Regionlardakı universitet müəllimləri orta məktəb müəllimlərinə həsəd aparır - Səbəb...
Kamran Əsədov: “Bölgə universitetlərinin tələbə kontingenti az olur, bu da təhsil müəssisəsinin maliyyələşməsinə mənfi təsir göstərir”
Ali təhsil müəssisələrində dərs deyən müəllimlər əmək haqlarının aşağı olmasından narazılıq edir. Xüsusən regionlardakı universitet müəllimlərinin əməkhaqları onları qane etmir.
Məıumdur ki, ümumorta təhsil müəsisələrində müəllimlərin əməkhaqlarının artırılması yönündə müəyyən imtahanlar keçirilsə də, ali təhsil müəssisələrində belə bir qayda tətbiq olunmayıb.
Maraqlıdır, ali təhsil müəssisələrində fəaliyyət göstərən müəllimlərin əməkhaqlarının aşağı olmasına səbəb nədir?
“Bölgələrin sosial vəziyyəti nəzərə alınmaqla müəllimlərin əmək haqqı hesablanma qaydası dəyişilməlidir”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, ölkədə fəaliyyət göstərən 51 ali təhsil müəssisəsinin 20-dən çoxu bölgələrin payına düşür: “Etiraf edək ki, bu gün bölgələrdə olan ali təhsil müəssisələrində çalışan müəllimlərin əmək haqqı paytaxt Bakı ilə müqayisədə azdır. Bunun bir neçə səbəbi var. Əmək haqqı vahid tarif əsasında ödənilir. Ancaq bölgələrdə tələbələrin sayı az olduğu üçün müəllimlərin dərs yükü, dərs saatı paytaxt Bakı ilə müqayisədə fərqlidir. Bu da müəllimlərin əmək haqqına təsir edir. Eyni zamanda, bölgələrdə dərs deyən universitet müəllimlərinin elmi dərəcələri də aşağı olur, ya da heç olmur. Bu fakt da əmək haqqının məbləğinə təsir edir”.
Həmsöhbətimiz hesab edir ki, ali təhsil müəllimlərinin əmək haqqı məsələsinə ikili yanaşma tətbiq olunmalıdır. Sərhəd bölgəsində xidmət edən hərbçilərə 2 qat əmək haqqı verilir: “Bölgələrin sosial vəziyyəti nəzərə alınmaqla müəllimlərin əmək haqqı hesablanma qaydası dəyişilməlidir. Bu yanaşma fərqli olmalıdır. Onu da nəzərə almaq lazımdır ki, rayonlarda təhsil alan tələbələr aşağı balla qəbul olanlardır. Onlar bəzən təhsildən tez də imtina edir. Buna görə də bölgə universitetlərinin tələbə kontingenti az olur. Bu da təhsil müəssisəsinin maliyyələşməsinə mənfi təsir göstərir”.
Günel CƏLİLOVA
