“Qarabağ klanı” ilə Paşinyan iqtidarı arasında qarşıdurma kəskinləşdi...

Ermənistanda “Qarabağ klanı” ilə mövcud hakimiyyət arasında münasibətlər getdikcə daha gərgin xarakter almağa başlayır. Buna səbəb “Qarabağ klanı”nın Azərbaycan ərazilərini tərk edən ermənilərdən hakimiyyətə qarşı istifadə etmək cəhdləridir. Elə bu fonda “Artsax” ideyasını Ermənistanda diriltməyə yenidən cəhdlər olunur. Amma bu, Nikol Paşinyan iqtidarı tərəfindən sərt qarşılanır.

Yaranmış vəziyyətdə Ermənistanın “Qraparak” nəşri yazır ki, ölkənin  xüsusi xidmət orqanları qondarma “Artsax” ideyasını dəstəkləyənlərin “ovuna” başlayıb. Bildiriilir ki, separatçı rejimin ləğv edilməsi haqda qərarı qəbul etməyən, bu qərarın ləğvini tələb edənlərin Ermənistan Milli Təhlükəsizlik Xidmətində dindirildiyi haqda məlumatlar yayılıb. Qeyd edilir ki, dindirilməyə dəvət olunanlara təzyiqlər edilir, onlara qondarma “Artsax”ın artıq mövcud olmadığı izah olunur: “Milli Təhlükəsizlik Xidmətinə dəvət olunanlar arasında Artak Beqlaryan, Şahramanyanın keçmiş “müşaviri” Vladimir Qriqoryan, “parlamentin sədr müavini” Qaqik Baqunts və digərləri var”. Erməni mediası separatçılara qarşı bu addımı Ermənistan tarixində bənzəri olmayan, inanılmaz hadisə kimi qiymətləndirir və buna görə Paşinyan hakimiyyətini ittiham edirlər.

Qeyd edək ki, Qarabağda antiterror tədbirlərindən sonra separatçı rejim özünü buraxmaq haqda qərar qəbul edib. Lakin separatçılar İrəvana qaçdıqdan sonra bu qərardan imtina etməyə çalışır. Ermənistan hakimiyyəti isə bu iddiaları ölkənin təhlükəsizliyinə təhdid olaraq qəbul edir. Parlamentin müxalif “Şərəfim var” fraksiyasının katibi Tiqran Abramyan qeyd edir: “Artsax” səhifəsini bağlamaq və nəhayət, bu mövzunu gündəmdən çıxarmaq üçün 44 günlük müharibədən sonra aparılan danışıqlarda Azərbaycan öz şərtlərini diqtə edir. İndi Ermənistan və Azərbaycanın hakimiyyət orqanları erməni xalqını inandırmağa çalışırlar ki, “Artsax prezidentinin” məlum fərmanının ləğvi Azərbaycanın hərbi cavabına səbəb ola bilər. Son 3 ildə Azərbaycan Ermənistan hakimiyyəti ilə istədiyi kimi davranıb. Yalnız ən cahil və ya axmaq adam düşünə bilər ki, Azərbaycan Ermənistandan yenidən nəyisə götürməyi qarşısına məqsəd qoyubsa, buna səbəb tapmayacaq. “Artsax” məsələsi Ermənistan və Azərbaycan hakimiyyətinin “boğazındakı düyün” kimidir, ondan qurtulmaq üçün birgə təhdid və şantajı seçdilər. Onlar “Artsax prezidentinin” fərmanından qurtulandan sonra Azərbaycanın ərazi və siyasi ambisiyalarının bütün gözləntilərini təmin etmək üçün Ermənistanın müxtəlif bölgələrində də eyni şeyi edəcəklər”. Amma qeyd edək ki, Azərbaycanın Ermənistana qarşı hansısa iddiası yoxdur. Bakı sülh istəyir. Vasitəçilərin Azərbaycan və Ermənistan arasında sülh danışıqları təşkil etmək cəhdləri hazırda, faktiki olaraq, uğursuzluq zolağındadır. Bunun fonunda Bakı İrəvana birbaşa təmaslara keçməyi təklif edib. Qeyd edək ki, Azərbaycanın Ermənistana 5 prinsip əsasında təklif etdiyi sülh müqaviləsinin əsasını - dövlətlərin bir-birinin suverenliyi, ərazi bütövlüyü, beynəlxalq sərhədlərinin toxunulmazlığı və siyasi müstəqilliyini qarşılıqlı şəkildə tanıması, dövlətlərin bir-birinə qarşı ərazi iddialarının olmamasının qarşılıqlı təsdiqi və gələcəkdə belə bir iddianın qaldırılmayacağına dair hüquqi öhdəliyin götürülməsi, dövlətlərarası münasibətlərdə bir-birinin təhlükəsizliyinə hədə törətməkdən, siyasi müstəqillik və ərazi bütövlüyünə qarşı hədə və gücdən istifadə etməkdən, BMT Nizamnaməsinin məqsədlərinə uyğun olmayan digər hallardan çəkinmək, dövlət sərhədinin delimitasiyası və demarkasiyası, diplomatik münasibətlərin qurulması və nəqliyyat və kommunikasiyaların açılışı, digər müvafiq kommunikasiyaların və qarşılıqlı maraq doğuran digər sahələrdə əməkdaşlığın qurulması təşkil edir. 

İki ölkə arasında bu prinsiplərlə sülhün əldə olunması Ermənistanda revanşist qüvvələri, həmçinin İrəvanın bəzi havadarlarını narahat edir. Bu fonda onlar “Qarabağ klanı”ndan çirkin məqsədləri üçün istifadə etməyə çalışırlar. “Qarabağ klanı” isə Ermənistanı Azərbaycanla yeni toqquşmaya sövq edir. Paşinyan hakimiyyətinə ciddi təzyiqlərin göstərilməsi, İrəvanın təslimçi sülhə hazırlaşması ilə bağlı onların nəzarətində olan mediada məlumatların tirajlanması da bu məqsədə xidmət edir. Xatırladaq ki, Azərbaycanın 44 günlük Vətən müahribəsində məğlub etdiyi ordunun təməli də məhz “Qarabağ klanı” tərəfindən qoyulub. Elə bu səbəbdən də prezident İlham Əliyev çıxışlarında Vətən müharibəsində darmadağın edilən düşmən ordusunu “Sarkisyan-Köçəryan ordusu” kimi dəyərləndirir. Bütün bu məqamlar onu göstərir ki, erməni hakimiyyəi ölkəni yeni müharibələrə sürükləməyə çalışan “Qarabağ klanı”ndan xilas olmaq üçün qəti addımlar atmalıdır.  Əks təqdirdə, “Qarabağ klanı” Ermənistan cəmiyyətinə  ciddi problemlər yaratmaqda davam edəcək. Ermənistanın hakim dairələri, parlamentdə “Vətəndaş müqaviləsi” fraksiyasının nümayəndələri bildirir ki, Ermənistan ərazisində ikinci “hökumət” və ikinci “parlament” fəaliyyət göstərə bilməz. Amma artıq bunu əməldə də sübut etmək lazımdır.

Ramil QULİYEV