Xaricdən naməlum votsap zəngləri ciddi narahatlıq doğurmağa başlayıb...
Ramin Hüseynov: “Bunlar kiberdələduzluq halıdır və əhəmiyyət vermək lazım deyil”
Tanımadığınız xarici nömrələrdən gələn mesaj və "email"lərin sırasına votsap üzərindən gələn zənglər əlavə olunub. Son günlər telefonuna tanımadığı xarici nömrədən zənglərin gəldiyini dəyən şəxslərin sayı artıb.
Müxtəlif ölkələrə aid nömrələrdən “salam, necəsiniz?” yazılaraq və ya “WhatsApp” üzərindən zəng edilərək kiberhücum cəhdləri olduğu qeyd edilir. Bəzən istifadəçilərə “Köməyə ehtiyacım var” deyə sorğular göndərilir.
Belə zənglərə cavab verildikdə, zəng edən şəxs pul qazanmaq imkanı ilə qarşı tərəfi razı salmağa çalışır. Manipulyasiya uğurlu olarsa, həmin şəxsdən kredit kartı məlumatı tələb olunur. Bu cür fırıldaq üsulları istifadəçilərə maddi ziyan vurmaq risqi daşıyır.
“Votsap və mobil rabitə üzərindən insanlara tez-tez mesaj və zənglər gəlir, bunlar dələduzlar tərəfindən yayılır”
Mövzu ilə bağlı fikir bildirən İKT sahəsi üzrə ekspert Ramin Hüseynov “Bakı-Xəbər”ə açıqlamasında qeyd etdi ki, sosial şəbəkələr, votsap və mobil rabitə üzərindən insanlara tez-tez mesaj və zənglər gəlir. Bunlar dələduzlar tərəfindən yayılır: “Bəzən şirnikləndirici təkliflər olur. Xüsusən, elektron poçt üzərindən gələnlərdə çox böyük məbləğlər təklif olunur. Dünyada bu cür xuliqanlıq və kiber cinayətə qarşı mübarizə hələ ki, transmilli xarakter daşıyır. Bununla bağlı bir ölkə çərçivəsində nəsə etmək mümkün deyil. Yalnız beynəlxalq çərçivədə hansısa tənzimləyici dövlətlərarası razılaşma olmalıdır. Birləşmiş Ştatlar və digər ölkələrdə mobil rabitə, elektron poçt və sosial şəbəkələr üzərinə nəzarət qoyulub”.
Ekspert onu da əlavə etdi ki, bu sms-lər deşifrə olduğu üçün vətəndaşlar bilməlidir ki, artıq ölkəmizə qarşı xaricdən hücum var və belə mesajlara aldanmamalıdırlar: “Tanınmış şirkətlər, banklar, mobil operatorlar bu işin arxasında durmadıqca, onların rəsmi saytlarından, rəsmi telefon nömrələrindən mesaj gəlmədikcə belə zənglərə əhəmiyyət verilməməlidir. Ümumiyyətlə bu, qarşısı alına biləcək bir hal deyil. Məsələn, biri mənə sms atır. Biz bunun qarşısını ala bilmərik. Yəni onun qarşısını alsaq, başqa nömrədən atılacaq. Sadəcə mariflənmə yolu ilə qarşısı alına bilər. Bunlar kiberdələduzluq halıdır və əhəmiyyət vermək lazım deyil”.
Günel CƏLİLOVA
