Bakının sərhəddə ikitərəfli danışıq təklifi də cavabsız buraxılır...
Elşən Mustafayev: “Görüşlər ya sərhəddə, ya da Gürcüstanda davam edə bilər”
Ermənistanın Azərbaycanın sülh müqaviləsi layihəsi ilə bağlı təkliflərinə cavab verməsinin təqribən 2 ay yarım müddət çəkməsi prosesi ciddi şəkildə yubadıb.
Bu barədə Azərbaycan Respublikası Xarici İşlər Nazirliyinin Ermənistana sülh müqaviləsinin bağlanması üçün danışıqları bərpa etmək çağırışı ilə bağlı mətbuat açıqlamasında deyilir:
“Sülh danışıqlarındakı bu durğunluq regionda sabitliyə və firavanlığa töhfə vermir. Azərbaycan sülh müqaviləsinin mümkün qədər tez tamamlanması üçün Ermənistanla ikitərəfli əsasda birbaşa danışıqlara hazırdır. Biz inanırıq ki, iki ölkə gələcək münasibətləri barədə qərarı birlikdə verməlidir. Qarşılıqlı məqbul məkanın seçilməsi və ya dövlət sərhədində görüş barədə qərar verilməsi də daxil olmaqla, sülh prosesinin davam etdirilməsinə görə iki ölkə məsuliyyət daşıyır. Biz Ermənistan tərəfini yeni lüzumsuz yubatmalara yol verməməyə çağırır və danışıqların tezliklə başlanması üçün onların bu çağırışa müsbət cavab verəcəyinə ümid bəsləyirik”.
Göründüyü kimi, Azərbaycan vasitəçilər olmadan, ikitərəfli təmaslarla bağlı da Ermənistana təklif göndərib, amma ortada heç bir nəticə yoxdur. Azərbaycanın təklif etdiyi birbaşa təmaslar prosesə hansı faydanı verə bilər?
Politoloq Elşən Mustafayev “Bakı-Xəbər”ə açıqlamasında bildirdi ki, Azərbaycanın Xarici işlər naziri Ceyhun Bayramov bir müddət əvvəl bildirmişdi ki, İrəvan Bakıdan təklif alanda bunu ictimailəşdirmir, amma özü təklif göndərən kimi bu barədə dərhal cəmiyyətə məlumat verir: “Beləliklə, bir növ, məsuliyyəti öz üzərindən atmaq yolu tutur və sanki topun Azərbaycanda olduğuna dair fikir fornalaşdırmaq istəyir. Nəzərə alaq ki, ölkəmizin irəli sürdüyü təşəbbüsün üzərindən xeyli müddət keçib. Bu məqam Azərbaycan XİN-in və rəsmi şəxslərin Ermənistan XİN-in təkliflərinə münasibət müstəvisində yaydığı açıqlama da əksini tapıb. Açıqlamalarda bildirilib ki, Ermənistan Azərbaycanın sülh müqaviləsi layihəsi ilə bağlı təkliflərinə cavab verməsini ciddi şəkildə yubadır.
Bəli, hazırda aktual olan məsələ, belə demək mümkünsə, təklif mübadiləsi yox, üzbəsurət müzakirələrin aparılmasıdır. Müzakirələr isə hər hansı vasitəçilərsiz, birbaşa getməlidir. Yəni Ermənistan özündə cəsarət tapmalıdır. Dəstəkçi qismində Fransa Prezidenti Emmanuel Makronu və ya qeyrisini göstərməməlidir.
Ümumən, Ermənistan XİN-in təklifləri müstəvisində Azərbaycan XİN-in yaydığı açıqlama onu təsdiqləyir ki, Bakı İrəvanla danışıqların yeni fazası üzərində dayanır. Bu fazada məkan anlayışı öz əhəmiyyətini itirir. Ən əsası isə məsuliyyət dəqiqləşir. Nəzərə alaq ki, zaman-zaman Paşinyan administrasiyasının manipulyasiyalarında məsuliyyəti öz üzərindən atmaq meylləri də nəzərə çarpıb. Azərbaycan artıq bu variantın keçərsizliyini elan edir və mövcud xüsusda Ermənistana çağırış ünvanlayır: “Biz Ermənistan tərəfini yeni lüzumsuz yubatmalara yol verməməyə çağırır və danışıqların tezliklə başlanması üçün onların bu çağırışa müsbət cavab verəcəyinə ümid bəsləyirik”.
Göründüyü kimi, Azərbaycan dövləti çox haqlı olaraq məsələni konkret qoyur. Görüşlər ya sərhəddə, ya da Gürcüstanda davam edə bilər. Hər iki variantı reallaşdırmaq mümkündür.
Məhz bu halda sülh sazişinin imzalanması sürətlənər. Əks halda, proses uzanacaq”.
Məhəmmədəli QƏRİBLİ
