Bakıya xəstə axını dayanmır - rayonlarda müasir xəstəxanalar niyə tikilib?..
Adil Qeybulla: “Region xəstələrinin Bakıya axışması istər-istəməz işin keyfiyyətinə təsir edir”
Bölgələrdə nə qədər yeni klinikalar tikilsə də, hər hansı xəstəliyə yoluxduqda rayon əhalisi paytaxt xəstəxanalarına üz tutmağı seçir.
Bakıdakı xəstəxanalara daha çox güvənən əhali müayinədən əlavə, ağır qəzada yaralanmış, ağacdan yıxılıb qolunu, ayağını qırmış, hansısa hadisə nəticəsində ağır xəsarət almış, infarkt keçirmiş və yaxud kəskin ağrıları olan yaxınlarını rayondakı tibb müəssisələrinə əmanət etmir. Onlar bütün risqləri gözə alaraq saatlarla yol qət edib Bakıya gəlirlər.
Araşdırmalar göstərir ki, vətəndaşların çoxu bölgə xəstəxanalarında tibbi avadanlıqların və xidmətin yetərli olmaması səbəbindən Bakıya axın edir. Bakıda icbari tibbi sığortanın köməyi ilə müayinə ola biləcəkləri üçün rayon xəstəxanalarına getməkdən imtina edirlər. Halbuki, regionlarda tibb müəssisələrinin dünya standartlarına çatdırılması üçün hər il dövlət büdcəsindən, son illər isə İcbari Tibbi Sığorta üzrə Dövlət Agentliyinin fondundan milyardlar xərclənir.
Müasir tibbi avadanlıqlarla təmin olunduğu bildirilən region xəstəxanalarında da icbari tibbi sığorta keçərlidirsə, xəstələr bölgələrdən Bakıya niyə axın edirlər?
“Bölgə xəstəxanalarımızın əksəriyyəti müasir tibbi avadanlıqlarla təmin olunub, bu səbəbdən də rayonlarda yaşayan insanlar ərazi üzrə xəstəxanalara müraciət etsələr daha yaxşı olar”
Professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, icbari tibbi sığortanın təşkilində müəyyən problemlər qalmaqdadır: “Təəssüflər olsun ki, indiyə qədər növbəlilik sistemi hələ də oturuşmayıb. Bu səbəbdən də bu gün paytaxt xəstəxanalarında adam əlindən tərpənmək olmur. Region xəstələrinin Bakıya axışması istər-istəməz işin keyfiyyətinə təsir edir”.
Ekspertin sözlərinə görə, rayonlarda yaşayan vətəndaşların ərazi üzrə tibbi xidmət alması artıq öz həllini tapmalıdır: “Bu problemin yaranmasının bir neçə səbəbi var. İlk olaraq bildirim ki, əksər hallarda xəstələrin özləri Bakıda müalicə olmaq istəyir. Onlar İcbari Tibbi Sığortanın yalnız Bakıda olduğunu düşünüb və avadanlıqlara da etibar etdiyi üçün paytaxt xəstəxanalarına müraciət edir. İcbari Tibbi Sığortanın işçiləri də xəstələrin istəyinə əməl etməyə çalışır. Ancaq nəzərə almaq lazımdır ki, bu gün bölgə xəstəxanalarımızın əksəriyyəti müasir tibbi avadanlıqlarla təmin olunub. Bu səbəbdən də rayonlarda yaşayan insanlar ərazi üzrə xəstəxanalara müraciət etsələr daha yaxşı olar”.
Günel CƏLİLOVA
