Avropa Şurası Azərbaycandan KİMİN QİSASINI ALIR?

Avropa Şurası Parlament Assambleyası növbəti dəfə Azərbaycan əleyhinə açıq-aşkar QƏRƏZLİ, sırf təxribat xarakterində bir addım atdı. Avropa dəyərlərindən, ölkələrin suverenliyindən, insan hüquq və azadlıqlarından dəm vuran AŞPA, bütün bu “dəyərlərinə” tüpürüb, Azərbaycana qarşı olan mənfi münasibətini rəzil şəkildə ifadə etdi. Onsuz da neçə illərdir ki, qərb qurumlarında azərbaycançılığa, türkçülüyə, İslama, əməkdaşlığa, qarşılıqlı hörmətə qarşı çirkin fobiyanın tüğyan etdiyi hər kəsə gün kimi aydın idi. Amma işin bu həddə çatacağı, AŞPA-nın normal təşkilat əvəzinə, daha çox siyasi sifariş yerinə yetirən oyuncaq quruma çevrildiyinin biabırçı şəkildə ortaya çıxacağı gözlənilmirdi. Düşünmək olardı ki, AŞPA özünü belə rəzil vəziyyətə salmaz, elan etdiyi dəyərləri bu şəkildə tapdalamaz.

Amma olan oldu. Azərbaycan əleyhinə heç bir beynəlxalq hüquqa əsaslanmayan, birbaşa ölkələrin daxili işlərinə müdaxilə edən ittihamlar səsləndirən AŞPA-dakı “tutuquşular”, açıq-aşkar siyasi sifariş yerinə yetirdiklərini büruzə verdilər. AŞPA Azərbaycandan kimin QİSASİNI ALIR? Əlbəttə, 44 günlük müharibədə Azərbaycana məğlub olub rəzil günə düşən Ermənistanın qisasını alır!
Təsəvvür edin ki, iyirmi il ərzində bu təşkilat torpaqlarımızı işğal altında saxlayan Ermənistana qarşı heç bir sanksiya tətbiq etmədiyi, yüz minlərlə qaçqın və köçkün azərbaycanlıya hər hansı mesaj göndərmədiyi, onların problemləri ilə məşğul olmadığı halda, məhz indi Azərbaycana qarşı düşmən mövqeyinə keçib. Çünki bu münasibət məhz 44 günlük müharibədə Azərbaycan öz torpaqlarını azad edəndən, ərazi bütövlüyünü və suverenliyini, sərhədlərini tam şəkildə bərpa edəndən sonra baş qaldırıb. Bəs Nikol Paşinyanın Ermənistanda yaratdığı xunta rejimi necə, AŞPA-dakıların gözünə girmir ki? Yoxsa diletant N.Paşinyanın Ermənistandakı hüquq və azadlıqlara tüpürüb, öz əli ilə imzaladığı kütləvi həbslər AŞPA-dakıları qəti maraqlandırmır? Əlbəttə, maraqlandırmır. Onları Azərbaycana necə dəhşətli ziyan vurmaq maraqlandırır. Onları demokratiya, insan hüquqları kimi mənasız terminlər heç zaman maraqlandırmayıb da. Onlar üçün maraqlar öndə gəlir, hüquq və demokratiya terminləri bu maraqlar üçün şantaj vasitəsidir, vəssalam!
Amma AŞPA-nın bu qərəzli mövqeyindən öncə də Azərbaycan əleyhinə kampaniya start götürmüşdü. Xüsusilə, Avropa İttifaqı səviyyəsində açıq-aydın Ermənistanın silahlandırılmasına çağırışlar edilir, Azərbaycan əleyhinə sanksiyalar üçün təxribatlar törədirdilər. Avropa İttifaqının Xarici Əlaqələr və Təhlükəsizlik Siyasəti üzrə ali nümayəndəsi Cozep Borrel adlı biri var. Yaşı da səksənə yaxınlaşır. Bu ağsaçlı ispaniyalı siyasətçi ermənipərəstlikdə Emmanuel Makronu da, digər qərb ermənipərəstlərini də vurub keçib. Sözsüz ki, bu qocaman ispaniyalının erməbilərə görə belə canfəşanlığı təkcə regionda qərbin yırtıcı maraqlarına hesablanmayıb. Hətta uzaq Afrikadakı qəbilələrə də aydındır ki, neçə on illiklərdir ki, Avropada kök salan erməni diasporu belələrini ABŞ dollarına “bələyir”, dollar bağlamaları ilə bəsləyir, sonra da gündəmə çıxarıb Azərbaycana qarşı qışqırdır...
Sözsüz ki, erməni diasporu qərbdəki “bərkgedən” qurumları və onların vəzifəlilərini dollar və avro qoxusunda yerindəcə “ovlamağı” əla bilir. Görünür ki, cənab C.Borrel də Aİ-dakı quru maaşındansa, bu qoca vaxtında erməni diasporunun bağlama nəmərlərinə tamah salıb...

