Prezident: "Deportasiya olunmuş yüz minlərlə azərbaycanlının mülkiyyəti, müqəddəs yerləri qorunmalıdır"
O şəxslər (Qarabağ erməniləri – red.) qayıtmaq istəyirlər, onlar bunu edə bilərlər. Onların mənzilləri, evləri olduğu kimi qalır. Zəngilanda və digər yerlərdə yerlə-yeksan olunmuş evlərdən tam fərqli olaraq, onların mənzilləri var.
Bu sözləri Prezident İlham Əliyevin ADA Universitetində keçirilən “Qarabağ: 30 ildən sonra evə dönüş. Nailiyyətlər və çətinliklər” mövzusuna həsr olunmuş Beynəlxalq Forumda çıxışı zamanı deyib.
Dövlətimizin başçısı bildirib ki, əgər onlar Azərbaycana qayıdacaqlarsa, bu, ölkəmizin qanunları çərçivəsində həyata keçiriləcək.
Azərbaycanlıların Ermənistan ərazisinə qayıtması məsələsindən də danışan Prezident İlham Əliyev qeyd edib ki, Ermənistan tərəfi də ən azı eyni yanaşma sərgiləməlidir. Onlar elektron reinteqrasiya portalı yarada, orada azərbaycanlıların yaşadıqları kəndlər barədə məlumatları əks etdirə bilərlər. Təbii ki, belə olsaydı, daha münasib olardı. Yəni, onlar gəlsinlər, yerlərini ziyarət etsinlər. Bu da barışığın bir işarəsi olardı.
“Bu, mümkün olmalıdır. Ermənistan bunun qarşısını almalı deyil. Deportasiya olunmuş yüz minlərlə azərbaycanlının, həmyerlilərimizin tələbatları təmin edilməlidir. Onların mülkiyyəti, müqəddəs yerləri qorunmalıdır. İndi bu gün Xankəndidə, yaxud da başqa yerlərdə, harada ki, erməni əhalisi çoxluq təşkil edib, biz onu qoruyub saxlayırıq, amma eyni yanaşma bizə münasibətdə də olmalıdır”, - deyə dövlətimizin başçısı vurğulayıb.
