HƏMAS liderinə sui-qəsdi kim və necə həyata keçirib? - ABŞ-dan ortalığı qarışdıracaq iddia...
Oktyabrın 7-də İsrailin Qəzzada başlatdığı əməliyyatdan 299 gün sonra Yaxın Şərqdə gərginliyi artıran sui-qəsd hadisəsi baş verdi. HƏMAS Siyasi Bürosunun rəhbəri İsmayıl Haniyə İranda prezident seçkilərində qalib gələn Məsud Pezeşkianın andiçmə mərasiminə qatılmaq üçün gəldiyi İranın paytaxtı Tehranda qətlə yetirildi.
HƏMAS liderinin qaldığı İran İslam İnqilabı Keşikçiləri Korpusunun himayəsində qazilərə xidmət edən iqamətgaha hava hücumu nəticəsində Haniyə və bir mühafizəçisi öldürülüb. Fələstin İslami Cihad lideri Ziyad Ən-Nəhalən də, Haniyə ilə eyni binada olmasına baxmayaraq, başqa mərtəbədə olduğu üçün hücumdan sağ qurtulub.
İran Yaxın Şərqdə gərginliyi artıran sui-qəsdin araşdırıldığını və nəticələrin tezliklə açıqlanacağını bildirib.
Haniyənin öldürülməsindən günlər keçməsinə baxmayaraq, hücumla bağlı çoxlu cavabsız suallar var. Sui-qəsdin kim və ya kimlər tərəfindən həyata keçirildiyi (baxmayaraq ki, İran və HƏMAS İsraili günahlanırır, ancaq İsrail hücuma görə məsuliyyəti üzərinə götürmür), hücumun hansı silahla edildiyinin hələ də bəlli olmaması, sülh tərəfdarı olan HƏMAS-ın lideri İsmayıl Haniyənin niyə hədəf alındığı ilk ağla gələn suallardan biridir. Digər tərəfdən, Tehranda sözügedən binanın yalnız bir hissəsinə edilən hücumda Haniyənin dəqiq yeri ilə bağlı məlumatın necə əldə edildiyi və İran rəsmilərinin hücumdan xəbərdar olub-olmaması da maraq doğurur. Ən çox maraq doğuran məsələlərdən biri də hücumun idarə olunan raketlə həyata keçirildiyi iddiaları ilə bağlıdır. Sözügedən raketin hansı ölkədən atıldığı və İranın hava hücumundan müdafiə sistemlərinin niyə işə düşmədiyi sui-qəsdlə bağlı cavabsız qalan suallar arasındadır.
Bu arada, ABŞ-ın "The New York Times" qəzetinin iddiasına görə, sui-qəsd raketlə deyil, 2 ay əvvəl Haniyənin Tehranda qaldığı binaya yerləşdirilmiş uzaqdan idarə olunan bomba ilə həyata keçirilib.
Qəzetin 7 Yaxın Şərq və bir ABŞ rəsmisinə istinadən iddia edir ki, partlayıcı gizli şəkildə binaya gətirilib. Qəzetin xəbərində deyilir ki, İsrail kəşfiyyat rəsmiləri sui-qəsddən dərhal sonra əməliyyatın təfərrüatları barədə ABŞ və digər Qərb hökumətlərini məlumatlandırıblar.
Mənbələr partlayışın pəncərələrin şüşələrini sındırdığını və binanın divarının bir hissəsinin dağıldığını, lakin binanın digər hissələrinə az ziyan dəydiyini bildiriblər. Onların fikrincə, bütün bunlar hadisənin raket törədilməsi ehtimalını sıfıra endirir.
Peyk görüntülərinə görə, Haniyənin öldürüldüyü bina İran prezidenti Məsud Pezeşkianın iqamətgahından cəmi 150 metr aralıda yerləşir.
İsrail xəbər mənbələri isə Haniyənin mühafizəçilərindən birinin sui-qəsdçilərə məlumat sızdırdığını iddia edib. İddialara görə, tank əleyhinə və ya idarə olunan raketlə Haniyənin birbaşa yataq otağı hədəf alınıb.
TAHİR
