Dünyada su qıtlığı olsa da, Lerikdə bulaqların gözünə daş basırlar...
Hazırda dünyanı ən çox narahat edən qlobal problemlərdən biri də şirin su qaynaqlarının ciddi şəkildə azalması, içməli və suvarma üçün yararlı olan su mənbələrinin qurumasıdır. İllər öncə bizim respublikada bu məsələ ilə bağlı həyəcan təbili çalınırdı. Artıq vəziyyətin dünyada, eləcə də respublikamızda daha ciddi olduğu bBeynəlxalq təşkilatların hesabatlarında tam aydın görünür, hətta 2025-ci ildən sonra bu qlobal problem dünyanın bir sıra ölkələri üçün siyasi və sosial-iqtisadi təzyiq vasitəsinə çevriləcəyi deyilir. Nəticədə vəziyyət indi hər bir insandan mövcud su ehtiyatlardan səmərəli istifadəni tələb edir. Daha dəqiq desək, hər kəs gündəlik həyatında sudan istifadədə diqqətli davranmalı, üzərinə düşən vətəndaşlıq vəzifəsini vicdanla yerinə yetirməlidir. Başqa yerləri deyə bilmərəm, təəssüf ki, təhlükənin bir addımlığında olduğumuz halda dağlar diyarı Lerikdə aşıb-daşan, durnagözlü bulaqların gözünə daş basanlar vardır.
Rayonda dörd kəndi birləşdirən Daster ərazisi həmişə öz saf sulu bulaqları hesabına tanınıb, buraya gələn qonaqları da heyran salıb. Hər kənddə ən azı 10 bulaq çağlayıb. Sovet vaxtı burada bir bulaq 20-25 evin həyat-bacasını gülüstana döndərərdi. Son illər isə vəziyyət tamam dəyişib. Hər addımı bulaqlar olan kəndlər su sıradan korluq çəkir. Bu da ondan irəli gəlir ki, təbiətin insanlara bəxş etdiyi əvəzsiz nemətlər bəziləri tərəfində qanunsuz zəbt edilib. Özü də təbiətin qəsdinə çıxanlar buralardan köçüblər. Qızmar yayın bir ayı kəndə - ata yurduna gəlir, zəncirlənmiş bulaqdan təkcə özləri istifadə edirlər. Qalan vaxtları isə başqası çəpərlərin əlindən bulaqlara yaxın düşə bilmir. Su səmərəsiz axır, çeşmələrin ətrafında bataqlıqlar yaranır, təbiət pis günə düşür. Beləcə, bulağın gözünə daş basıb kəndlini susuz qoyanlara hələlik dəyib-dolaşan yoxdur...
Zəfər ORUCOĞLU
Azərbaycan Jurnalistlər Birliyinin üzvü
