Prezident Qarabağ və Zəngəzurun su ehtiyatlarının unikal bir özəlliyindən danışdı...
Vüqar Bayramov: “Sözügedən su mənbələri bütövlükdə ölkə üçün yeni imkanlar deməkdir”
Prezident İlham Əliyev Hacıqabul rayonunda yenidən qurulacaq Şirvan suvarma kanalının təməlqoyma mərasimindəki çıxışında bəyan edib ki, Vətən müharibəsi və antiterror əməliyyatı nəticəsində biz bu gün öz su mənbələrimizə tam sahib olmuşuq.
Həmçinin ölkə başçısı sözügedən su mənbələrinin strateji əhəmiyyətini belə dəyərləndirib: “Vaxtilə Ermənistan təkcə bizim torpaqlarımızı yox, bizim su resurslarımızı da işğal etmişdir. Qarabağ və Şərqi Zəngəzurda mövcud olan su resursları bizim ümumi su resurslarımızın 25 faizini təşkil edir. Bu su resurslarının əsas xüsusiyyəti, müsbət tərəfi odur ki, bunlar daxili mənbələr hesabına formalaşan su resurslarıdır. Çünki bildiyiniz kimi, bizim əsas çaylarımız xaricdən gəlir - Kür çayı, Araz çayı, Samur çayı. Bizim əsas çaylarımız xaricdən gəlir, ona görə Qarabağın və Şərqi Zəngəzurun su resursları daxili mənbələr olduğu üçün bunun xüsusi əhəmiyyəti var”.
“Bütün bunlar Azərbaycanda, xüsusən aqrar sektorun inkişafına ciddi stimul verəcək”
Sözügedən məsələni “Bakı-Xəbər”ə şərh edən millət vəkili Vüqar Bayramov ölkə başçısının səsləndirdiyi fikirlərə bir neçə aspektdən yanaşdı: “Məsələ ondadır ki, Qarabağ və Şərqi Zəngəzur yalnız təbii ehtiyatlarla deyil, eyni zamanda su ehtiyatları baxımından zəngin bölgəmizdir. Baxmayaraq ki, bu regionumuzun su ehtiyatları uzun müddət ermənilər tərəfindən dağıdılıb. Bəzi su mənbələri isə ümumiyyətlə sıradan çıxarılıb. Artıq məlum olduğu kimi, Azərbaycanın ərazi bütövlüyü və suverenliyi tam təmin edilib. Təbii, bu da imkan verir ki, Qarabağ və Şərqi Zəngəzurun həm su mənbələrinin bərpa edilməsi, həm də ondan səmərəli istifadə edilməsi mümkün olsun. Çünki sözügedən su mənbələri bütövlükdə ölkə üçün yeni imkanlar deməkdir. Çünki bu, nəticə etibarı ilə həmin su mənbələrinin yalnız həmin bölgələri deyil, bütövlükdə digər rayonlarımızın da aqrar sektorunun inkişafı və eləcə də sənaye, içməli suya olan tələbatın ödənilməsi baxımından mühüm əhəmiyyət kəsb edir. Ona görə də praktik olaraq Qarabağ və Şərqi Zəngəzurun daxili su mənbələri Azərbaycanda suya olan tələbin ödənilməsində xüsusi paya malik oacaq. Bu isə nəticə etibarı ilə həm də Azərbaycanda xüsusən aqrar sektorun inkişafına ciddi stimul verəcək. Qlobal istiləşmənin geniş yayıldığı bir dövrdə su ehtiyatlarımızdan son dərəcə səmərəli istifadə etməyimiz vacibdir. Elə etməliyik ki, su itkiləri minimum səviyyəyə düşsün. Su mənbələrinin qorunmasında vacib olan faktorlardan biri də meşələrin qorunması və genişləndirilməsidir”.
Vidadi ORDAHALLI