Ürəklərdə yaşayan Emil... - FOTO
44 günlük İkinci Qarabağ müharibəsində minlərlə qeyrətli Vətən oğulları son damla qanına qədər döyüşərək bizlərə zəfər sevincini bəxş etdilər. İndi adında bütöv bir xalqın qəhrəmanlıq simvolunu yaşadan Emil Vaqif oğlu Qurbanov da haqq savaşımızda qəhrəmanlıq göstərərək şəhidlik zirvəsinə ucaldı. Şərəfli ölümü ilə xalqına, Vətəninə şöhrət olan, ürəklərdə özünə əzəmətli abidə ucaldan Emillə doğulub boy-başa çatdığı Lənkəran camaatı daha çox fəxr edir. Lənkəranlılar əlçatmaz, ünyetməz ulduzlar dünyasından boylanan öz qəhrəman oğlunu heç vaxt unutmur, onun şərəfinə layiqli işlər görürlər. Hazırda Lənkəranda Emilin örnək ömrünü özündə əks etdirən, camaatın and yerinə çevrilən yadigarlar çoxdur.
Zəfər günü münasibətilə Lənkəran Şəhər İcra Hakimiyyətinin başçısı Taleh Qaraşov, icra aparatının rəsmi şəxsləri, rayon ictimaiyyətinin nümayəndələri və şəhid ailələrinin üzvləri Emil Qurbanovun məzarını ziyarət edib, xatirəsinə ehtiram olaraq önünə gül dəstələri düzdülər.
Söhbət əsasında bildirildi ki, haqq savaşımızda qəhrəmanlığı ilə ölümsüzlüyə qovuşan Emil bizim üçün iftixar yeri, qürur mənbəyidir. O, Vətən, millət yolunda şüurlu surətdə canını fəda etdi. Odur ki, qərinələr boyunca şərəfli həyat yolu nümunə olacaq. Bəli, Emil özündən sonra örnək olacaq bir tarix yazdı, dövlət də öz qəhrəman oğlunu “Azərbaycan Bayrağı” ordeni, “Vətən uğrunda”, Qubadlının, Cəbrayılın azadlığına görə medallarına layiq gördü.
Ömrünün 40-cı ilində müqəddəsliyinə tapındığı Vətənin yaşaması naminə canından keçən Emil Qurbanov Lənkəran Dövlət Universitetini bitirmişdi. 2002-2003-cü illərdə həqiqi hərbi xidmətdə olan Emil Qurbanov leytenant rütbəsi alaraq rayonuna qayıdır. Hərb sahəsinə sonsuz marağı onu yenidən, üç aylıq fasilədən sonra ordu sıralarına aparır. O, 2003-cü ilin oktyabrında Tərtər rayonunun “N” saylı hərbi hissəsində tağım komandir vəzifəsində Vətənin keşiyində durur. 2005-ci ilədək burada hərbi xidmətini davam etdirir. 2005-ci ildə yenidən Lənkərana qayıdan Emil “Zirvə” idman kompleksində məşqçi-müəllim işləməyə başlayır, idman müəllimi kimi müxtəlif yarışlarda iştirak edir. Daha sonra o, Lənkəran Şəhər Uşaq Gənclər İdman Məktəbində məşqçi-müəllim vəzifəsinə təyin olunur. 2012-ci ilin sentyabrınadək orada fəaliyyət göstərir. Seçdiyi ixtisası çox sevdiyi üçün E.Qurbanov müəllimlərin işə qəbulu müsabiqəsində iştirak edərək, bir vaxtlar təhsil aldığı Lənkəran şəhər A.Məhərrəmov adına 7 saylı tam orta məktəbində gənclərin təlim-tərbiyəsi ilə məşğul olur. Qarabağın işğalına qarşı həmişə barışmaz mövqeyini ortaya qoyan Emil 2020-ci il 27 sentyabrda haqq savaşımız başlananda Vətənin harayına birinci səs verir, gözünü qırpmadan əlinə silah alır, özünü odlu-alovlu səngərə atır. Tağım komandiri kimi leytenant Emil Qurbanov Füzuli, Xocavənd və Qubadlı uğrunda gedən döyüşlərdə rəşadət göstərir. Düşmənə qan qusdura-qusdura qanlı-qadalı yollar keçir. Qubadlının düşməndən azad olunması uğrunda ağır döyüşdə iki güllə yarası alaraq qəhrəmancasına əbədiyyət adlı dünyasına qovuşur...
Zəfər ORUCOĞLU
Azərbaycan Jurnalistlər Birliyinin üzvü
