Dünyanın hələ də müstəmləkə xalqları Bakıdan Fransaya od püskürdülər...
Dəyanət Osmanlı: “Bu mübarizələrin Fransanın müstəmləkəçilik niyyətlərinin iflası ilə nəticələnəcəyinə şübhə yoxdur”
Fransa müstəmləkəsində assimilyasiya statusuna məruz qaldıq. Bu barədə Qvadalupe Qadınlar Birliyinin prezidenti Ketty Lombion “Dekolonizasiya: Qadınların gücləndirilməsi və inkişafı" mövzusunda keçirilən tədbirdə çıxışı zamanı deyib.
“Bizim mübarizəmiz hələ də davam edir. Bütün həyatımızda müstəmləkənin nəticələrini görürük. Bundan ən çox qadınlar travma alıb. Şiddət və çətinliklə üzləşən qadınlar ayağa qalxaraq azadlıq tələb edib. Biz hələ də müstəmləkəyik və azad olmalıyıq. Qadınlarımız səlahiyyətləndirilməlidir. Davamlı şəkildə hazırkı situasiyanı dəyişməyə çalışırıq”,- deyə o bildirib.
“Fransanın müstəmləkəçilik siyasətindən əziyyət çəkən xalqlar, toplumlar artıq ayağa durub onun bu cinayətlərinə qarşı birləşirlər”
"Türk Dünyası İnfo" İctimai Birliyinin sədri Dəyanət Osmanlı "Bakı-Xəbər"ə şərhində bildirdi ki, müasir dünyada “demokratiya beşiyi” Fransanın müstəmləkəçilik siyasətini davam etdirməsi o ölkənin adına, tarixinə utanc gətirir. “Fransanın soyqırımçı və işğalçı dövlət olması nəticəsində saysız günahsız insan əziyyət çəkib. Təəssüf ki, öz qanlı keçmişindən utanmaq əvəzinə, bu gün də neokolonist düşüncəyə malik Fransa müstəmləkəçilik siyasətini davam etdirir. Maraqlıdır ki, Fransanın müstəmləkəçilik siyasətindən əziyyət çəkən xalqlar, toplumlar artıq ayağa durub onun bu cinayətlərinə qarşı birləşirlər. Fransanın keçmiş və çağdaş tarixində bərabərsizlik, irqçilik və istismar kimi qanlı miraslar var ki, bura on minlərlə insanın qanı hopub”-deyə D.Osmanlı qeyd etdi.
O bildirdi ki, rəsmi Bakının dəstəyi ilə Fransa müstəmləkəçiliyindən əziyyət çəkən, hətta bu gün də müstəmləkə olan ölkələrin, toplumların beynəlxalq səviyyədə etiraz səsini qaldırması mütləq nəticə verəcək. Bakıda “Dekolonizasiya: Qadınların gücləndirilməsi və inkişafı" mövzusunda tədbirin keçirilməsini müsbət qiymətləndirən D.Osmanlı dedi ki, bu tədbirdə iştirak və çıxış edən qadınlar Azərbaycanın dəstəyindən cəsarət alaraq Fransanın kolonyaçılıq siyasətini ifşa edirlər. O bildirdi ki, onlar Fransa neokolonializmi ilə mübarizənin Azərbaycanın sayəsində dünya miqyasına çıxdığını yaxından dərk edirlər. “XXI əsrdə müstəmləklərin olması doğrudan da dəhşətli bir fakdır, buna görə Makron hökuməti cavab verməlidir. Yeni dünyada insanlar Fransanın müstəmləkə buxovundan azad olmaq uğrunda mübarizə aparır. Qadın azadlığını əlində bayraq tutan Fransa minlərlə qadının azadlıq, yaşamaq haqqını tapdalayır, onlara zülm edir. Hesab edirəm ki, Bakının təşəbbüsü və dəstəyi ilə başlayan neokolonizmlə mübarizə prosesi hələ də müstəmləkədə yaşayan xalqlara azadlıq bəxş edəcək. Çünki o xalqlar, o toplumlar azad olmaq üçün Fransanın soyğunçu, soyqırımçı siyasətinə qarşı mübarizə aparırlar. Bu mübarizələrin Fransanın müstəmləkəçilik niyyətlərinin iflası ilə nəticələnəcəyinə şübhə yoxdur”-dey D.Osmanlı vurğuladı.
İradə SARIYEVA
