Paradı belə keçirdəllər ey, Paşinyan- yan, yan, Sarkisyanla birgə yan...
Noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirilib. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev, birinci xanım Mehriban Əliyeva və oğulları Heydər Əliyev paradda iştirak ediblər.
44 günlük Vətən müharibəsində Prezident, Müzəffər Ali Baş Komandan İlham Əliyevin müdrik rəhbərliyi və Azərbaycan Ordusunun misilsiz qəhrəmanlığı ilə qazanılmış tarixi Zəfər tariximizə qızıl hərflərlə yazılıb. Vətən torpaqlarının bütövlüyü uğrunda qəhrəmancasına mübarizə aparan igid əsgər və zabitlərimizin misilsiz şücaəti sayəsində düşmən ordusu darmadağın edilib, 30 ilə yaxın müddətdə işğal altında qalan torpaqlarımız azad edilib və ölkəmizin ərazi bütövlüyü bərpa olunub.
Heç şübhəsiz ki, əldə olunmuş tarixi Zəfər yenilməz Azərbaycan Ordusunun qüdrətinin bariz göstəricisi, Prezident-Xalq sarsılmaz birliyinin böyük təcəssümüdür.
Bu möhtəşəm Qələbə heç də asan əldə olunmamışdır, xalqımız 3 mindən artıq şəhid vermiş, minlərlə gəncimiz sağlamlığını itirmişdir. 2020-ci ilin sentyabrın 27-də başlayan və cəmi 44 günə başa çatan Vətən müharibəsi Azərbaycan Ordusunun Qələbəsi ilə başa çatdı. Bu müddətdə Azərbaycan xalqı əzmlə, səbirlə, durmadan çalışaraq, öz dövlətini gücləndirərək tarixi anın yetişməsini gözlədi. Xalqımız Ali Baş Komandan İlham Əliyevin ətrafında sıx birləşdi, birliyimiz hər gün daha da möhkəmləndi. Bu birlik bizi Qarabağa qaytardı və 8 noyabr 2020-ci il Azərbaycan tarixinin şanlı səhifəsinə - Qələbə Günü kimi qızıl hərflərlə yazıldı.
