Neft-qazdan imtina çağırışı hara, Cənub Qaz Dəhlizinin Bakı məşvərətinə gəlmək hara?..
Əli Mustafa: “Bu onu göstərir ki, Avroittifaq yekcins deyil”
Xəbər verildiyi kimi, Avropa Parlamenti növbəti dəfə Azərbaycana qarşı qətnamə qəbul edib. Qətnamədə Avroparlament Azərbaycana qarşı sanksiya çağırışı edir, üzv dövlətləri neft və qaz alışından imtinaya çağırır.
O biri yandan Avropa İttifaqı təmsilçiləri Bakıda Cənub Qaz Dəhlizi Məşvərət Şurası çərçivəsində nazirlərin 10-cu iclası və Yaşıl Enerji Məşvərət Şurası çərçivəsində nazirlərin 2-ci iclasına qatılır.
Göründüyü kimi, bir tərəfdən Avroparlament Azərbaycana qarşı Qarabağla bağlı sanksiya çağırışı ilə çıxış edir, enerji məhsullarının idxalını məhdudlaşdırmaqla bağlı təşəbbüs qaldırır, bu tərəfdən də Avroittifaqın enerji sektoru ilə bağlı məmurları Bakıdakı tədbirə qatılır. O baxımdan bu ziddiyyət necə izah oluna bilər?
“Bunda erməni lobbisi ilə yanaşı, Fransanın da ciddi rolu var”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, belə ziddiyətli münasibəti başa düşmək olmur: “Bir tərəfdən Avropa İttifaqı Azərbaycanla enerji sahəsində əməkdaşlıq edir. Digər tərəfdən Avropa Parlamenti Azərbaycanın əleyhinə sanksiyaların tətbiqi ilə bağlı çağrış edir. Əvvəla, bu onu göstərir ki, Avroittifaq yekcins deyil. Avropa Parlamenti, ola bilsin ki, əhəmiyyətli şəkildə erməni lobbisinin təsiri altındadır. Çox güman, onların seçilməsində erməni lobbisi fəal iştirak edib. Bu səbəbdən bir sıra deputatlar erməni lobbisinin girovuna çevriliblər. Reallıq odur ki, Avropadakı erməni lobbisi həmin seçki prosesində onlara maliyyə dəstəyi verir. Bunun qarşılığında həmin deputatlar erməni lobbisinin maraqlarından çıxış edərək Avropa Parlamentində Azərbaycanı hədəf alırlar. Bax, məsələnin kökü bununla bağlıdır. Biz onu da nəzərə almalıyıq ki, Avroparlament deputatlarının bir qismi korrupsiyaya bulaşıb. Zaman-zaman onların adı korrupsiya qalmaqallarında hallanıb. Bütün bunlar həm də onu göstərir ki, demokratik təsisatlar çoxqütüblü və çoxpolyarlı olur. Ancaq Avroittifaqın Azərbaycanla münasibətləri, çox təəssüf ki, qərəzlidir. Bunda erməni lobbisi ilə yanaşı, Fransanın da ciddi rolu var. Çünki Fransa qurumun siyasi qanadında aparıcı rola malikdir. Üstəlik, Fransa Cənubi Qafqazda seçimini edib və Ermənistanla hərtərəfli əməkdaşlıq edir. Bütün bunlar həm də onu deməyə əsas verir ki, diaspora işimizə yenidən baxmalıyıq. Qərb institutları ilə yaxından işləməliyik. Azərbaycana qarşı olan fəaliyyətləri neytralaşdırmalıyıq. Bəli, bizə qarşı qərəzli münasibət var. Xristian amilindən çıxış edib Ermənistanı himayə edirlər. Ancaq bu o demək deyil ki, arxayın oturmalıyıq. Biz də Avropada müəyyən dairələrlə işləməliyik. Bizə sabit dəstək verən dost ölkələrlə əməkdaşlığımızı dərinləşdirməliyik. Səfirliklərin fəaliyyəti gücləndirilməlidir. Milli maraqlara cavab verən diplomatların səfirliklərə rəhbərlik etməsi şərtdir. Qarşıda Avropa Parlamentinə seçkilərin keçirilməsi gözlənilir. Biz də bu işdə fəal olmalıyıq. Lobbi təşkilatları ilə işləməliyik. Elə etməliyik ki, AP-yə Azərbaycanın maraqlarından çıxış edən şəxslər də seçilsin”.
Vidadi ORDAHALLI
