Şuşa Media Forumu Fransa mətbuatını ifşa etdi – “Le Monde", "Fiqaro" şantaj silahı kimi...
Müşfiq Ələsgərli: “Azərbaycan başqa dövlətlərin demədiyi həqiqətləri söyləmək üçün özündə iradə, güc tapdı”
Şuşada keçirilən Qlobal Media Forumun açılış mərasimində Prezident İlham Əliyevə sual ünvanlayanların arasında BMT-dəki Fransa Polineziyasının nümayəndəsi Karlayl Korbin də olub.
O, ölkə başçısından soruşub ki, kolonializmə dair gələcək təşəbbüslər nədən ibarət olacaq?
Prezident İlham Əliyev cavabında deyib ki, biz Qoşulmama Hərəkatına sədrliyə başlayandan bu məsələ ilə yaxından məşğul olmağa çalışdıq: “Biz kolonializmdən əziyyət çəkən bütün xalqları dəstəkləməyə davam edəcəyik, əlimizdən gələni edəcəyik. Əlbəttə ki, siz Bakı Təşəbbüs Qrupunu qeyd etdiniz. Bu, bir qeyri-hökumət təşkilatıdır. Ancaq bu qeyri-hökumət təşkilatı birgə səylər nəticəsində Azərbaycanda yaradılıb və onlar, məncə, çox yaxşı işləyirlər. Çünki kolonializmdən əziyyət çəkən həmin xalqların səsini heç kəs eşitmir. Çünki az sayda ölkə var ki, Fransanı əməllərinə görə ittiham etsin. Bir çox ölkələr buna göz yummağa çalışırlar, başqa tərəfə baxmağa çalışırlar. Özlərinə başağrısı axtarmırlar. Onlar qorxurlar ki, “Fiqaro” və ya “Le Monde” qəzetlərində demonizasiyaya məruz qalarlar. Həmin qəzetlər bu gün Fransa prezidenti rejiminin təsiri altındadır. Mən sizə tam əminliklə deyə bilərəm, biz çox gözəl bilirik ki, həmin o media şirkətlərinə Yelisey sarayından hansı mesajlar ötürülür. Biz buna məhəl qoymuruq. Biz sizi hər zaman dəstəkləyəcəyik. Əlimizdən gələni edəcəyik ki, siz və sizin kimi milyonlarla insan öz torpağında azad yaşaya bilsin. Siz öz gələcəyinizi planlaşdırmalısınız. Siz öz irsinizi və ləyaqətinizi, dilinizi qorumalısınız, hansı ki, bu gün sizi ondan məhrum etməyə çalışırlar. Biz sizin yanınızda olacağıq”.
Prezidentin bu cavabından belə qənaətə gəlmək olarmı ki, Fransa hakimiyyəti ölkəsində fəaliyyət göstərən və adını müstəqil qoyan media resurslarından həm də şantaj aləti kimi istifadə edir?
