Eçmiədzin kilsəsi mənasız "Arsax yeparxiyasını" niyə belə qoruyur?..
“Erməni kilsəsinin qəbul etdiyi bu absurd qərar onların separatçılığı yenidən tətikləmək istəyindən, təəssübkeşliyindən, fanatikliklərindən, məkrli erməni xislətindən irəli gəlir”
Erməni Qriqoryan kilsəsinin mərkəzi Eçmiədzin yenə də öz separatçı əməllərindən qalmır və qızışdırıcı mövqeyi ilə gündəmə gəlir. Ermənistan mətbuatının yazdığına görə, şər yuvası Eçmiədzin “Arsax yeparxiyasını” saxlamaq qərarına gəlib.
Separatçıların “ilham mənbəyi” katolikosu II Qareginin rəhbərliyi ilə Ali Ruhani Şuranın iclası keçirilib və iclasda separatçı Artak Beqlaryan da iştirak edib. Bu həmin Beqlaryandır ki, siçan deşiyində gizlənib Azərbaycana qarşı hədyanlar yağdırır. O həm də artıq mövcud olmayan “Arsax”ın keçmiş “dövlət naziri” olub.
Erməni Qriqoryan Kilsəsinin “Arsax yeparxiyasının” “rəhbəri” “yepiskop” Vrtanes Abrahamyan iddia edib ki, “Arsax yeparxiyası” ləğv edilməyəcək. Guya onlar bununla geri qayıtmaq arzularını gerçəkləşdirmiş olacaqlar. Anlamırlar ki, “Arsax” anlayışı yoxdur və bu adda ərazi mövcud deyil, Azərbaycan Respublikasının Qarabağ İqtisadi rayonu var.
Eçmiədzin kilsəsi mənasız "Arsax yeparxiyasını" niyə belə qoruyur?...
Milli Cəbhə Partiyasının sədr müavini, tanınmış ilahiyyatçı Tural İrfan “Bakı-Xəbər”ə şərhində “Bilirsiz ki, erməni dövləti kilsə əsasında bərqərar olub və onların təriqəti başqadır, onlar Qriqoryan kilsəsinə mənsubdurlar. Bir çox hallarda onlar ümumi xristian rəhbərliyinin də, Roma papasının, yaxud digər xristian liderlərinin də göstərişlərinə zidd addımlar atırlar. Bu, separatçılıq, “milli təəssübleşlik” əsasında yaradılmış bir təriqətdir, bir cərəyandır. O yığıncaqda kilsə rəhbərinin özü də bildirib ki, biz “Arsax”a qayıtmağı düşünürük, ümidimizi kəsmirik, ona görə də “yeparxiyanı saxlayırq”. Halbuki, belə bir ərazi vahidi yoxdur.
Düşünürəm ki, erməni kilsəsinin bu cür iddia ortaya qoymasına cavab verməmək mümkün deyil. Bu baxımdan, Eçmiədzin kilsəsinin bu separatçı niyyətlərinə qarşı ortaya mövqe qoyulmalıdır. Erməni Qriqoryan kilsəsi artıq bu cür iddia qaldırırsa, onda Qafqaz Müsəlmanları İdarəsi, yaxud Dini Qurumlarla İş üzrə Dövlət Komitəsi də bizim Göyçə mahalında, Qərbi Azərbaycanın digər yerlərində, həmçinin də İrəvanda vaxtilə yaşamış soydaşlarımızla bağlı belə bir qərar qəbul edə bilər ki, gələcəkdə onlar da öz yurdlarına qaytarılıb yerləşdirilməlidir. Çünki bizim QMİ bütün Qafqazı əhatə edir. Gürcüstanda, Dağıstanda QMİ-nin nümayəndəsi var. Ona görə də hesab edirəm ki, Qərbi Azərbaycan üzrə də QMİ-nin nümayəndəsi olmalıdır.
Bütün hallarda erməni kilsəsinin qəbul etdiyi bu absurd qərar onların separatçılığı yenidən tətikləmək istəyindən, təəssübkeşliyindən, fanatikliklərindən, məkrli erməni xislətindən irəli gəlir. Bir sözlə, onlar öz qara niyyətlərindən əl çəkmək istəmirlər. Xudavəng məbədindən də onlar güclə çıxdılar”-deyə T.İrfan qeyd etdi.
T.İrfanın sözlərinə görə, Ermənistan ərazisində olan kilsələrin heç biri erməni kilsəsi deyil, tarixi qədim alban kilsələridir, alban irsinə aiddir, bizdə də bu məsələ ilə bağlı Alban Udi Xristian İcması da var. “Qarabağda da heç bir erməni irsi yoxdur” - deyən T.İrfan qeyd etdi ki, onlar işğal dövründə kilsələr tikiblər. O qeyd etdi ki, Qarabağda ermənilər Azərbaycan vətəndaşları kimi hansısa icma yarada və o icma da bizim dini qurumlara tabe ola bilər, Eçiməzdin isə buna müdaxilə edə bilməz. “Eçimədzində oturub nə qərar verirlərsə bunun əhəmiyyəti yoxdur. Onlara Qərbdən təsirlər var. Qərbdə də xristian təəssübkeşliyinə əsaslanan bəzi cərəyanlar var, onlar Fransada, ABŞ-da yerləşir. Ola bilsin, erməni kilsəsi Qərb dairələrinin təsiri ilə belə bir “qərar” verib, mən onu boş və absud hesab edirəm. Bu, separatçılığa, radikalizmə, yenidən əsassız torpaq iddialarına hesablanan və sülh prosesinə xələl gətirən məsələdir”-deyə T.İrfan əlavə etdi.
T.İrfanın sözlərinə görə, qondarma “Böyük Ermənistan” ideologiyası məhz erməni kilsəsi tərəfindən irəli sürüb. Erməni kilsəsinin təməlləri bu çürük ideologiya əsasında qurulduğu üçün bu cür çıxışlar etdiklərini deyən T.İrfan qeyd etdi ki, onlar bu cür separatçı iddiaları Türkiyənin bəzi əraziləri ilə bağlı da irəli sürürlər.
İradə SARIYEVA
