Parklanmanı səliqəsiz edənlər cərimələnəcək - qapalı park yerlərinə də aid ediləcək?
Aslan Əsədov: “Cərimələrin tətbiq edilməsi neqativ halların azalmasına kömək edəcək, bütün hərəkət iştirakçıları bir-birinə hörmət etməlidir”
İctimai nəqliyyatdan istifadə edən şəxslər düşünür ki, yəqin maşını olanlar ən xoşbəxt insanlardır, ürəkləri nə vaxt istəsə rahat gəzə bilirlər. Lakin avtomobili olanların da həyatı heç də elə asan deyil. Maşının təmiri, benzini, aylıq qulluğu, təmizliyi və nəhayət, parklanmaq üçün yerin tapılması minik avtomobillərindən istifadə edən şəxslərin problemidir.
Paytaxt ərazisində narazılığa səbəb olan məsələlərdən biri də məhz parklanma ilə bağlıdır. Bir sıra yerlərdə bölgənin tamamilə maşınlara qapalı olması və paytaxtda minik avtomobillərinin həddindən artıq çoxluğu, parklanmaq üçün yerin kifayət etməməsi və yaxud da mövcud olan yerlərin bahalılığı etirazla qarşılanır. Danılmaz faktdır ki, son zamanlar parklanma ilə bağlı çoxlu sayda problemlər yaşanırdı. Bu kimi problemlərə son qoymaq məqsədilə Azərbaycanda parklanma qaydalarının pozulmasına görə cərimələr artırılıb. Bununla bağlı Prezident İlham Əliyev İnzibati Xətalar Məcəlləsinə edilən dəyişikliyi təsdiqləyib. Dəyişikliklə nəqliyyat vasitəsinin istifadəçisi tərəfindən nəqliyyat vasitəsi ilə ödənişli parklanma yerinə daxil olduqdan sonra xüsusi proqram təminatı və ya SMS vasitəsilə parklanma müddətinin başladılmamasına, nəqliyyat vasitəsinin parklanmasına görə müəyyən edilmiş ödəniş edilmədən və ya ödəniş edilmiş müddətdən artıq parklanma yerindən istifadə üçün əlavə ödəniş edilmədən parklanma yerinin tərk edilməsinə görə 20 manat məbləğində cərimə ediləcək.
Qeyd edək ki, buna qədər nəqliyyat vasitəsinin parklanmasına görə müəyyən olunmuş ödəniş edilmədən və ya ödəniş edilmiş müddətdən artıq parklanma yerindən istifadə üçün əlavə ödəniş edilmədən parklanma yerini tərk etməsinə görə sürücü 10 manat məbləğində cərimə edilirdi.
Məlumdur ki, qapalı, yerüstü, çoxmərtəbəli dayanacaqlar var. Cəza bu dayanacaqlar üçün nəzərdə tutulur, yoxsa yol kənarında avtomobil park edənlər üçün nəzərdə tutulub? Maraqlıdır, parklanma ilə bağlı cəzalar hansı hallarda nəzərdə tutulur?
“Açıq məkanlarda nəqliyyat vasitəsi park edənlər əksər hallarda qaydalara fikir vermirlər. Avtomobil necə gəldi park olunurdu, üstəlik…”
Nəqliyyat eksperti Aslan Əsədov “Bakı-Xəbər”ə şərhində qeyd etdi ki, qapalı və açıq məkanlarda dayanacaq var. Açıq dayanacaqlarda qanunsuzluq daha çox müşahidə olunur: “Açıq ərazilərdə nəqliyyat vasitəsi park edənlər bəzi hallarda ödəniş etmədən ərazini tərk edirdilər. Qapalı məkanlarda isə belə hal yaşana bilməz, çünki ödəniş edilməsə şlaqbaum açılmır”.
Həmsöhbətimiz hesab edir ki, cərimə heç bir cəmiyyətdə müsbət qarşılanmır: “Parklanma yerinin ödənişsiz tərk edilməsinə görə 20 manat məbləğində cərimə təqdirəlayiqdir. Düşünürəm ki, cərimələrin tətbiq edilməsi neqativ halların azalmasına kömək edəcək. Bütün hərəkət iştirakçıları bir-birinə hörmət etməli, bir-birinin hərəkətinə mane olan hallara yol verməməlidirlər. Parklanmaya görə ödəniş etməyənlərin cəzası dayanma-durma hərəkətinə uyğun sayılacaq. Məsələnin mahiyyəti ondan ibarətdir ki, sürücü dayanma-durma qaydalarına necə əməl edirsə parklanmaya da o cür əməl etməlidir. Açıq məkanlarda nəqliyyat vasitəsi park edənlər əksər hallarda qaydalara fikir vermirlər. Avtomobil necə gəldi park olunurdu, üstəlik park edilmə müddətindən artıq həmin yerdə dayanır, ödənişi isə etmirdilər”.
Günel CƏLİLOVA