Media məsələləri üzrə ekspert Müşfiq Ələsgərli “Bakı-Xəbər”ə açıqlamasında bildirdi ki, Şuşa Qlobal Media Forumu dünyada üzərinə süni pərdə çəkilmiş bir çox həqiqətlərin üstünü açdı: ”Ümumiyyətlə, bu Forumun mövzusu dezinformasiya, onun yaranma mənbələri, səbəbləri və hədəfləri ilə bağlı idi. Dezinformasiya saxta xəbərin tiplərindən biridir. Amma saxta xəbərin digər tiplərindən fərqlənir. Mahiyyəti ondan ibarətdir ki, dezinformasiya təsadüfən, yalnışlıqla yaranmış saxta xəbər yox, şüurlu şəkildə yaradılmış bir saxta təqdimatdır. Hədəfdə olan dövlətlərin, insanların, qrup və icmaların gücdən salınmasına hesablanmış bir alətdir. Günümüzdə dezinformasiya siyasi bir savaş aləti kimi istifadə olunur. Bunu vurğulamağımın səbəbi də odur ki, indiyə kimi yalan xəbərin, siyasi savaşın, dezinformasiyanın növlərindən danışanda hər zaman bunun texnoloji inkişafa uyğun olaraq çoxalmış məsələ olduğunu qeyd edirdilər. Amma indi beynəlxalq media nəzəriyyələrində göstərirlər ki, bu dezinformasiyanın, yalan xəbərin çoxalmasının səbəbi dünyada münaqişələrin, siyasi mübahisələrin, ziddiyyətlərin çoxalması ilə bağlıdır. Qarşı duran tərəflər dezinformasiyanı çox yaymaqla ümumilikdə dünya informasiya məkanını çirkləndirirlər. Problem nədədir? Məsələ ondadır ki, dezinformasiya istehsal edənlərin çoxu - ABŞ başda olmaqla, Qərb ölkələri və Fransadır. Bunun səbəbləri açıqlananda Əl-Cəzirənin nümayəndəsi yaxşı bir fikir dedi ki, dünyada aparıcı transmilli KİV-in, dünya ictimai rəyinə təsir göstərən media resurslarının çoxu Qərb ölkələrində yerləşir. Dezinformasiya da daha çox bu cür KİV vasitəsilə yayılır. İkinci bir nüans da odur ki, Çində yerləşənləri çıxmaq şərti ilə, sosial şəbəkə platformalarının da çoxu Qərbdən, ABŞ - dan bəhrələnir. Yəni nəticə etibarı ilə dünyada dezinformasiyanın siyasi mənada çoxu Qərb ölkələrində istehsal olunur. Fransa və onun mediası bu məsələlərdə ilkin yerlərdən birini tutur. Məsələ ondadır ki, bu həqiqət çox vaxt açılmırdı. Bir qismi bilərəkdən, bir qismi də bilməyərəkdən açmırdı. Çünki bir qisim dövlətlər aldadılırdı. Biz diqqət etsək görərik ki, dezinformasiyaya qarşı proqramların çoxu Qərbdən idarə olunur. Bir nümunə göstərək: Yaşadığımız günlərdə dünyada böyük bir proqram həyata keçirilir. “Dezinformasiyaya qarşı dayanıqlılığın yaradılması “ adlı bu layihəni Avropa İttifaqı maliyyələşdirir və büdcəsi də on milyonlarla dəyərindədir. Bu çox böyük bir proqramdır və onu Avropa İttifaqı maliyyələşdirməklə belə təəssurat yaradır ki, guya onlar dezinformasiyaya qarşı mübarizə aparırlar. Amma bu bir illüuziyadır, yalandır, tamaşadır. Çünki dezinformasiyanı istehsal edən həmin Qərb ölkələrinin özüdür. Bir tərəfdən dezinformasiya istehsal edirlər, digər tərəfdən də guya buna qarşı mübarizə aparırlar. Şuşa Qlobal Media Forumunun böyük əhəmiyyəti ondan ibarətdir ki, Azərbaycan başqa dövlətlərin demədiyi həqiqətləri demək üçün özündə iradə, güc tapdı. Yəni Azərbaycan dövləti, Prezidenti dezinformasiyanın yayılma mənbələrinin ünvanını göstərdi. Bu baxımdan da Şuşa Qlobal Media Forumu çox böyük əhəmiyyət daşıyır. Orada qeyd etmək lazımdır ki, Qərb mediası tək dezinformasiya yaymaqla deyil, həm də başqa problemlərlə məşhurdur. Cənab Prezident bunu da qeyd etdi ki, Fransa hakimiyyət sarayından tezis alaraq nələr edirlər. Onlar digər media məsələlərində də ikili standartla davranırlar. Bir tərəfdən deyirlər ki, media müstəqil olmalıdır, başqa təsirə düşməməlidir. Digər tərəfdən də özləri təsirə düşürlər, tezislər alırlar və dünyaya fəlakət gətirirlər. Beləcə, Şuşa Qlobal Media Forumu bu cür həqiqətlərin üstünü açmaqla dünyaya çox böyük töhfələr vermiş oldu”.
Məhəmmədəli QƏRİBLİ
