Azərbaycan və Qazaxıstan prezidentlərinin Şuşadan dünyaya mesajları...
Aydın Hüseynov: “Azərbaycan və Qazaxıstan prezidentlərinin Şuşa səfəri Türk qardaşlığının təntənəsini nümayiş etdirdi”
Azərbaycanın xarici siyasət strategiyasının prioritet istiqamətlərindən birini Türk dövlətləri ilə mövcud münasibətləri daha da inkişaf etdirmək, bütün sahələr üzrə əlaqələri genişləndirmək təşkil edir. Bu aspektdə görülən işlər davamlı xarakter daşıyır, dövlət başçıları səviyyəsində təşkil olunan qarşılıqlı səfərlər, imzalanan sənədlər yeni əməkdaşlıqlar üçün zəmin yaradır.
Məlumdur ki, martın 12-də Prezident İlham Əliyev və Qazaxıstan Prezidenti Kasım-Jomart Tokayev Şuşa şəhərinə səfər ediblər.
Maraqlıdır, Prezident İlham Əliyevlə Kasım-Jomart Tokayevin Şuşada olmasının nə kimi əhəmiyyəti var? Kasım-Jomart Tokayevin Şuşada olması dünyaya nə kimi mesajlar verir?
“Şuşa səfəri göstərdi ki, Qazaxıstan Şuşanın Türk dünyasının mədəniyyət paytaxtı kimi siyasi-tarixi əhəmiyyətinə xüsusi dəyər verir, bu şəhərin bərpasına öz qardaşlıq dəstəyini nümayiş etdirir”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Bakı-Xəbər”ə açıqlamasında bildirdi ki, Azərbaycan və Qazaxıstan strateji münasibətləri son illərdə ən yüksək səviyyə daşıyaraq Türk birliyinin möhkəmlənməsində açıq siyasi iradə nümayiş etdirir: “Prezident İlham Əliyev və Qazaxıstan Prezidenti Kasım-Jomart Tokayev Şuşa şəhərinə səfəri tarixi hadisədir və Türk birliyinin təntənəsini nümayiş etdirir. Türk dünyasının liderlərindən olan Rəcəb Tayyib Ərdoğanın əsasını qoyduğu bu ənənə artıq digər qardaş türk ölkələrinin rəhbərlərinin də Şuşaya səfərləri fonunda birlik və qardaşlığın rəmzini ifadə edən tarixə çevrilir. Kasım-Jomart Tokayevin Şuşada olması dünyaya bir daha Türk birliyinin qüdrəti barədə mesajlar verdi. Bu mesajlar onu ehtiva edir ki, dünya erməni vandalizminə məruz qalmış Şuşadakı həqiqətləri görməlidir, erməni terroruna tarixi qiymət verməldir. Eyni zamanda, Şuşa səfəri göstərdi ki, Qazaxıstan Şuşanın Türk dünyasının mədəniyyət paytaxtı kimi siyasi-tarixi əhəmiyyətinə xüsusi dəyər verir, bu şəhərin bərpasına öz qardaşlıq dəstəyini nümayiş etdirir”.
Millət vəkilinin sözlərinə görə, Qazaxıstan Prezidenti Kasım-Jomart Tokayevin Azərbaycana rəsmi səfəri iki ölkə arasında əlaqələrin inkişafına töhfə verəcək: “Hər iki qardaş ölkə Türk Dövlətləri Təşkilatı çərçivəsində sıx əməkdaşlıq edir və qarşılıqlı fəaliyyəti gələcəkdə də möhkəmləndirmək qarşımızda duran əsas vəzifələrdəndir. Qazaxıstan işğaldan azad olunmuş ərazilərdə də Azərbaycana dəstək verməkdədir. Füzuli şəhərində Kurmanqazı adına Uşaq Yaradıcılıq Mərkəzinin inşası bu təşəbbüskarlığın ən yaxşı nümunəsidir”.
A.Hüseynov bildirdi ki, Vətən müharibəsi nəticəsində ərazilərini işğaldan azad etdikdən sonra Azərbaycan bölgədə yeni reallqılar yaratmaqdadır, xüsusilə də Mərkəzi Asiya ölkələrinin də təmsil olunduğu Türk Dövlətləri Təşkilatının bu bölgəyə inteqrasiyası güclənməkdədir: “Yeni İpək Yolunun Orta Dəhlizinə çevrilən Azərbaycan Şərq-Qərb nəqliyyat magistralının əsas nöqtələrindən biri olan Mərkəzi Asiya ilə əlaqələri də gücləndirir. Xüsusilə də Zəngəzur dəhlizinin yaradılması ilə Çin-Mərkəzi Asiya və Avropanın sıx inteqrasiyası artmış olacaq ki, bu prosesdə əsas xətt Azərbaycanın ərazisini əhatə etmiş olacaq”.
Millət vəkili onu da əlavə etdi ki, dövlət başçılarımızın sıx münasibətləri ölkələrimiz arasında əlaqələrə mühüm töhfə verir, ikitərəfli əməkdaşlığın yüksələn xətlə inkişafına və daha da güclənməsinə xidmət edir. Ümumiyyətlə, Azərbaycan və Qazaxıstan prezidentlərinin son illər qarşılıqlı yüksək səviyyəli səfərləri ikitərəfli münasibətlərə müsbət təsirini göstərib. Bu baxımdan, Qazaxıstan Prezidentinin ölkəmizə budəfəki rəsmi səfəri də iki qardaş dövlət arasında müttəfiqlik münasibətlərini daha da gücləndirəcək.
Günel CƏLİLOVA
