Azərbaycanda günəş-külək enerjisi 80 faizə nə vaxt çatacaq?..
Vüqar Bayramov: “Yaşıl enerjinin istehsalının genişləndirilməsi Azərbaycanın əsas hədəflərindən biridir”
“Bu ilin birinci yarısında Azərbaycanda elektrik enerjisi istehsalında “yaşıl enerji”nin payı 15 %-ə yüksəlib. Məlumata görə, bu ilin birinci yarısında Azərbaycanda elektrik enerjisinin istehsalı 13 milyard 557,4 milyon kVt/saat, ixrac 444 milyon kVt/saat, idxal isə 96,4 milyon kVt/saat olub”. Bu barədə energetika naziri Pərviz Şahbazov “X” sosial şəbəkəsindəki hesabında paylaşım edib.
Nazir qeyd edib ki, birinci yarımildə İstilik Elektrik Stansiyaları üzrə 11 milyard 525 mlyon kVt/saat, su da daxil olmaqla bərpa olunan enerji mənbələrindən 950,7 milyon kVt/saat artımla 2 milyard 032,4 milyon kVt/saat elektrik enerjisi istehsal edilib.
Qeyd edildiyi kimi, Azərbaycanda 6 ayda elektrik enerji istehsalında “yaşıl enerji” payı 15 faiz artıb. Maraqlıdır, təxminən 80-90 faiz istehsala hansı müddətə nail olmaq olar?
“2030-cu ilə qədər istehlak edilən hər 10 kVt/saat enerjinin 3 kVt/saatı alternativ mənbələrdən əldə edilməlidir”
Millət vəkili Vüqar Bayramov “Bakı-Xəbər”ə açıqlamasında bildirdi ki, yaşıl enerjinin istehsalının genişləndirilməsi Azərbaycanın əsas hədəflərindən biridir. Qarşıya qoyulan əsas məqsədlərdən biri ümumi istehlakda yaşıl enerji payının 30 faizə qədər çatmasıdır: “İstehsal və istehlakda bərpa olunan enerjinin payının artırılması gözlənilir. 2030- ilə qədər istehlak edilən hər 10 kVt/saat enerjinin 3 kVt/saatı alternativ mənbələrdən əldə edilməlidir”.
Həmsöhbətimiz onu da əlavə etdi ki, Azərbaycanda yaşıl enerji sahəsinə 1 milyard dollardan artıq sərmayə cəlb edilib. Xarici şirkətlər yaşıl enerji sahəsində fəal iştirak edir. Bütün bunlar imkan verir ki, Azərbaycan 2030-cu ilə qədər qarşıya qoyulan hədəflərə nail ola bilsin. Alternativ mənbələrdən enerji istehsalının artırılması isə təbii qaz istehlakının azalmasına və öz növbəsində ölkəmizin “mavi yanacaq” ixracatının artmasına gətirib çıxara bilər. Azərbaycana daha çox valyutanın daxil olmasına imkan yarada bilər. Bu, həm də iqtisadi baxımdan ölkəmiz üçün vacibdir, prioritetdir. Artıq Azərbaycan hökuməti sistemli şəkildə alternativ enerji mənbələrindən, eləcə də “yaşıl enerji”nin, “yaşıl iqtisadiyyat”ın formalaşması ilə bağlı fəaliyyətləri genişləndirir”.
Günel CƏLİLOVA
