konstitusiya qəbul olundu. “Amma o zaman AXC hakimiyyətinə qarşı güclü müxalifət olan Milli İstiqlal Partiyası tələb edirdi ki, yeni parlament seçkiləri keçirilməli və yeni Konstitusiya qəbul olunmalıdır. Yeni Konstitusiyanın qəbul olunmamasının əsas problemlərindən biri ideoloji məsələ idi. Çünki 1988-ci ildə başlanan Milli Azadlıq Hərəkatı etnik millətçilik, yəni türkçülük üzərində qurulmuşdu və bu ilk dövrlərdə çox böyük uğurların qazanılmasına səbəb oldu. Lakin artıq dövlət quruculuğu prosesinə başlananda etik millətçilikdən dövlət millətçiliyinə keçmək məsələsi aktual idi. Yəni cəbhədə müharibə aparan ölkədə ölkə əhalisinin çoxluğunu təşkil edən Azərbaycan türklərini, 10 faizini təşkil edən milli azlıqları birləşdirən bir ideologiyaya ehtiyac vardı. Çünki türkçülük çoxmillətli respublikada dövlət quruculuğunda müəyyən problemlərə səbəb olurdu”.
M.Zülfüqarlı vurğuladı ki, Konstitusiyamız Heydər Əliyevin hakimiyyəti dövründə qəbul olundu. Professorun sözlərinə görə, H.Əliyevin dövründə azərbaycançılıq ideologiyası dövlətçiliyin əsas xəttinə çevrildi: “1995-ci ildə qəbul olunmuş Konstitusiyada çox düzgün olaraq etik millətçilik olan türkçülük azərbaycançılıq ideologiyası ilə əvəz olundu. Bu da o demək idi ki, yeni ideologiya-Azərbaycanın bütün vətəndaşlarını birləşdirən və vətən məfhumu üzərində qurulan siyasi millətçilik ideologiyası qəbul olundu. Bu, bütün Azərbaycan əhalisini özündə birləşdirdi”.
M.Zülfüqarlının qeyd etdiyinə görə, bizim etnik millətçilikdən dövlət millətçiliyinə keçməyimizin nəticəsidir ki, 44 günlük Vətən müharibəsi, 23 saat 45 dəqiqəlik xüsusi əməliyyat zamanı torpaqlarımızı azad edən qəhrəmanlar içərisində milli azlıqların da çoxlu sayda nümayəndələri oldu. “Bu, 1995-ci ildə Heydər Əliyevin prezidentliyi dövründə qəbul olunan Konstitusiyanın təntənəsi idi.
Konstitutsiyamız ölkə əhalisinin birlik simvoluna çevrildi. Biz azərbaycançılıq idelogiyasından doğan birlik, həmrəylik nəticəsində torpaqlarımızı işğalan azad edib bütün ərazilərimizdə suveremliyimizi bərqərar etdik. Yəni 44 günlük Vətən müharibəsində bu ideologiyaya əsaslanaraq qələbə çalmağımız və Prezidentin verdiyi sərəncam bir-birini tamamlayır. 2025-ci il həm 1995-ci ildə qəbul olunmuş Konstitusiyanın yubileyidir, həm də bu Konstitusiyaya uyğun olaraq qəbul olunmuş azərbaycançılıq ideologiyası əsasında vətəndaşları yalnız bir Vətən məfhumu altında birləşdirilərək düşmən üzərində qazandığımız qələbənin 5 illiyi tamam olur. Bu, çox uğurlu bir siyasətdir, uğurlu bir yanaşmadır. Mənə elə gəlir ki, gələn il qarşımızda böyük vəzifələr durur. Kimliyindən aslı olmayaraq, hər bir vətəndaş azərbaycançılıq ideologiyası ətrafında daha sıx birləşməli və Konstitusiyamızın verdiyi hüquqlardan daha geniş istifadə etməli, bununla da dövlətçiliyimizin inkişafına öz töhfəsini verməlidir”-deyə M.Zülfüqarlı qeyd etdi.
İradə SARIYEVA