Keçək MƏTLƏBƏ. Məsələnin mətləbi budur ki, C.Borrel azərbaycanlı diplomatlarla bağlı Fransanın mövqeyini qızğın şəkildə müdafiə edib və bununla kifayətlənməyərək əlavə edib ki, Bakıda təxribatla məşğul olan fransız diplomatlar “məsumdurlar”, günahsızdırlar. Bundan başqa, Ali nümayəndə Azərbaycan Prezidentinin Azərbaycan və Ermənistan ərazilərinə dair tarixi faktlarla bağlı fikirlərini tamamilə təhrif etməklə yanaşı, Azərbaycana qarşı hərbləşmə və təcavüzkar siyasəti bilərəkdən qızışdırmaqla məşğuldur.
Bu qoca C.Borrelə gün kimi aydındır ki, beynəlxalq ictimaiyyətin Ermənistanı beynəlxalq hüququn norma və prinsiplərinə uyğun hərəkət etməyə inandırmaq üçün heç bir səy göstərməməsinə baxmayaraq, Azərbaycan hər zaman Ermənistanla danışıqlara, sülhə və sabitliyə sadiq olub. Bu qoca siyasətçi bütün sadaladıqlarımız həqiqətləri bildiyi halda gözlərini erməni təəssübkeşliyi necə örtübsə, hətta qeyri-diplomat görkəminə bürünüb diletant şəkildə bilərəkdən Azərbaycan əleyhinə yalanlar üfürməkdədir. Təkcə bu qoca Borreldirmi? - xeyr, belələri Avropa Parlamentində ağzına kimi doludurlar.

Amma həmin qüvvələr əmin ola bilərlər ki, həmişəki kimi, bu dəfə də heç nə əldə edə bilməyəcəklər. Azərbaycan dövləti milli və müstəqil maraqlara əsaslanan qətiyyətli, eyni zamanda, tam ədalətli mövqeyindən bir addım da geri çəkilməyəcək. Bir vacib məqam da budur ki, Azərbaycan Avropanın əsas enerji təminatçılarından biridir. Ölkəmiz Cənubi Qafqazda yeganə güc sahibidir. AŞPA-da və ya Avropanın digər siyasi dairələrində oturub Azərbaycana qarşı düşmənçilik edənlər anlamalıdırlar ki, belə davam edəcəkləri təqdirdə, bölgəmizdəki tərəfdaşlarını itirəcəklər. Hələ ki, nə C.Borrel, nə E.Makron, nə də qərbdəki erməni züy tutanları Azərbaycana qarşı təxribatların hansı adekvat cavablarla nəticələnəcəyinin fərqində deyillər. Ya da fərqindədirlər, sadəcə, Azərbaycan düşmənçiliyi gözlərini elə bağlayıb ki, nəticələr onları düşündürmür. İşlərinə gələn tək fakt, nə olursa-olsun Azərbaycana ziyan vurmaqdır. Amma burası dəqiqdir ki, ziyanın da qarğış kimi iki başı var. Heç bir nüfuzu və qərar hökmü olmayan ölü AŞPA üzərindən Azərbaycana qarşı belə oyuna görə qərb çox şeyi itirəcək. Çünki itirdikləri qazandıqlarından çox olacaq, burası tam dəqiqdir...

Mətləb Salahov