Tiflisdəki prosesləri Qərbə bağlı bu qurumlar qızışdırır...
Bəhruz Quliyev: “İndiki qarşıdurmaların ssenarisi xeyli əvvəl yazılıb”
Son günlər Gürcüstanda vəziyyət həddindən artıq gərgindir və proseslər get-gedə daha da ağır vəziyyət yaradır. Qərb Gürcüstanda öz maraqlarına uyğun ssenari hazırlayıb və yerli müxalifətin, müəyyən QHT-lərin iştirakı ilə bu ssenarini həyata keçirməyə cəhd edir. Bilirik ki, Gürcüstan dövləti əvvəlcə Avropaya inteqrasiya yolunu tutduğunu elan etsə də, Qərbin təlqin etdiyi bəzi “dəyərləri” qəbul etməkdən imtina etdi.
Məsələn, qanunla LGBT-nin Gürcüstanda təbliğini qadağan edən qanun qəbul etdi, cinsi azlıqların fəaliyyətini məhdudlaşdıran normativ-hüquqi aktların tətbiqi də, “Xarici təsirin şəffaflığı haqqında” Qanunu qəbul etməsi də məlumdur. İndi isə Gürcüstan 2028-ci ilin sonuna qədər Avropa İttifaqına üzvlük məsələsini dondurub. Gürcüstanın mövqeyi isə Qərbi, Avropa Birliyini ciddi narahat etdiyindən, o, Gürcüstanda vəziyyəti bu şəkildə qarışdırır. Qərbdən maliyyələşən müxalif qüvvələrin, QHT-lərin, siyasilərin Tiflisdə və qonşu ölkənin başqa şəhərlərində, rayonlarında ayaqlanması birbaşa Qərbin maraqlarına xidmət edir. Məqsəd rəngli inqilab və zorakılıq yolu ilə indiki hakimiyyəti devirib onun yerinə öz qüvvələrini hakimiyyətə gətirməkdir.
Bu gün Gürcüstanda gedən proseslərdə Qərbin QHT, LGBT və ifrat liberal sağçı dairələr şəbəkələri nə kimi aparıcı rol oynayır? Bu qüvvə və şəbəkələr Gürcüstanda nə vaxt formalaşdırılıb?
Ekspertlər qeyd edir ki, proseslərdə Qərbin QHT, LGBT və sair dəstələri çox aktivdir və onlar Qərbdən gələn tapşırıqla hərəkət edirlər. Bu qüvvələrin Gürcüstanda müxtəlif xətlərlə formalaşdırıldığını deyən ekspertlər bildirir ki, son dövrə qədər Gürcüstanda Qərb institutları çox aktiv şəkildə işləyib və müəyyən istiqamətlərdə kök atmağa nail olublar.
“Avropa İttifaqı Gürcüstandakı emissarları vasitəsilə ölkədə çaxnaşmalara...”
“Qərbin Gürcüstanda dövlət çevrilişinə cəhd edəcəyi və bunun üçün hazırlıqlara başladığı əvvəlcədən bəlli idi. Hələ parlament seçkilərindən əvvəl bu iddia ilə çıxış edən Avropa İttifaqı Gürcüstandakı emissarları vasitəsilə ölkədə çaxnaşmalara hazırlaşırdı. İndiki qarşıdurmaların ssenarisi xeyli əvvəl yazılıb, bu gün artıq onun həyata keçirilməsi prosesi gedir. Qərb Gürcüstanın Rusiyaya yönəlik siyasət yürütdüyünü, daha dəqiq desək, Rusiyanın çətiri altına girdiyini, Avrointeqrasiya prosesini dayandırdığını iddia edir. Halbuki, hər şey Avropa İttifaqının Gürcüstanı üzvlüyə namizədlər siyahısından çıxardığı gündən başlayıb". Bunu mövzu ilə əlaqədar “Bakı-Xəbər”ə şərhində SƏS Media Qrupunun rəhbəri, siyasi analitik Bəhruz Quliyev deyib.
B.Quliyev son hadisələri xatırladaraq qeyd edib ki, Avropa Parlamenti Gürcüstan hakimiyyətinə qarşı növbəti qətnamə qəbul etməklə bu ölkəni özündən bir az da uzaqlaşdırıb: "Avropa Parlamenti digər məsələlərlə yanaşı vizasız rejimi ləğv etməyi, hakim elitanın üzvlərinə qarşı sanksiyaların tətbiqini təklif edib. Avropa Parlamentinin üzvləri tamamilə Gürcüstan prezidenti Salome Zurabişvilinin və “Gürcü arzusu”nun digər əleyhdarlarının bəyanatlarına əsaslanan qətnamə hazırlayıblar. Nəticədə müxalifətin hakimiyyətə olan bütün iddiaları qısaca təkrarlanıb. Digər tərəfdən də avropalı deputatlar Brüsselin Tbilisiyə ayırdığı maliyyə yardımını da unutmayıblar. Onlar Gürcüstan hakimiyyəti üçün nəzərdə tutulan əvvəllər dondurulmuş 120 milyon avronun yerli qeyri-hökumət təşkilatlarına, o cümlədən mediaya köçürülməsini təklif ediblər. Bu yolla Avropa Parlamentinin üzvləri Gürcüstan vətəndaş cəmiyyətinin inkişafına kömək edəcəklərinə ümid edirlər. Gürcüstan parlamenti hökumətin tərkibini təsdiq edəndən sonra baş nazir Kobaxidze çıxış edərək Gürcüstanın bundan sonra da Avropa İttifaqına inteqrasiya etmək yolunu tutacağını qeyd edib. Əlavə edib ki, Gürcüstan milli maraqlarına zidd olmayan bütün şərtləri qəbul etməyə hazırdır. Avropa İttifaqı da gürcülərin ləyaqətinə hörmət etdiyini sübut etməlidir. Əlbəttə, Avropa Parlamentinin qətnaməsi “Gürcü arzusu”nu və Aİ-ni geri dönüşü olmayan nöqtəyə yaxınlaşdırıb. Rəsmi Tbilisinin reaksiyasının necə olacağını gözləmək lazımdır. Bunun sırf neqativ olacağı aydındır, lakin məmurların yalnız ədəbi ifadələrə dayanacaqları, yoxsa hansısa siyasi və hüquqi nəticələrin olub-olmayacağı məlum deyil. Bununla yanaşı, “Gürcü arzusu” sanksiyalar təhlükəsinə hazırdır, ona görə də bu, çətin ki, onun üzvləri üçün hər hansı stres yaratsın".
İradə SARIYEVA
