ABŞ 907-ci düzəlişi ləğv etməsə nə olacaq...
Əli Orucov: “ABŞ buna getməklə regionda Azərbaycan kimi tərəfdaşını itirəcək”
ABŞ Konqresinin yuxarı palatası Azərbaycana hərbi yardımın dayandırılmasını nəzərdə tutan və “2023-cü il tarixli Ermənistan Müdafiə Aktı” olan S.3000 qanun layihəsini təsdiqləyib. Bu barədə ABŞ Senatının saytı məlumat yayıb.
Qanun layihəsinin müəllifi 2023-cü ilin sentyabrında Ermənistana səfər etmiş ABŞ nümayəndə heyətinə rəhbərlik edən senator Cerri Pitersdir.
S.3000 qanun layihəsi Azərbaycanla bağlı 907-ci düzəlişin dayandırılmamasını nəzərdə tutur ki, bu da ölkəmizə qarşı qərəzli və qeyri-dost bir addımdır.
907-ci düzəliş ABŞ-ın Azərbaycana birbaşa dövlət yardımını qadağan edən düzəlişdir. 907-ci düzəliş ilk dəfə 1992-ci ildə guya "Azərbaycan tərəfindən Qarabağın "işğalı" və Ermənistana qarşı blokadanı dayandırmaq" məqsədilə senator Con Makkeyn tərəfindən, daha sonra isə senator Con Kerrinin və erməni lobbi təşkilatlarının dəstəyi ilə konqressmen Veyn Ovens tərəfindən təklif edilib. Bu əlavə ilə Azərbaycan Amerika hökumətinin keçmiş sovet respublikalarına göstərdiyi yardımdan xaric edilən yeganə ölkə olub. 2001-ci il 11 sentyabr hadisələrindən sonra Azərbaycanın beynəlxalq terrorizmlə mübarizədə dəstəyini təmin etmək məqsədilə ABŞ Konqresi prezidentə düzəlişin hüquqi qüvvəsini dayandırmaq səlahiyyəti verib. 907-ci düzəliş 2002-ci ildən bəri ABŞ prezidentləri tərəfindən hər il dayandırılırdı. Təsdiq edilmiş S.3000 qanun layihəsi isə ABŞ prezidentinə Azərbaycanla bağlı 907-ci düzəlişi dayandırmağa icazə vermir. Bütün bu deyilənlərin fonunda, Bayden 907-ci düzəlişə məhdudiyyət qoymasa nə olacaq?
“Yardımın ölkəmiz üçün iqtisadi çəkisi yox idi”
Məsələ ilə bağlı “Bakı-Xəbər”ə açıqlama verən AMİP funksioneri Əli Orucov bununla bağlı bir sıra məqamlara aydınlıq gətirdi: “Görünən odur ki, ABŞ düzəlişin tətbiqində maraqlıdır. ABŞ buna getməklə regionda Azərbaycan kimi tərəfdaşını itirəcək. Çənubi Qafqazın heç bir ölkəsi Azərbaycan qədər strateji əhəmiyyətə malik deyil. Azərbaycan Asiya ilə Avropa arasında körpü rolunu oynayır. Azərbaycansız Birləşmiş Ştatlar Orta Asiyaya necə çıxış əldə edəcək? İstər Rusiya, istər İran ABŞ-la düşməndir. Pakistanın illərdir ABŞ-la münasibətləri gərgindir. Çindən isə danışmağa dəyməz. Ən azından ona görə ki, bu dövlətlər əzəli rəqibdilər. Çox təəssüflər olsun ki, Bayden adminstrasiyası bunları tam nəzərə almayaraq erməni lobbisinin təsiri altında belə ədalətsiz qərar qəbul etdi. Halbuki, ABŞ rəsmiləri deyirdilər ki, biz İran amilinə görə Azərbaycana hərbi yardım edirik. O zaman sual olunur, nə dəyişdi? Yardımın Azərbaycan üçün iqtisadi çəkisi yox idi. Çünki neft ölkəsi olan Azərbaycanın milyardlarla dollar vəsaiti var. Söhbət burada siyasi əhəmiyyətdən gedir. Ona görə də ümid edirəm ki, qarşıdakı illərdə ABŞ bu strateji səhvini düzəldəcək”.
Vidadi ORDAHALLI
