Fransanın 2 "ən güclü" ermənipərəsti toqquşdu - Makron-İdalqo qarşıdurması...
![Image](/uploads/posts/2024-07/makron-Idalqo.webp)
Fransa Prezidenti Emmanuel Makron Milli Assambleyanı buraxaraq növbədənkənar seçkilər təyin etməklə ölkəni parçalanmaya sürükləyib. Bunu Paris meri Ann İdalqo müsahibəsində söyləyib:
“Fransa cəmiyyəti parçalanıb, xaos mühəndisləri parçalanma zəncirinə gətirib çıxarıb... Emmanuel Makron ifrat sağ və ifrat sol üçün, populistlər üçün böyük bir meydan buraxaraq, sol və sağın ortaya çıxmasına şərait yaradıb”.
Ann İdalqo Olimpiya Oyunları ərəfəsində parlamentin buraxılmasını məsuliyyətsiz və təhlükəli addım adlandırıb, çünki bu, sağçıların hakimiyyətə gəlməsinə səbəb ola bilərdi. Bununla belə, İdalqonun fikrincə, Olimpiada birləşdirici amilə çevrilə bilər.
Xatırladaq ki, Emmanuel Makron iyunun 9-da Fransa parlamentinin aşağı palatası olan Milli Assambleyanın buraxıldığını və erkən seçkilər keçiriləcəyini elan etmişdi.
İyunun 30-da və iyulun 7-də keçirilən seçkilərin nəticələrinə görə, solçu “Yeni Xalq Cəbhəsi” koalisiyası assambleyadakı 577 yerdən 182-ni qazanaraq qalib gəlib. İkinci yeri 168 mandatla prezident Emmanuel Makronun “Respublika naminə birlikdə” koalisiyası tutub. Sağçı “Milli birlik” partiyası isə 143 mandat qazanıb. Beləliklə, heç bir siyasi qüvvə yeni hökuməti formalaşdırmaq üçün səs çoxluğu əldə edə bilməyib.
Diqqətçəkən məqam budur ki, əvvəllər Parisin meri olan İdalqo Makronla çox mehriban münasibətlərə malik idi. “Laçın dəhlizi”ndə proseslər gedən vaxt İdalqo ermənilərə yardım adı ilə bir neçə maşından ibarət karvanla Qarabağa keçmıyə cəhd edirdi. Görünür, Ermənistan siyasətləri iflasa uğrayandan sonra onların münasibətləri daha da kəskinləşib. Fransadakı ifrat ermənipərəstlərin qarşıdurması nədən xəbər verir?
Qeyd edək ki, Fransanın hakim zümrəsində erməni sevgisi hər zaman olub. Ölkədəki çoxmilyonluq erməni lobbisi, elektorat, maliyyə, hakimiyyət vəzifəyə can atan istənilən şəxsi özünə cəlb edir. Hər seçki yaxınlaşdıqca da "erməni kartı"ndan geniş istifadə olunması artıq ənənəyə çevrilib. Sonra da, necə deyərlər, istifadə olunub bir kənara atılırlar. Qarabağa "humanitar yük" şousunu da bu "istifadənin" tərkib hissəsi adlandırmaq olar.
Artıq bu qarşıdurmadan sonra birmənalı şəkildə deyə bilərik ki, zamanında qadın meri İrəvana və Azərbaycanla sərhədə gətirən erməni sevgisi yox, seçkilər olub.
Ermənipərəst mövqeyini bir kənara qoyub, onun mer kimi fəaliyyətinə nəzər salaq. Məhz yarıtmaz fəaliyyətinin nəticəsidir ki, Paris bu gün Avropanın ən qeyri sabit, islamofob, ekoloji problemlərin baş alıb getdiyi şəhərə çevrilib. Dünya və yerli media dəfələrlə şəhərdə tullantıların toplanıb qalması, pis qoxu yaranması və gəmiricilərin artması barədə reportajlar hazırlayıb. Dəfələrlə tullantıların yaratdığı vəziyyətdən bezən sakinlər şəhər meriyasının tədbir görməsini tələb etsələr də, çağırışları cavabsız qalıb. Çünki merləri şəhərin problemləri maraqlandırmır. Onları Makronla ermənipərəst mövqedə bir sırada qərar tutmağa vadar edən amil Fransadakı erməni lobbisinin imkanlarından yararlanmaq cəhdi olub. Makron və onun ətrafı seçkidə məğlubiyyətə uğrayandan sonra bu maraqlar arxa plana keçib. Məhz bu səbəbdəndir ki, onlar İdalqo ilə didişmə həddinə çatıblar. Bir daha təsdiqlənir ki, səhv və ədalətsiz olan ermənipərəst mövqe hətta böyük ölkələrin daxili siyasətinə də mənfi mənada təsir etmiş olur.
Məhəmmədəli QƏRİBLİ